大台劇《黃金有罪》，張兆輝是股票大亨。現實中，穩陣派的他，曾經冒險將積蓄押在股票上，結果換來慘痛教訓。
「大概喺九十年代中，當時賺到少少外快，本身無(錢)就好地地，因為唔使多諗。當賺到少少外快，但又唔會令你發達，銀紙又會貶值下，不如嘗試投資。本身我唔識投資，所以就好似呢套戲嘅角色「榮木桐」，跟好多散戶一樣咁講，聽個號碼然後買，就一定賺，盲頭烏蠅咁！結果點呢？最初賺少少，但最後就輸清光。
加上我買咗之後，冇睇住亦唔清個市況，買完就繼續埋頭開工拍攝，直至輸清光先至後悔。」張兆輝。
當時輸掉的數目，相等一層樓的首期，六位數字積蓄。
心有不甘？他答:「輸咗先至好，因為之後無論如何都唔會再玩。輸咗咪重新嚟過囉，積蓄可以再儲過。」
真係咁易放得低？他笑著說:「唔得都要放啦，當時將力量放喺工作，因為要努力賺番啲錢。經過呢次經驗，自然就唔會再諗，只會將啲錢儲起。」從此穩陣派的他更加小心翼翼，把賺來的血汗法，只買磚頭，不作其他投機。
「我知道自己可以承受到幾多，我承受唔到高低起跌、大風大浪，我會好擔心。今日食一個雙拼飯，聽日食單拼飯，好過今日食魚翅撈飯，然後突然間咩嘢都無得食，你話幾慘呢？我希望日日都有得食，唔一定要食到最好，只求日日都有得食。」
每個人都有他的黃金年代。
張兆輝的黃金期，他設定在家庭，陪伴一對子女成長的那段時光。
「小朋友年紀仲細嘅時候，我無離開佢哋，一直喺佢哋身邊陪伴長大，我覺得嗰段就係我嘅黃金時間，我嘅黃金時間都俾晒佢地。」是的，張兆輝是圈出聞名戀家男，只要有空檔，他總會親接孩子返學放學，珍惜每分每秒的天倫。
「陪佢哋成長，我覺得係一件好重要嘅事。佢哋過得開心，自然就會好鍾意呢個家庭，鍾意呢個家庭亦即係鍾意你；而佢哋唔捨得呢個家庭，亦即係唔捨得你，所以佢哋而家就算喺外國讀書，阿仔有時都會話:『爸爸你而家可以打電話嚟！』，或者佢會主動打電話嚟，同我傾一陣傾，呢啲就係以往做落嚟。」當年身教，今日收成。
86年，張兆輝憑一套《黃金十年》，從此登上男一。但無論面對這一行多大的競爭，一個個同期藝人如何力爭上游，他依然故我，不埋堆，不應酬，性格使然，但求安穩。
「當時一直咁樣諗，想搵我做嘅就一定會搵我，你唔搵我做，就算我求你都無用。不過我而家已經改變咗一啲，經太太引導、開解、提醒，而家比以前主動同開朗咗。亦明白兩個人坐喺度，對方同老闆好好傾，會自我介紹自己係演員，但你唔講自己拍戲嘅話，對方點會知道呢？咁自然就會將機會俾咗對方，呢個好正常。不過以前經常覺得自己唔係好識講嘢，意思係比較正直，即係唔識得修飾用詞。好多時驚講錯說話，所以寧願唔出聲。
每個人嘅際遇都唔同。相反有啲人將所有時間放喺工作上，佢嘅家庭生活方面唔會唔開心，不過可能但求有瓦遮頭就已經OK。喺工作方面我都享受，不過我覺得家庭更重要。」
張兆輝講過，如果當年再進取多些，事業可能不只於此。今日再給他選擇，答案會是一樣嗎？
「如果再俾我揀，我都會揀番陪佢哋長大。」
為了家庭，02年仍是大台小生的他，一度毅然離開電視台，同太太一齊經營美容生意，朝九晚五，為的是爭取更多時間陪伴妻兒。
「因為小朋友啱啱出世，所以更想有多啲自由時間，可以管理自己嘅時間。當時大家辛苦咗五日，然後星期六，日就是family day。因為太太好鍾意食嘢，所以星期六就一齊去搵美食，星期日就會歎茶，同小朋友去玩波波池，呢啲就係家庭生活。如果選擇拍戲，就永遠只得太太帶住小朋友，佢又要辛苦掛住我；同樣我又要辛苦工作，又要辛苦牽掛住佢同小朋友，咁樣大家都會好牽掛，大家都好辛苦，除非你唔去諗嘅啫，隨便由得佢，但咁樣就無謂組織一個家庭啦。我覺得嗰段時間真係最快樂。」
正如他說，每個人際遇不同，有人年輕事業有成，安份的張兆輝，年過半百才是黃金期。56歲狀態越操越fit，事業越吃得開。工作有時，享樂有時，無憂不過於此。
採訪:Sukey
攝錄:LL Production House
攝影:Lawrence Wan
場地:The Stadium
服裝: 髮型:