2019年12月13日星期五

【頭條獨家】簽英皇半年內出4首歌李靖筠壓力大睇中醫急救 __,英皇,

【頭條獨家】簽英皇半年內出4首歌李靖筠壓力大睇中醫急救

醫師細心為Glayds把脈問診，安慰她說香港人個個都有壓力，唔使太擔心。

在TVB劇集《跳躍生命線》中飾演River一角大受歡迎，現年26歲的「文青女神」李靖筠（Gladys）早前簽約英皇娛樂成為樂壇新貴，由5月至今已推出了4首歌，新歌《第千次重逢》趁年尾派台。受公司力捧的Gladys壓力大到皮黃骨瘦，食極唔長肉，得返個平板電腦身形！日前在荃灣一間餐廳內野生捕獲又瘦又冇精神嘅Gladys喺助手陪同下醫肚，見佢狂隊兩個飯餐，期間不停抹鼻涕，感覺幾辛苦。採訪：方騫平攝影：張詠森

當日下畫，李靖筠喺荃灣一間餐廳內自隊大大碟嘅白咖喱豬扒飯，另加多個芝士溫泉蛋咖喱海鮮飯，但佢邊食邊包「雲吞」，食完就行去睇中醫。事後記者向Gladys了解，她坦言身體出咗毛病：「呢期感覺個人濕氣好重，好攰瞓極都唔夠，而且嚴重鼻敏感，鼻涕長流，要用口唞氣，入到冷氣間仲會有幾聲咳，咁樣好影響到唱歌，但長期食西藥又怕有好多後遺症，所以好鬼煩，慘到連去廁所都唔多暢通，要兩日先屙到一次，好彩未影響到女性周期。」

氣虛血弱要調理

一輪嘴講出苦況後，李靖筠話好彩睇完中醫唔算大件事，「醫師好細心同我把脈，同埋觀察條脷，佢就話我眼圈大，氣虛血弱，血氣運行得唔多好，體質偏差，苦口婆心咁叫我要好好調理一吓先得。不過醫師安慰我唔使驚，而且仲係細路女，第時懷孕期後大把機會做肥婆，但叮囑我要早睡早起，多啲去做運動，開5日藥粉沖劑畀我先改善鼻敏感症狀，再慢慢調理身體機能。聽完咁講都安心好多，至少冇暗病。」

Gladys否認俾人批評樣衰形成壓力：「當你每日都收到私訊負評留言就變咗冇感覺，甚至有指我MV似人妖，其實大眾對藝人界線定得好高，眼中要個個好似楊冪咁樣，否則會話：『呢啲咁嘅樣，周街都執到』其實樣唔係我個賣點，我只想展現我嘅音樂才華。」