梁振英無得做特首後，變身鍵盤戰士不停發炮，早前就以日日統計《蘋果》廣告數量過日晨，變相幫《蘋果》谷咗一輪廣告後，卻對社會鬧得熱哄哄嘅「送中」條例一直絕口不提。直到特首林鄭日前公開就硬推「送中」惡法發聲明致歉後，689今朝終於喺Fb發帖評論事件，其間疑似向林鄭「踩多腳」，直指修訂《逃犯條例》引起嘅風波，「重創香港在國外的聲譽」，難得同民主派陣營，連成一線。
咁不在其位卻意見多多嘅689，有乜好橋幫到香港呢？佢話喎，對外嘅解釋說明工作，不能僅靠中國駐外嘅使領館，不能單靠「力量單薄的」香港特區經貿辦事處，更不能靠外國傳媒，佢建議香港各大商會馬上組團連續出訪，話各商會喺特區政府作出讓步後接受修改方案，對整件事嘅來龍去脈最為清楚，所以最有發言權喎。八方唔知有幾多個商會會理呢位過氣特首意見，只知道唔少「梁粉」都覺得689點會唔知翻閹無望？咁活躍都係刷存在感。
又咁講，雖然佢嘅UGL醜聞案係喺林鄭任內決定不作起訴，但林鄭當年做CS時點樣「對待」呢位特首，相信689本人最清楚。而適逢同類近傘運事件嘅創傷重演，當年有份挑起傘運嘅689，又點會唔抓緊機會，扮威武咁幫忙收拾殘局？
翻查梁振英6月7日起嘅fb發文，除每日數《蘋果日報》有幾多廣告外，6月8日凌晨就發文講黃台仰及李東昇獲德國庇護一事，6.12早上轉載《明報》一篇題為「《紐時》反猶風波 停登政治漫畫」嘅報道，留言「這種言論自由，我們可以學嗎？」6.13佢話自己去深圳交流，而6.16、6.17兩日，200萬人大遊行前後，佢都只係數《蘋果日報》廣告數量。6月8日梁振英曾經喺香港出席過公開活動，致辭嗰陣都冇提及《逃犯條例》修訂，離場時亦冇回答記者提問。
-----------------------------
你撐蘋果 我捐$1
支援反送中抗爭者
請往《蘋果日報》網站了解更多
|
鍾意就快D Share啦！
|
|
|