自從15年同施祖男分手之後，邵美琪一直單身，但佢並非冇追求者，而係想留多啲時間照顧媽咪啫。
依家熱播嘅《倚天屠龍記》，網民大讚劇中許雅婷係最索小昭。其實當年邵美琪飾演嘅小昭，同樣被大讚至索。雖然佢現已54歲，但仍然keep得好好。
由於佢拍落少大台劇都喺大陸播出，喺內地有人氣，近年主要拍大陸劇吸金。
加上早年性感代言纖體廣告，半裸示人索到啪啪聲，迷倒唔少大陸追求者，不過邵美琪全部唔啱心水，寧願單身。
近期難得留港，佢親自照顧媽咪。早前兩母女去完街之後，佢同工人夾手夾腳送媽咪上車。由於驚媽咪撞親個頭，佢好保護佢個頭，然後自己揸車送媽咪返屋企。
邵美琪珍惜同媽咪一齊嘅時間，全因細個嗰陣，爸爸行船，媽媽又要出外工作，佢係獨女，成日得自己一個，形成比較孤僻嘅性格。
佢一直唔識表達有幾愛媽咪，仲話以前唔會同媽咪講：「好掛住你，好愛你！」但近年見到好多天災，心態唔同咗，覺得想講就要講，所以會成日攬住媽咪。
至於男朋友，佢好自信咁話：「大把睇你要唔要。」仲話唔怕冇男朋友錫自己，而係怕自己太錫人哋。佢一向識得照顧自己，唔使人哋照顧一生喎！
來源 source: http://nextplus.nextmedia.com
|
鍾意就快D Share啦！
|
|
|
