「從今以後，無論是順境或是逆境、富裕或貧窮、健康或疾病、快樂或憂愁，我將永遠愛著您。」堅守婚姻誓詞，從考驗中得到認証。
10月前，仍是無綫新聞娛樂台主播的林子博，面對太太Shirley患上罕見癌症(平滑肌肉廇(腹腔)第4期，並有擴散跡象。邊工作邊照顧一對子女及患病妻，身心皆疲，十月又接到效力11年的TVB無情雞，雪上加霜。2019香港人經歷不一樣下半年，同樣也是林子博夫婦共患難開始。
不獲大台續約，心煩的他首要顧慮，是患病Shirley的感受。:「其實同佢講嗰一刻真係要交戲，我已經諗定「唔使擔心㗎……」之後嘅對白，例如話已經有人搵我做freelance。」想好的安慰台詞，用得著嗎？
林子博:「用唔着！點會用得着？你諗吓，佢九月無咗份工，我十月無咗份工。佢已經無糧出，然後輪到我話俾佢聽無收入，佢作為一個病人，仲要唔係普通病，面對好多不同嘅醫療開支，我哋仲要唔係自置居所，一家只係租樓住，有好多嘢需要即刻去諗、去面對。所以嗰刻我講咩都無用，佢都唔會聽入耳，喊得好厲害。」
太太Shirley:「實在好突然，因為唔會諗到呢個咁困難嘅時候(患病)，仲會出現更差嘅情況，我覺得唔會咁絕啩！ 所以情緒有點崩潰。覺得點解要咁樣對我哋？點解咁無情？」
由確診、到情緒崩潰、冷靜下來的Shirley，要由一個女強人的獨立性情，學習接受依靠。「最初確診時，仲傻到問醫生可唔可以繼續返工？因為做完化療之後，仲覺得自己撐得住，一直覺得自己會好番，唔會倒下，因為我係一個事業心比較重嘅人，經常覺得自己只會贏唔會輸，但當過多一兩個月，因為見到副作用，信心開始下滑。當時成日覺得好唔抵，因為確診前啱啱升職，三月升職，四月就確診，覺得人生點解會咁樣？上天好似玩緊自己。不過依家學到接受現實，想唔接受都唔得啦，因為更大嘅事情都可以發生喺自己身上。我淨係覺得2019年係好難過嘅一年，只想快啲過咗呢一年，唔好再有咁大起伏。」
從前由家中經濟到照料孩子，兩公婆一起分擔，如今萬事獨力撐起。林子博:「因為太太化療副作用好厲害，首先唔可以落街買餸，唔可以接觸太多人，佢好虛弱，行兩步已經好易攰，所以所有家務由我處理。每日兼顧工作，然後買餸煮飯、洗碗，掃地拖地、安排小朋友沖涼，然後就瞓覺。其實都唔係瞓得好好，每日嘅精神狀態都係發呆。當我可以停落嚟嘅時候，除咗身體疲倦之外，精神狀態都好攰。」 丈夫的付出，改變Shirley的不安感。「我以前好傻，會諗如果自己有事，老公會走咗去唔理自己，成日覺得如果有事嘅話，會變成一個負累，對家庭係一個負累。如今連家務都要依靠老公，我仲可以點樣？
呢段日子睇到佢就算幾疲倦，返到屋企對住我哋仍然充滿正能量。」
「其實我有冧過。」太太眼中的正能量，林子博說。
患難當前，性格如何樂觀，都有撐不住的時候。林子博:「有一次幫老婆準備注射升白針，準備嘅時候，老婆發現我喺度發呆，問我係咪覺得佢好煩，佢當時係喊住咁問，嗰刻我好似俾佢問醒咗咁，我話：『唔係，只係突然有啲嘢諗啫。』嗰一刻開始，我要話俾自己聽，我要保持自己精神狀態，唔好將負能量帶返屋企，影響太太。」 女強人倒下，自尊使然，甚麼都變得敏感。「係，對身邊人嘅反應，都變得好敏感，我知道佢其實好驚，唔敢對我有咩投訴，我知道佢有時會好激氣，有時我係試緊佢嘅心態，睇吓佢嘅底線去到邊，因為我內心其實好想佢將情緒表達出嚟，唔好隱藏。」
