「大家好，我係張文采。」
再聽到前主播張文采自我介紹，是否有種親切感之餘，又帶點新鮮？事關已卸下主播包袱的她，連出場打招呼都變得輕鬆、活潑好多。
畢竟在大台，主播是被視為受保護動物，鏡頭前無論談吐，形象，打扮統統受到模式限制，「製造」一個一個四平八穩的端莊人辦。
故性格本是跳脫的張文采，一卸下主播身份，第一時間做的事竟然係……「染一個灰底金色highlight頭髮，平日喺雜誌見到都好想可以染，但以前唔可以嘛，最多都只係染啡色，所以(脫離主播身份)第一件事就去咗染髮。」連髮型長度，款式，昔日非能想點就點。
臨場執生，少點功力與轉數，分分鐘鏡頭前出醜。「例如之前做過311大地震，事前根本無可能可以做到準備工夫，就要靠自己嘅臨場功力，呢方面就唔係所有人都可以應付到。
最難忘係試過一次做李克強總理工作報告，需要即時傳譯，因為我覺得即時傳譯係一個好專業嘅工作，點知嗰次就要去做，事前無講過要做即時傳譯，直至入廠開始做直播時，先突然通知我，當時已經開始咗記者會。現場有個英文詮釋，李克強講完普通話，然後有人做英文詮釋，同時間我就要做廣東話詮釋，嗰次真係好難忘，記者會舉行咗兩、三個小時，整個人即時好崩緊，抄咗三十幾張紙，事後覺得自己好厲害，又完成咗一個任務。其他人經常問我做咗十年悶唔悶？我覺得一啲都唔悶，因為有太多突發狀況。」張文采說。
主播生涯，一臉正經背後、枱底下是一籮籮的笑料。她曾經因為一條菜而收觀眾投訴，她說：「做《香港早晨》時四點就要返工，時間太早，所以好少會食完早餐至返工，所以會喺讀稿嘅時候食嘢，可能會攝咗條菜喺牙罅。我試過有一次收到投訴，諗返都覺得好笑，有條菜攝咗喺牙罅，然後有觀眾投訴我唔撩牙。所以我剛才話會有無形壓力，因為呢封信直接去到老闆手上，然後佢問我點解唔撩牙？有時候就會發生呢啲好搞笑嘅事情。」
她們的忍笑功夫，跟一個演員做Live 騷冇別。「好多時我嘅拍檔係李文欣，本身同佢好老友，我哋成日傾偈傾到忍唔到笑。因為如果唔係影住我哋兩個嘅時候，其實係會不停傾偈，有時可能唔小心講笑，就會忍唔到笑，亦真係試過忍唔住笑咗出聲，就唯有搣大髀令自己覺得痛。試過有一次連搣大髀都忍唔住笑，我唯有好衰咁諗住自己媽咪死咗，然後先至笑唔出，如果唔係就會好大件事，感覺好唔專業。」俾阿媽知道仲唔啋過你個衰女包。 笑有時，喊有時！曾經報導一宗本地意外，觸動了張文采的淚腺，就是導致兩名消防員殉職、十二名消防員受傷的時昌迷你倉大火。她當時的男友，即現在的老公，正是消防員。張文采當晚幾乎負責全晚直播，她在擔心、害怕，又要抽離的複雜心情，強忍淚水完成。
「我好記得當晚大約十點左右，準備直播前十秒鐘，導演通知又多一個消防殉職，佢好簡單咁講咗個名俾我知，佢預期鏡頭影住我嘅時候，我就要交代一句。結果喺嗰十秒鐘裡面，我要諗點樣組織句子，又要控制自己情緒，好痛苦，我忍住喊，其他同事都聽到我把聲震晒。因為老公，即係當時嘅男朋友，佢本身係消防員，我完全代入，然後好驚自己嘅男朋友都會有事，所以忍住眼淚聲音震晒咁報導完。之後忍唔住，垂低頭吸咗一大啖氣，然後再抬起頭繼續報導，真係想喊出嚟。」 無綫新聞主播，除了廿年資歷的方東昇，十年的張文采也是少數的老臣子，為何她捨得離開十年耕耘的地方？張文采：「因為自己一直都有個目標，就係覺得十年係一個里程碑，應該需要離開，做到第九年嘅時候，已經有呢個決定。再加上今年年中開始，有好多唔愉快嘅事情發生，每一日接觸好多呢類新聞嘅時候，個心都會覺得唔舒服、唔開心，同埋工作量愈嚟愈大，而我又結咗婚，都想過啲比較穩定嘅生活，因為我喺新聞部返工時間好早，有時要凌晨三點起身返工，又需要輪班，變相好少時間可以放喺家庭。」
講到重點喇！點睇「反修例」事件中，舊東家被指報導偏頗？她說：「其實好多人問過我呢個問題，不過我心裡面只會諗一樣嘢，就係無論做任何工作都好，俾人嘅感覺一定要專業。正如我哋一樣，都要專業做返自己份內工作，私人情感一定要放埋一邊。我只可以講一句，如果有啲嘢係自己接受唔到嘅話，唯一選擇就係自己離開，所以我覺得專業係非常重要。」
其實早在7月，張文采已經打算裸辭：「最後點解去到九月先至辭職，係因為放唔低啲同事，以前喺公司係一個大姐姐角色，好多時候都需要我去保護佢哋，我好擔心自己離開之後，再無人理佢哋。加上一直以嚟工作上好多負擔，因為一直以嚟都係人手不足、掹掹緊，而我離開之後，人手不足情況會更加嚴重，所以就唔捨得離開佢哋，因為大家好好感情，工作得好開心。」
採訪:Sukey
撰寫:Ethan
攝錄:LL Production house
場地:Amelia@Harbour City
-----------------------------
【壹週刊直播平台 ChannelNEXT】
全城抗暴 區區論壇同你深度剖析
立即睇
-----------------------------
【升級壹會員登記站 為你解疑難！】
親臨旺角做升級壹會員，即送「香港人：抗爭之夏」限量明信片
詳情地址
來源 source: http://nextplus.nextmedia.com
|
鍾意就快D Share啦！
|
|
|