2019年2月12日 星期二

【考慮一年後拒婚】錯過結婚生仔機會 蓋世寶:佢已經成為人哋老公 __,蓋世寶,

入行23年嘅蓋世寶,有過兩段感情,第一段係主持兒童節目時識嘅鄧健泓Patrick,可惜拍咗一年就玩完。不過,佢哋再見亦是朋友,雖然分手多年,但到而家都 ...




入行23年嘅蓋世寶,有過兩段感情,第一段係主持兒童節目時識嘅鄧健泓Patrick,可惜拍咗一年就玩完。不過,佢哋再見亦是朋友,雖然分手多年,但到而家都仲有聯絡!「佢仍然係我好好嘅朋友,好值得信任,呢個人真係好好。」同Patrick分手後,Lulu遇上林遠迎,一拍就拍咗好多年,亦係Lulu口中錯過咗開花結果嘅一段情。「已經錯過咗,但我重複又重複去諗過,可能隔一段時間又會諗,當有mood去思考嘅時候,會諗吓其他人成日都好擔心我,「有咩打算?仲唔嫁?快啲搵人養趁仲有少少姿色快啲結婚」我真係要咁樣咩?已經係我揀喇喎,我問自己有冇後悔,有冇做錯,呢個世界喺愛情方面無對錯,兩個人嘅事第三者係唔會知道咁多嘅,我的確錯過咗。其實好多人都知道,拍拖好多年,但原來要行到最後係咁困難嘅。其實我覺得如果自己準備好結婚,唔需要你求婚,我根本就會同你講不如結婚咯,我係一個咁樣嘅人。佢有正式求婚,我考慮咗接近一年,結果都係拒絕咗,對嗰件事好內疚。」不結即「分」,分手後冇耐,林遠迎唔只好快有女友,仲好快結埋婚,生埋仔,而佢哋亦好少聯絡。「佢好快已經成為人哋老公,因為佢係屋企唯一一個男丁,其實都會有壓力,長輩當然想佢傳宗接代,快啲結婚,我拒絕咗之後,佢都要再物色嘛。我有少少唔開心係因為佢物色得太快,但我仍然當佢係好朋友,不過已經好少聯絡,因為真係唔方便,無事無幹其實唔需要聯絡對方,有咩事在心中就夠。」

Lulu抗拒結婚生仔,原來係睇到媽媽含辛茹苦湊大佢哋四個,責任太大喇。「因為爸爸媽媽離咗婚,你可以話係我自己攬上身嘅,但係應該㗎嘛。我哋四兄弟姊妹都跟住媽咪,媽媽話,自己三十幾歲帶住你哋四個,你哋三十幾歲仲喺度游手好閒,我做唔到,點解我仲未選擇結婚呢條路,我覺得自己做唔到,我知道自己有咩責任,所以我暫時唔行呢條路,唔係話呢世都唔敢行,但係我想自私啲,想為自己多啲,而亦都未有一個人令我停落嚟。我一諗到自己成為人哋老婆、媽咪,乜都無晒,可唔可以令自己人生快樂少少?可能因為我比較有責任感,但呢一世就只會為責任而活?」

攝錄:黃志明

採訪:肥A


鍾意就快D Share啦!
Related Posts Plugin for WordPress, Blogger...