【孔劉好暖】《82年生的金智英》做人老竇嘅請入場
為孔劉而入場，其實「金智英」就係女主角鄭裕美，入場前已知孔劉戲份唔多，唔緊要，有佢就好。電影改編自狂銷100+萬冊嘅韓國爭議性得獎小說，探討韓國女性生活的《82年生的金智英》。小說好黐線，一推出「金智英」三字成為熱話，甚至轟動韓國社會，女團少女時代成員秀英及Red Velvet隊長Irene曾公開表示自己是讀者後，引起大批男Fans不滿，怒稱兩人是女權主義者，甚至要燒佢哋相片洩憤，無嘢呀嘛!(剛上映)
撰文:廖思慧
金智英(鄭裕美飾)家有一個姐姐同細佬，自細讀書成績非常好，搵到份好工，但因為身份問題，做女人要嫁要生仔，公司高層認為畀你升到好高職位都無用，然後無視你嘅努力，二揀一特訓都揀個渣過你嘅，唔抵?係㗎。咁點?無㗎，一係默默妥協，一係好嬲咁妥協。
睇到個心實晒
嫁咗畀垈賢(孔劉飾)嘅智英，生咗個女，生活看似好快樂，但佢唔只滿肚鬱悶，係鬱到個人都病埋，病到點，病到好似鬼上身咁，突然變咗另一個人，嚇親孔劉，仲嚇到佢媽媽好內疚。電影仲有好多職場及家庭嘅不公平現象，如衰格男同事對女同事嘅言語歧視，家庭重男輕女傳統思想等等，女人唔易做，做人新抱更陰功，全片最有印象有兩Part，第一係金智英變成外婆同媽媽講心底話，極級催淚，另外就係戲中奶奶刻薄新抱，其實自己當年都被欺壓，幾十年後點解要做當年自己討厭嘅事?最後，孔劉角色好暖，佢一喊好想抱住。鄭裕美好靚，好想同佢講句加油。
來源 source: http://hd.stheadline.com
|
鍾意就快D Share啦！
|
|
|