馬上成為壹會員
會員專區 只限會員閱讀
14歲入行嘅裕美，就快31歲，眨吓眼已經入行17年，事業上面未有好大嘅突破，21歲時試過抑鬱兼厭食，差啲吞200粒安眠藥自殺！蓋世寶在訪問中問她：「咁多年都有情緒病，係遺傳定係其他原因？」裕美答：「第一次有抑鬱症係廿一歲，可能因為好年輕就走紅，可能不斷有好多廣告，好幸運，走紅得好快，但可能年輕，所以唔懂得去管理、面對，所以就崩潰同迷失自己。當然不斷有工作係一種福氣，但慢慢覺得自己好似一個機械人，講一句對白，要笑就笑，要喊就喊，就只會照住做。點解開始發覺自己有問題呢？以前都係保母車接送，其實都無咩私人時間，會突然對住個窗喊，有種空虛，心裡面好似有個空洞、深淵，完全覺得好迷失，就算身邊有人陪住都好似就嚟抖唔到氣，遇溺咁樣，好似俾海水淹沒自己咁樣。開始覺得頂唔順，開始喊、喺屋企打牆、𠝹手、喪叫，當我第二日上台面對觀眾，就好似開關制咁樣，會好正常繼續笑。」
知道問題所在，之後就尋求治療？裕美答：「係呀，差啲都真係自殺離開，但都感恩自己有信仰，之後都起起伏伏。當年婚姻出現問題，情緒都未有好大問題，只係上年又有少少復發，到今日仍然要食藥，但相比廿一歲，因為已經有經驗，知道自己去到咩嘢狀況。」其實你都仍然好年輕，只係相比廿一歲時大咗十年。「都係嘅。」當年點樣自殺？她說：「當年買咗二百粒安眠藥自殺。當時我用安眠藥自殺，其實當年我一直有食安眠藥，原因係半年都無瞓過覺，身體係完全疲倦到一個點，啲筋扯到硬晒，但係一合埋眼個腦就不停轉，有好多嘢諗，完全停唔到，諗嘅嘢未必有意思，畫面、影像咩嘢都有。然後個腦停唔到，瞓唔到，慢慢一食嘢就會嘔番出嚟，係完全食唔到嘢。當年閉關嘅時候好瘦，個頭仲係圓圓哋，但身型好似一碌竹咁樣，而家都算有番啲肉地，嗰時係無前又無後，著褲都會跌落嚟。」即係有埋厭食症？「係呀，有啲厭食症，其實知道自己要食嘢，但係完全食唔到，每日擘大眼都覺得呢個社會只得黑白色，一啲光彩都無，同埋唔開心。唔想同媽媽講呢個問題，所以由工作開始已經自己一個搬出嚟，所以發癲都無人知。嗰時真係好辛苦，因為最初睇精神科時，醫生開嘅藥仲係有用，食完之後都平靜同瞓到嘅，但慢慢無反應，甚至愈食愈多，情況都係一樣，同埋開始瞓唔到覺，食兩粒安眠藥都瞓唔到，之後食三粒都係瞓唔到，其實已經超出醫生叫我食嘅分量。之後安排好一切，買咗安眠藥，其實嗰一日決定咗自殺，不過就係高皓正寫水果歌嗰段時間，佢又係一位基督徒，但我其實對宗教好抗拒，唔知點解嗰一刻聽到把聲叫我祈禱，但係另一把聲就叫我去死，好似打交咁樣。之後我就嘗試祈禱，然後食藥，因為我覺得做晒兩樣嘢，咁就死得眼閉。我將樽藥擺喺床頭，重溫番自己廿一年嚟嘅經過。」
蓋世寶有點吃驚，問：「食晒二百粒？」裕美很直接答：「係呀，仲要係拆晒出嚟放喺樽入面，特登喺十蚊店買個樽返嚟，就係為咗擺嗰二百粒藥。但係嗰日回想番人生階段時，唔知幾時開始，我直情斷片到第二日，但我係無食到嗰啲藥。但問題係，我半年嚟無瞓過覺，完全少少眼瞓跡象都無，而且由細到大都會發噩夢，每一日都發，唔係俾人追殺，就係遇溺，或者喺夢中見鬼，由細到大都會發生，尤其是瞓晏覺會更厲害。但係嗰次斷片瞓嗰一覺，係我人生無試過咁開心嘅夢，我見到一對對動物，我好鍾意動物，大笨象、長頸鹿、狗仔，喺夢裡面仲好似見到耶穌。當我擘大眼嘅時候，心裡面有一股暖流，好溫暖嘅感覺出現咗，嗰種溫暖好似人生都無咩試過，其次就係我剛才話心裡面有空洞感覺，成日會喊，就會有好多工作，賺好多錢，感覺都好迷失，呢種感覺好似突然被啲溫暖感填滿咗，然後就無咗自殺念頭，但都唔代表我即刻好番，我都係慢慢開始跟人返教會，之後我就打電話俾高皓正，話俾佢知經歷過呢啲事情。因為本身其實都好硬頸，唔係你叫我信我就會信。同埋你叫我寄托，有種認輸感覺，有少少好勝，雖然我個樣唔係好似，但有啲似媽媽，都係比較硬頸、固執，有時候好硬繃繃，無論如何都要堅持。大概三個月左右，我竟然好番，不過都唔係突然間好番嘅，之後都係突然間想撼頭埋牆，我就會話神啊救我，然後就撼埋牆，根本唔會講到嘢，因為嗰種衝動，係兩個男人都控制唔到我，當我發癲嘅時候，會癲得好緊要，直情可以將對方推跌。會好似過山車咁樣，有時會好快跌落谷底，慢慢就好番。最初我以為自己以後都會好番，但事後有時候又會復發，但至少我知道自己情況，即係自己衡量到去到咩嘢程度，一定要搵方法抒緩一下，因為最差嘅情況都已經過去咗，所以話人生經驗好緊要。當你已經面對過最負面嘅新聞，亦都經歷過情緒最低落嘅時候，之後再遇到咩嘢情況都無問題，大概知道應該要點樣做。」
攝錄：王志明、吳斯金
策劃：肥A
蓋世寶化妝及髮型：Albee（嫁妝）
立即下載APP，精彩內容壹手掌握
如對會員訂閱制有遇到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|
