王喜一丁友搭枱食飯，食完就坐喺度撳電話hea時間，睇落好dry好寂寞喎！佢而家貴為電視台高層，喺奇妙電視做創作總監，同事間自然有啲距離㗎喇。何況，據聞佢份人比較直腸直肚，講嘢唔識轉彎抹角，真係唔係人人鍾意聽㗎嘛！唔係亂吹，而係佢老友陳志雲講嘅：「不過王喜嘅長處亦係咁樣，佢嘅長處就係唔會因為你係佢嘅朋友，因為有啲說話覺得你唔啱聽，佢就唔講，其實我亦都好喜歡朋友係咁樣。」
正所謂崩口人忌崩口碗，王喜未出道仲係做緊警察，喺商台兼職開咪時，已經因為講啲好出位嘅嘢，令商台被罰款。之後入到TVB，對住上司陳志雲，佢把口一樣唔客氣，陳志雲舉個例：「好簡單，我出咗一輯新廣告，當然會喺群組俾大家睇啦，
你估佢俾咩意見？佢話：『我覺得個廣告拍到你老態龍鍾。』
我睇完之後，如果唔係咁熟嘅話隨時會扯火，你知我最唔鍾意就係人哋話我老態龍鍾。即係崩口人忌崩口碗，使唔使坦白到咁吖？縱然我係老態龍鍾。
各位，如果你哋有咩禁忌同人相處，千祈唔好做呢件事，
王喜係一個好好嘅反面教材。」
王喜以前做演員對住上司講嘢都咁直接，而家係高層應該都有唔少意見畀返啲細，如果一齊lunch，自然有壓力。所以，王喜單拖食飯唔出奇，之後又去行咗陣超市，期間仲兩部電話一齊用，係咁whatsapp錄音，做高層真係唔容易。
來源 source: http://nextplus.nextmedia.com
|
鍾意就快D Share啦！
|
|
|