入行逾50年的「粵曲王子」鄭錦昌，在1972年唱作《唐山大兄》歌頌李小龍，紅遍東南亞，擅寫廣東歌詞的他又唱作《十一哥》、《鴛鴦江》等名曲。鄭錦昌自前年在香港舉行告別演唱會後，正式退休，返回馬來西亞居住。昨日有消息指鄭錦昌昨早在馬來西亞家中辭世，享年77歲。其家人將於下周一在馬來西亞為鄭錦昌設靈，同日出殯。
| | | |
翻版碟贈李小龍
鄭錦昌的《唐山大兄》至今仍為人津津樂道，他曾接受《蘋果》訪問說：「當年睇完《唐山大兄》，覺得李小龍功夫好厲害，於是就照住劇情寫咗呢首歌嚟讚美佢。有次佢上《歡樂今宵》咁啱聽到，佢好鍾意，即刻搵人約我去半島酒店飲茶，但我因為做嘢去唔到。一個月後，我哋先至喺以前無綫木人巷碰面，佢好friendly，又握手又攬，跟住佢仲同我講：『錦昌哥，試吓打我個肚，大力啲！』第一次見面就好似識咗好耐嘅朋友。」
鄭錦昌又指：「後來李小龍又叫我送唱片畀佢，但我醒起《唐山大兄》隻黑膠碟原裝正版封面係冇佢張相，但翻版碟有，所以我就送咗幾張翻版碟畀佢，諗番起真係好好笑！」 之後鄭錦昌為《歡樂今宵》五周年台慶獻唱時，李小龍突然從一個大生日蛋糕內跳出來，兩人更同台表演。
採訪：陳杰、嵐山
|
鍾意就快D Share啦！
|
|
|
