殿堂級歌手林子祥（阿Lam）舉行完紅館騷記者會後，孖兒子林德信（Alex）受訪，講到即席宣布加開兩場演唱會，阿Lam表示每次做騷都貴精不貴多，會盡力做到最好，續透露今次演唱會會加入音樂劇元素，早在一年前已經將歌單給予有份演出的後輩們，包括兒子，Alex說：「每個演員都大約有4、5首歌，都係跟角色唱，已經準備好晒。」問到阿Lam豈不是會唱少好多歌？他大派定心丸話：「我唱好多！成個騷會有50幾首歌，我會唱9成，用音樂講古仔。」
問到為何唔搵老婆葉蒨文演出？阿Lam大笑話：「冇角色啱佢！（做情人？）哈哈！佢都話個個騷都做嘉賓，要歇一歇，今次主要係年輕人。除咗加入音樂劇元素之外，都會有電影元素等。（有難度？）有，要穿插唱歌，又要動用好多人。」又透露之後會原班人於東南亞地區舉行巡迴演出。
至於問到Alex今次演出可會感壓力？他笑話都有：「唔同之前淨係做嘉賓，又要跳舞、做戲、彈樂器，每樣都要好好咁準備，要多過平時開騷嘅規模。」阿Lam指仔仔近日都有參與戲劇演出，故都能累積經驗：「依家佢哋都綵排緊。（仔仔表現合格？）等佢哋排到七七八八先畀分」問到若仔仔做得唔好會否出聲鬧時，Alex即笑笑口點頭，而阿Lam睇見就作狀出拳，笑話：「我都未鬧過佢！打過未鬧過！」Alex抵死反擊：「佢（鬧咗）唔覺啫！費事講嘢就打！」十分爆笑！
來源 source: http://hk.on.cc
|
鍾意就快D Share啦！
|
|
|