兩位幸福人妻沈卓盈（Jess）和倪晨曦（Elva），帶着23歲的小絲打鄺芷凡（Omi）拍攝開電視的新節目《五星級絲打》，帶大家捐窿捐罅分享扮靚、潮物、打卡好玩的五星級好去處，讓男女觀眾開心享受應有的quality time。兩位靚靚人妻配上一個單身少女，可惜節目沒有談及感情事，不過她們私底下會經常分享，Omi笑言要向她們取經，當正她們顧問，自己即成了問題少女。問到若然女方對男仔一見鍾情，兩位女神認為應否採取主動呢？Jess說：「我哋好照顧Omi嘅終身大事，若果係女仔對個男仔有意思，唔需要做主動，應該用方法吸引對方。」Elva亦教路說：「自然得嘞，做返自己，將來有得發展嘅話係日對夜對，你唔做自己將來都好辛苦。其實觀察好重要，你幾鍾意嗰個人都好，你都唔知佢係咪扮嘢，所以要留意一下，要帶定測謊機。」Omi相當受教，她笑說：「咁我要精心打扮，着戰衣，等自己好似有道光環咁，哈哈哈。內心都好期待好似佢哋咁，搵到個人可以同你行埋呢段人生，好戥佢哋開心。」
在節目中三人各自負責在行的範疇，Elva負責扮靚資訊、Jess負責打卡必到地方，而Omi則是大家的白老鼠。正所謂三個女人一個墟，她們走在一起的確製造了不少噪音，Elva笑說：「兩個分開拍還好啲，三個走埋一齊嘈到連司機都頂唔順，大家成日都好熱鬧，有一次拍攝時太興奮大家不停喺度尖叫，我哋睇返playback，都聽唔到大家講緊乜嘢。」Jess笑言大家也是真情流露，都沒有太在意是否太嘈吵，主要是想輕鬆開心。
三人首次合作，擦出不少火花，Jess被冠上「沈大爺」的花名，Omi說：「佢升咗級呀！由沈大師升呢做沈大爺，佢係完美人妻，有時一見到我哋就會好欣賞咁話『你今日着得好靚，除好似行泳衣騷咁』。俾佢欣賞係好開心嘅。佢每次拍嘢都會準備好相機，係我哋嘅攝影師。」她們又取笑Elva是大忙人，經常手機不離手，是爽快的人，故為她取花名「女漢子」。這麼合拍，她們謂明年的目標是希望繼續以吸引力法則，推出part 2，衝出香港，走遍全世界，問到她們到時可會穿泳衣派福利？她們均笑言期待Jess展現身材。另外，這次是Jess離開大台後首次跟其他電視台合作，她表示開心有兩位靚拍檔一同合作，還祝願節目長做長有。
採訪：羅慧敏
攝影：仇志德
攝錄：廖達燊
場地提供：Kowloon Party Room
|
鍾意就快D Share啦！
|
|
|