Shirley:「係，因為我好怕帶俾人麻煩，唔想帶俾老公麻煩。」 林子博:「其實佢有心痛我，佢睇到我所做嘅一切，只係佢控制唔到自己脾氣，因為畢竟佢係一個病人。
我曾經試過喺屋企喊，原因係對住佢發咗脾氣，我好後悔。當時反而係佢入嚟廚房同我講對唔住，嗰一刻我鬧自己，然後忍唔住喊，怪責自己點解唔可以好好控制情緒，怪責自己點解為好少嘅事就嗌交，例如我全力照顧太太嘅時候，無人照顧小朋友，當然就要買一啲即食食物，食完可以即刻返學，我就唔需要好大工程，去煮一個早餐、午餐或者晚飯。當時我買咗啲廚師腸、火腿、燒賣、餃子同埋肉丸，但嗰啲食物對一個病患者嚟講，會覺得係好唔健康。我買咗好多返屋企，然後佢就話知唔知好唔健康，又不停鬧我。喺我最攰，為屋企做最多嘢，精神狀態最差嘅時候，我感到自己嘅付出好似係白費，於是我發脾氣鬧翻佢。」
夫妻關係，在這一課堂突破。Shirley:「有時我會諗，自己嘅麻煩程度究竟去到邊呢？究竟佢嘅接受程度有幾多呢？因為我唔想帶俾佢麻煩。
嗰日可能已經係佢嘅底線，佢已經頂唔住，到嗰個位我知道唔可以再係咁樣，因為再落去真係佢真係會爆煲，所以我都同佢講sorry。亦希望佢諒解我，要承受心靈同身體嘅痛苦，真係好辛苦。嗰啲副作用令我身體又痛，頸至肩膊皮膚潰爛，仲有便秘之餘又食唔到嘢，同時又好擔心自己體重不斷下降，因為一個月跌咗七磅，跟住就好驚下個月會唔會又跌七磅，好恐怖。」 她，也在意對方能否接納自己的病容。「我覺得自己好肉酸，因為化療令我頭髮、眼眉同眼捷毛都甩晒，如果我無畫眉嘅話，就會好似睇電影嗰啲癌症病人咁樣。」但丈夫從無嫌棄，這點其實Shirley知道。
「過往好多人眼中，都覺得我老公好愛我，但喺我心目中，都係有我自己嘅憂慮，成日都會諗，會唔會大難臨頭各自飛？到而家我就覺得唔會囉！」
林子博聽罷，好大反應:「其實我都係咁樣諗，即係如果病嗰個係我，，我都會好擔心，我會比你更擔心。」因他眼中，太太是悲觀者，如遇問題，不懂向好的方向安慰自己，安慰人。
這場病，反而拆掉Shirley不安的牆垣。「覺得今次真係令我睇真咗好多，原來我哋之間嘅關係好穩陣，係咪呀老公！」 擺在眼前，還有另一難關。
Shirley:「另一個困擾嘅就係經濟問題，因為最初三個月我係睇私家醫生，當緊急出現問題時，醫生叫你做咩都會照做，唔會睇錢，嗰段時間淨係覺得延續生命為重。但唔睇錢嘅話，經濟又未必應付到。最初個幾月，我已經入咗四次醫院，嗰段時間加埋醫療費使咗廿幾年，當保險未索償到，但又要不斷使錢，人開始擔心，個幾月已經使咗廿幾萬，再過多個幾月咪要五十萬，再落去就負擔唔到，當時政府醫院又未收我，咁點算！」
病，睇到人情冷暖。
Shirley續說:「有病嘅時候，其實睇到好多真實嘅事情，睇清楚人情冷暖，邊個對自己最好睇得最清楚。我試過搵朋友幫手，但原來平日話好姊妹，會點樣幫你嘅朋友，到嗰個時候竟然係會離棄你，原來病咗之後會變成咁樣，嗰個打擊對我非常大。」
反而丈夫在無情的公司，遇上有情的圈中人。
