香港陷入混沌狀態，年輕人感絕望。合和實業主席胡應湘上周接受訪問，不欲多談政治，惟土地供應問題他過去20年向歷任特首進諫均不得要領。社會躁動不安，他認為是財富集中於政府及地產商之過。歷史上法國大革命、俄國十月革命經驗，沒有國家及城市可以安然度過。他希望香港社會能夠同意大型填海，興建公屋，來一次財富轉移，生活成本降低，香港才有希望。
這位見盡香港潮起潮落，波譎雲詭香港時代的老人，今年已經83歲，自嘲香港填海成功後都已經「蒙主寵召」，作為第三代香港人，希望下一代能安居樂業，將土地歸還香港人。
胡應湘今年將上市公司合和實業私有化後，首次接受《蘋果》專訪談到香港大勢。本報記者一行人上周四到達灣仔合和中心64樓辦公室，途經前執董胡文新房間時，門外名字已經遮上，不過未礙父親與記者談笑風生。
警惕法國大革命重演
胡應湘年少時曾經在美國普林斯頓大學讀土木工程，見盡當時稀世的摩天大廈及渡海大橋，帶給他宏觀視野，正如他閱讀香港問題時也從世界歷史角度看，形容財富傾斜至政府及發展商，屬社會問題主因。1789年法國大革命，1917年俄國十月革命，最終揭竿起義，「太多財富集中在太少人身上，冇一個地方會好，可能演變成暴動添。」
香港這一代正正有這特徵，「以前你揸勞斯萊斯，啲人會覺得有機會我都想買，依家淨係仇視，呢個係共產主義。」胡應湘說：「好多人俾租樓、供樓壓到不得了，資金去咗邊？第一係政府，盈餘5萬美元1個人；第二係地產商，包括阿叔在內，好公道。」
土木工程系出身的胡應湘打開地圖，提出填海改變香港命運。政府推明日大嶼計劃，背後有董建華旗下團結香港基金發功，不過胡應湘野心較政府更大，希望為香港以1,000萬人口規劃增加土地，「等於屋企請食飯，唔知有幾多親戚嚟，我擺定張12人枱就冇事。」
填海改變香港命運
對於大型基建情有獨鍾的他，提到香港人均居住面積僅173呎，僅好過第三世界國家孟加拉。胡應湘認為250至300呎對香港較高人均收入才合理，「傢俬都靚啲，電視都大啲」，故此採取1,000萬人規劃較為合適。
作為政府推行明日大嶼背後一位重要推動者，形容東大嶼是「寶藏」，除了是水淺得5米至10米；附近芝麻灣山頭可以供應填料；地理位置鄰近中環、尖沙咀，可以鐵路連接；海堤只要興建得夠寬，往後填海則未必有額外開支；至於白海豚生存危機，他笑說：「如果你放泥落海，白海豚唔識走，嗰條係蠢嘅白海豚，唔見咗你都唔會可惜。」
胡應湘指着窗外，「百幾年前灣仔都係填海，呢度同春園街都係填出嚟，我阿爺，我老豆，又唔見環境唔好？」至於東大嶼起多少公屋，他認為須由政府決定，「我唔係共產黨，但土地屬於人民，你唔可以要人民同你買（貴）地！香港人住得咁密，如果唔搞公屋唔掂」，胡應湘斬釘截鐵。
「250呎至300呎居住環境，唔係苛求。」胡應湘以自己跟老婆郭秀萍生活做例子，「（後生仔）佢未舒服過，我住過豪宅超過1萬呎，不知幾安心，畀老婆吟兩下就去第二間房，你叫我住300呎就......」
百億闊佬曾住徙置區
胡應湘身邊老友不少「金童玉女」想結婚，高尚職業無不良嗜好，不過都嘆他們上樓不容易，「劏房咁大都要幾百萬，政府有責任解決，我成日提：地價作祟，畀返自己建築費係天公地道，地價就唔係。」香港年輕人須有低成本居住環境，才有機會往上游，「香港好多百億闊佬，有啲以前住徙置區，有屋住，呢啲叫upward mobility。」
不過，香港政府推出「送中」條例引爆政治風暴後，明日大嶼撥款亦勢將暫緩，而本身這項極具爭議性的政策有可能難以推行，「地冇多到，人多咗，啲嘢只有貴，樓價只會夾上，好多人唔係想買樓住，而係今年唔買，明年仲貴。」
胡應湘希望民眾及政府可以合作，「如果收返嚟嘅薪水，大部份畀咗租金，同埋成日顧住買樓，點會有穩定前途？」他又婉惜年輕人認為填海是益發展商及商賈，「我83歲，填得嚟都見到訃聞，蒙主寵召，我係香港第三代，（提填海）係為咗香港人。」
至於是否贊成積極使用《收回土地條例》，他直言不少發展商帶頭反對，怕影響在新界土地利益，「我提過呢個觀點（行使《收回土地條例》），比行家鬧我，話我好似共產黨，但我係盡我對香港責任。我又唔係要名，唔係要利，我夠皮架喇。」
記者：周家誠 陳東陽 李海澄
攝影：譚德潤
影片：
採訪：周家誠 陳東陽 李海澄 余曉芸
編撰、旁白：余曉芸
攝影：Season、Gary
剪接、後期：許碩允、余曉芸
編導：許碩允
investMAN
For People of Style & Substance
掌握理財智慧 感受生活品味
http://facebook.com/investMAN.hk
| 胡應湘以史為鑑，指財富過份傾斜令社會不穩，若然香港大規模填海、廣建公屋，就可以令年輕人安居，得到向上爬的機會。（譚德潤攝） | |
|
鍾意就快D Share啦！
|
|
|
