【頭條獨家 】失落三甲女友力撐冧晒 《造星II》Tank原來想唱《今期流行》
ViuTV真人騷《全民造星II》終於完滿結束，大熱門Phoebus(吳啟洋)奪得冠軍，MC(張天賦)及Oscar(李祉均)分奪亞、季軍。賽前大熱，29歲的Tank(梁德忠)雖然輸咗，排名更只得第8，但佢一啲都唔Sad，擁有一把地獄歌聲嘅Tank仲非常滿意Part 2唱跳《全日愛》部份，原來佢曾經想唱古天樂嘅《今期流行》，咦，反而想睇喎。採訪:廖思慧、杜淑霞
去年因有工作被迫退賽《造星》的Tank，因心有不甘而捲土重來，而《造星II》節目播出而來Tank都是節目焦點，總決賽中，Tank一開始便晒冷，Show肌同女友大跳限制級意淫舞蹈，全場嘩聲四起，而Part 2唱跳《全日愛》即時比下去，問Tank覺唔覺排錯次序?瘦剩個頭嘅Tank唔認同:「想喺第一個表演有更大信心，所以就將最有信心嘅跳舞放前面。」
問到點解揀《全日愛》？Tank表示想揀一首快嘅廣東歌配合唱跳，之前都有諗過幾首歌，但因版權傾唔掂而打消念頭，例如《今期流行》，Tank講歌名時感覺有啲唔好意思，咁尷尬咩?賽後檢討，Tank自評唱歌有8.5分，因為係參賽以嚟唱得最好嘅一次。「綵排都有好多蝦碌。」
至於令全場叫到嘩嘩聲嘅限制級舞蹈部份，Tank透露概念諗咗兩星期，「好多謝排舞老師幫我將想法實體化。」表演尾聲時，台上有個架，多對男女在架上「動作連場」，「綵排嗰陣先第一次試個架，之前全部憑空想像出嚟。」對於失落三甲，Tank無失望，因為得女友力撐，「女友讚掂呀，話我今日表現最好。」阿Tank眼濕濕表示好窩心，叫「造星II眼淺王」唔好喊，佢話已忍住「我點解咁容易喊，因為身同感受，成日感情用事，將最樣衰一面表露出嚟。」
問到點多謝女友仆心仆命支持？Tank笑言要返屋企跪玻璃，「因為女友唔喺香港，要同其它女仔綵排，女友睇咗啲片，我好驚，佢話:『你攬第二條女？』」最後佢多謝《全民造星》，更如釋重負地拋吓一句，「終於完」。
|
鍾意就快D Share啦！
|
|
|