劉心悠遭「栢芝」Chur爆獸性大發
馬拉松好手劉心悠日前亮相東網巨星節目《我和星星有個約會》，以背心短裙look化身「網球女神」教粉絲打波兼燒脂，搞到兩位忠粉㷫合合，大膽Chur爆偶像戀事，令她O晒嘴，惟有出動自創金句回應！她全程High爆又超親切，與粉絲「打」成一片！
有三年打網球經驗的劉心悠，雖然未曾參賽，但平日跟教練訓練有素，基本功方面絕對有板有眼，今次她與兩位粉絲「栢芝」及Percy上堂，收起心悠BB式溫柔，嚴師上身逐步教授，上至身體擺動、下至步法也要求仔細，務求做到零瑕疵，令兩位忠粉不敢怠慢！
心悠抵達網球場先伸出友誼之手，與粉絲球拍對球拍進行見面禮，接着帶領二人熱身一輪，便正式啟動「心悠教室」！已香汗淋漓的她傳授三招簡單網球技巧，包括正手接波、反手接波及心悠自創式開波，她笑說：「唔識接波就要執波……唔識反手就會賴嘢！」及後一步步以慢動作指導粉絲，除放下明星身段親身示範，更不厭其煩自己執波，期間「栢芝」未能掌握技巧，她即上前捉住其手仔耐心講解，直至對方成功開波過網，她也忍不住開心大叫！
有姿勢冇實際
眼見粉絲開始學有所成，心悠主動撩PK戰，為遷就粉絲程度，她准許二人夾攻她一個，但兩女似乎只陶醉於偶像開波時的優美姿態，幾個波也接不住，即使球拍掂到波，也未能回過網，最終心悠以大比數勝出，不過為逗粉絲開心，她說：「其實你哋表現唔錯，但係太斯文，唔夠放去撲波，應該要Man啲，依家一齊發出野獸叫聲」
眼濕濕收紀念冊
與粉絲打成一片，膽子變大的「栢芝」單刀直入問心悠：「點解你咁靚？」心悠聞言呆了片刻，「面都紅晒」傻笑說：「因為我唔係地球人，係阿凡達人！」之後繼續被逼供：「咁你幾時拍拖？」心悠即腦筋急轉彎拋出自創金句：「我收埋你哋都唔會知，唔收埋你哋都會知，明唔明？」聽到粉絲一頭霧水，場面搞笑！之後亦有溫情時刻，Percy送上自製漫畫紀念冊，以及一班粉絲以偶像名義捐款的收據，作為心悠本月38歲的生日禮物，氹得她眼濕濕：「好開心呢個世界有人咁鍾意我！好為咗大家我唔離開地球」
粉絲的話
我係「栢芝」，不嬲好欣賞心悠，覺得佢好健康、好可愛，入行咁耐依然保持正面形象，知道佢好鍾意運動，跑咗好多年馬拉松，我嘅願望就係同佢一齊運動，透過做運動見到佢活潑好動一面，過程一定會好開心。
心悠的小Fans「栢芝」
我叫Percy，中一開始已鍾意心悠，佢喺《步步驚心》嘅造型好有古典美，後來從唔同訪問對佢加深了解，佢為人堅強、無畏同有責任心，呢幾樣嘢變成我為人處事嘅要求，一路上佢不斷鼓勵我要以學業為重，到依家我19歲成功考入理想大學，心悠兩個字好似刻咗喺我心入面，佢係我人生導師，不過佢一直鍾意運動，我就冇恒心，希望東網可以畀到機會我同佢一齊去「燒豬」，相信有佢做導師，我會愛上運動。
心悠的小Fans Percy
鳴謝：康樂及文化事務署
|
鍾意就快D Share啦！
|
|
|
