藝人林峯相隔5年後強勢回歸「娘家」無綫，昨日（17日）舉行名為「Homecoming」記者會，並與星夢娛樂合作，將歌影視全方位啟動，為林峯度身訂造「大Project」，其中之一是將開拍《使徒3》，為其事業再創新高「峯」。
林峯在記者會上正式宣布回歸無綫，獲無綫高層杜之克、何哲圖及余詠珊現身支持。現場播出林峯過去在無綫演出的經典劇集及獲獎片段，大會更隆而重之送上金鑽TVBuddy、金咪及肥媽親自炮製的一壺鮮雞湯，相當窩心。難怪林峯在台上坦言重返「娘家」，令他心情很久未有如此激動過，難以用言語來形容，他更感謝杜之克和何哲圖，讓他將會有一個全新Project，而其中之一就是開拍《使徒行者3》兼演唱主題曲，令觀眾可在其出身地方（無綫）看到好作品。
明年開騷
林峯受訪時坦言離開無綫後，每當經過街上見到有無綫的外景車甚至新聞車，都會上前看看可有認識的同事，很多幕前幕後的同事，都問他何時回來。問到是誰召喚他回巢？他坦言是杜生：「機緣巧合下，杜生搵我，同我傾咗一個Project，我覺得好有興趣。至於Project係乜？詳情之後再公布。」
問到回歸拍劇還是計劃開演唱會？林峯表示：「有計劃喺2020年開演唱會，趁自己仲跳得唱得，你知我演唱會需要好大體力，都要開始儲新歌， 今年會喺內地開巡唱，5月亦會喺澳門開，作為2020年個唱熱身。」
問到重返娘家目標可會是「視帝」？林峯坦言：「唔好嫌我老土，攞獎對我嚟講唔係最睇重嘅嘢，身為演員，寧願自己所演嘅角色令人記住，可以成功塑造更多角色。我係一個需要過戲癮嘅人，始終都拍咗20年戲，一直希望尋求突破同新嘗試。」問到是否想重奪「最受歡迎男歌星」獎？林峯猶豫一刻，莫非「唔想攞」？他笑言：「畀梗係要（酬勞吸引？）呢個當然係其中一個條件， 係友情價、回歸價，因為返娘家真係好開心，好掛住所有同事。」講到以往合作的女主角差不多嫁晒人，要和新一代女藝人合作？林峯表示等無綫安排，最緊要切合到Project角色。
避談婚訊
對於外界傳他結婚，林峯再次強調，若工作上的問題，大家「打橫問」都沒問題，但其他私人問題就不回應。他解釋以往覺得講少少都無傷大雅，但發覺就算只是一小部分都會被放大，甚至被蓋過，對花了不少心血製作一個作品的台前幕後很不公平，所以希望將視線轉回正軌。
杜之克何哲圖力捧做「視帝」
林峯今次得以回歸無綫接「Project」，多得副總經理（節目及製作）杜之克以一個很開心的合理價錢傾成合作，被指功勞最大，杜之克客氣說：「係靠隻古仔、靠個Project，其實關鍵係大家都覺得阿峯係時候做呢件事，我覺得係形勢，應該積極去試吓，我哋就搵咗個Project好啱佢，啲同事都花咗好多心機做咗一個好出色嘅人物，同佢傾咗一次古仔，佢真係覺得係好好時機去做，有好多嘢都要度身訂造。」
至於歌曲方面，星夢娛樂行政總裁何哲圖亦稱：「覺得阿峯把聲好適合演繹我哋嘅電視劇，因為我哋啲主題曲滲透力好強，可以去到全亞洲，而阿峯歌曲演繹非常之好，對劇嘅發揮係一流，佢返嚟TVB合作，加埋杜生嘅電視劇，相信對阿峯係相得益彰，可以幫到阿峯嘅事業再創高峯。」
歌視雙線出擊，能否造就阿峯奪「視帝」及「最受歡迎男歌星」獎？兩高層笑言：「希望可以做到。」而無綫未來發展，亦會安排旗下藝人，拍攝目前最流行的短視頻和短劇，於big big channel內播出，以及發行全球，令到藝人覆蓋面更全面。
楊怡望訓練班同學齊人拍劇
林峯回巢，除了音樂方面大展拳腳，拍劇亦是其重點發展之一。原來阿峯在劇集演出方面，一直有個情意結，希望可以跟當年「第13期訓練班」的同學再度合作！
一眾同學中，阿峯與楊怡、楊明最為老友，感情特別要好，三人不時與張美妮、陳少邦、徐榮、趙永洪、李忠希、傅楚惠等十多名同屆同學相約聚會。早前更齊人為楊怡慶祝生日，席上楊怡與林峯激罕合體，勾起網民集體回憶，惹來哄動，紛紛留言希望「峯怡」再度合作拍劇。
而楊怡對阿峯回巢亦很興奮：「當然開心佢返無綫如果成班訓練班同學一齊拍，就仲開心，因為咁耐以嚟，都未試過齊人拍劇，如果劇本啱，梗係想合作啦，絕對係好期待添呀！
菊梓喬激讚暖男誓𢱑合唱
身為星夢一姐的歌手菊梓喬（Hana）昨日到馬鞍山出席商場活動時，得知林峯將與星夢合作「大Project」，直言欣賞對方很久，希望有機會合唱：「以前有留意佢嘅劇集，好鍾意佢《溏心風暴》、《使徒行者》，配埋啲歌好打動人，我都成日會唱《愛不疚》，佢畀人好溫暖嘅感覺，係太陽系男友！」
肥媽燉雞湯 箍實阿峯
藝人肥媽得聞林峯Homecoming，即大眾阿媽上身，前晚親自燉了雞湯予他滋補一下，好讓阿峯有種「返回娘家」的窩心感覺。肥媽受訪時透露：「阿峯都離開咗一段日子，知佢返嚟， 咁啱我又買咗兩隻雞，一隻燉畀我老公，另一隻咪燉畀阿峯囉！雖然我同佢唔太熟，純粹以一個阿媽心態燉畀佢飲，當係一種支持，等佢知道有人喺背後撐佢，窩心好多！」
|
鍾意就快D Share啦！
|
|
|