林子博:「太太經常同我講，佢喺呢個時候先至睇到人性，知道咩嘢人先至係對佢好，佢話無諗過絕大部分係嚟自我呢一邊。
如汪阿姐特登攞盒月餅嚟慰問我，家燕姐又主動搵我，話小朋友如果想學嘢，等佢哋唔好唔開心，就嚟佢學校(家燕媽媽)，佢贊助佢哋。張慧儀亦問我有咩可以幫手，到最後搵咗獅子會，佢以中間人身份介紹，希望幫我太太籌款。
演藝人協會亦好快聯絡我，話古生(古天樂)叫我聯絡你，睇吓有咩可以幫助，其實已經覺得好好。」送暖的還有劉德華介紹醫生、張衛健 鄭秀文慰問、梁漢人送上靈芝、高皓正介紹工作，部分的圈中人，其實過往跟他只是點頭之 家庭生變，一對分別14歲的女兒及10歲兒子，一夜間變得成熟懂事。成年人也有深切領悟。林子博說:「做人要有居安思危，意思唔係要做一個好有計劃嘅人，因為就算有幾好計劃都無用，任何情況都可以破壞你嘅計劃。只係當有突如其來嘅事情發生時，心態上有最壞打算，應該退到邊一步，令自己可以好過啲，你知唔知我係有諗過，甚至唔單只諗過，直情有同老婆講，而家連工作都無埋，仲可以做咩嘢兼職，如果連兼職都冇，到最後大不了咪申請綜援，呢個香港有綜援㗎嘛！
我成日覺得人生係一個遊戲，只不過遊戲過程會遇到好多高高低低同挫折，有贏有輸嘅情況，睇你喺遊戲中點樣享受過程，包括就算有病都好，都去感受吓身邊事物，感受吓有冇人去愛你，有咩得失，人生根本就係一個歷煉，我覺得自己可以敲經念佛，好似好厲害，但呢個都係事實。」 至於Shirley，在重擔中學了看輕。「最初三個月係自己人生最低潮，因為我唔想見人，只係困喺屋企，淨係識得上網搵自己個病嘅資料，睇吓自己仲有幾耐命？仲有冇得醫？但當你搵咗幾個月，發覺咩嘢資料都無，想搵個同路人都無，然後就諗究竟仲有幾耐命？下個月仲喺唔喺度呢？仲可以相處幾耐？開始珍惜一齊嘅時候，其他感覺都放下，唔再重要。」 柳暗花明，Shirley近日獲轉介，到公立醫院診治；子博的工作機會接踵而來。
Shirle:「九月檢查完，醫生話腫瘤無變大亦無變細，喺佢哋嘅角度代表已經受控制，因為我呢個病唔會醫得好，腫瘤唔會消失，我只係希望佢乖乖哋，同佢共存。
我真係好多謝佢(丈夫)，多謝佢嘅愛，感恩遇到佢，因為無事無幹係睇唔到任何嘢，我覺得自己已經好幸福，喺人海中搵到一個咁愛自己嘅人係好困難，所以我要努力為呢個家生存。」此刻，Shirley落流。
不離不棄，因為婚姻就是一個承諾，林子博:「喺呢件事，佢(太太)覺得我好愛佢，其實一個家庭就應該係咁樣，由認識第一天，直至結婚都已經預咗，宣誓時有講過㗎嘛，要照顧對方一生一世，無論生老病死、疾病痛苦。」
採訪:Sukey
攝錄:黃志明
場地:Café Zense -----------------------------
【2019 區議會專題】
最齊全區議會入閘名單 互動民調
11.24 用選票重奪區議會
-----------------------------
【升級壹會員登記站 為你解疑難！】
沙田、旺角、荃灣、觀塘、銅鑼灣5區為你服務
詳情地址
來源 source: http://nextplus.nextmedia.com
|
鍾意就快D Share啦！
|
|
|
