連登仔認做契媽
「連登(網上討論區)幾多人話不如認毛姨姨做契媽，我回覆咗佢地話：我好樂意做你地契媽！洗唔洗封埋利是先？」立法會議員毛孟靜接受壹週刊訪問時笑稱，她認為自己與香港人風雨同路這麼多年，看到現時的年輕人願意比上一代做多少少的時候，幫不到忙也不要緊，至少不要去打壓及反對他們。
香港在這一個多月的反送中運動上，大部分都沒有主辦單位，俗稱「冇大台」，基本上都是靠網上討論區「連登」自發號召民眾以及用社交媒體通訊軟件「Telegram」作互通消息。這次運動中可以見到，很多年輕人主動放棄高床暖枕，選擇走出街頭抗爭，甚至以勇武的姿態走在最前線，身為民主派領袖的毛孟靜多次在公開場中表示民主派並不會與示威者「割蓆」，究竟「不割蓆」的象徵意義是甚麼？
「我哋民主派會議嘅感覺就係以前動不動就即刻跳出嚟「割蓆」，係好傷人心嘅。我自己好清晰記得2016年年三十晚旺角嘅事，當年因為我要去英國奔喪，一落機就已經見到出晒聲明話譴責暴力之類，係完全割切，我就心諗唔洗咁快割蓆掛，係咪真係一兩粒魚蛋會激到咁嬲呢？」毛孟靜認為香港的上一代人在爭取民主的道路上明顯做得不足，才導致時下的年輕人要選擇用豁出去的態度方式抗爭。她又表示假若民主派再動不動就「割蓆」，香港就不單是兩分及三分，而會變成四分五裂的。
冇大台議員何去何從？
一連串的反送中運動都由市民自發舉行，那麼民主派議員在今次的反送中運動裡，是擔任着一個甚麼角色呢？毛孟靜：「我地就好開心有年輕嘅猛男議員就係前線一路幫住睇住啲好年輕嘅示威者，有啲真係睇落非常年輕，十幾歲。大台本身係唔會俾你睇到嘅，其實我睇得出佢地(示威者)背後係有組織的，咁係咪冇大台就「散修修」呢？咁又唔一定，但係好多人都誤會就係佢地所謂武力升級，就即刻係會「割切」，連紐約時報都報導咗依個錯誤嘅想法，係七月一號，一見到咁多年輕人衝咗入立法會，就話會分化香港依一場運動，因為好明顯香港以前一直都係和平遊行的，一個玻璃樽也不容打爛的，但依家就咁樣衝咗入立法會，嚇死人啦實分化啦。但大家依家睇到，有冇分化呢？是沒有的。」雖然今次反送中運動基本上都沒有大台，但亦有人批評今次整個運動最大敗筆就是欠缺一個民主領袖，毛孟靜則不太認同這個說法，她認為如果仍然有個領袖，政府就會立即以任何理由去打壓那位民主領袖，就等同於當年才剛剛冒起的梁天琦，那種打壓是一浪接一浪的。
「又喺TVB」
至於談及最近自己和TVB記者的矛盾衝突時，毛孟靜就好心平氣和地敍述自己三次和TVB記者的恩怨情仇。
「第一次係TVB問話我地出埋嗰啲聲明，好似係連儂牆，問擔唔擔心俾人覺得我係慫恿或者認可依一啲非法嘅行為？我就心諗依啲咁似大公文匯嗰種調返轉頭嘅講法，我當時就好隨意咁問：你邊度？佢就話TVB，我就話：哦，唔怪得。」
「然後第二次我都冇特別講，個問法就係話連儂牆越多，就越多民眾同民眾之間嘅衝突，咁不如唔好搞咁多，佢呢個就比較問得婉轉啲，意思其實都係一樣，姐係你驚就唔好出街，戒嚴咁囉，好似講到出面好危險咁，唔出街就最安全。我都係藐藐地，但呢個記者我係識得嘅，所以我唔會特登走去問佢，但我都好似吟吟沉沉講過話TVB呀可？」
「第三次就係嗰問到，你聽清楚佢點問，佢講咗兩次係「你自己點睇？」，我覺得佢係衝着我而來，我就覺得呢個係非常不適合(嘅問題)，我哋講明係一個民主派會議嘅記者會，佢嘅意思就係話示威者打警察，我呢個人自己有咩感覺，意思就係你連咁樣都唔出聲明？唔譴責？當時又係感覺到咁似文匯大公嘅？但我真係唔識得依個記者，但係都唔想又再問你係邊位，就算數，因為仲有其他記者問其他問題。」
當記者會完了，毛孟靜突然心血來潮就問那位記者他是來自哪一間傳媒機構，那位記者就好像很猶豫地說：TVB，毛孟靜就隨即拍檯。
「因為我一路係到答嗰陣個腦一路係到Stir緊，依一類嘅問題，你唔見NOWTV有問，你唔見CABLE有問，或者任何其他報館，點解次次都係TVB？依個係我完全一個根深蒂固嘅感情講出嚟嘅說話，我又唔覺得有咩咒罵嘅成份，亦都冇話針對邊個人，事實係每一次都係依個招牌囉。」
毛孟靜亦提及到這一個月來的反送中運動，市民要求高官下台的聲音日漸發酵，但無論是行政長官、警務處署長、律政司司長及保安局局長，到現時為止都沒有一個引咎辭職，毛孟靜認為香港的問責制已經是完全地名存實亡。
「2003年反嗰廿三條，搞到完全係烏煙瘴氣，董建華自己都知，你見到好多人係排住隊下台，包括葉劉話佢自己去咗外國讀書。但依家林鄭卻係完全若無其事行出嚟，仍然擺出一個女強人嘅姿態。」毛孟靜又指出她很懷疑將來歷史會如何記載林鄭月娥這個人。
採訪：曾港深
攝影：林金展
|
鍾意就快D Share啦！
|
|
|