今時今日，要搵到一個肯陪你癲陪你瘋，唔怕蚊咬唔怕食風，陪你坐沙灘坐足一晚，齋聽你唱歌嘅港女女友，真係唔容易呀！偏偏側田就搵到，恭喜晒呀！唔信？俾啲嘢大家睇呢日喺赤柱見到側田同女友Karen，帶埋愛狗BuBu，入咗餐廳食brunch，兩個雞啄唔斷咁，勁多話題！阿田食飽後，一個人走咗出去睇風景！入返餐廳，第一時間同女友講，見到個地方可以睇到日落，好興奮咁行返出去叫埋Karen一齊望，仲話要行去嗰邊。右手抱住BuBu嘅阿田，左手又要攬住個結他，Karen幫佢整理好後，孭住自己個環保袋仔，又要幫佢孭埋個背囊。搵到個位坐低後，阿田拎起結他同喇叭tune聲，又望吓攬住BuBu嘅Karen，阿田眼裡面只有女友一個，呢一刻，諗起呢首歌：「眼裡每種溫馨好滋味，未來只看著你，微笑中班點會皺起，得我始終望穿你，仍然想講最後一句，我的雙眼裡尋找到美麗之最。」
睇住日落唱歌冧女友，Karen就梗係甜在心頭啦，一唱就唱足7粒鐘，你都咪話唔勁，最難得係咩呀？係Karen冇詐型肯陪阿田癲，唱咁耐真係唔係個個港女都忍得架！不過，自從阿田同Karen一齊之後都改變咗唔少，個人開心咗放鬆咗有耐性咗！唔講唔知，阿田同Karen都鍾意煮嘢食，好似呢晚咁，兩個喺超市揀完牛扒，阿田突然折返買紅酒杯。期間撞到個老友吹咗幾句水，有途人認得佢會微笑點頭，好nice，俾完錢會合返喺出面等緊嘅Karen，然後截的士返屋企煮飯仔。咁又係呀，阿田嚟緊6月14及15日喺紅館開個唱，少食街外嘢食係好啲嘅！
攝錄：陳亦龍、蕭敬漁
來源 source: http://nextplus.nextmedia.com
|
鍾意就快D Share啦！
|
|
|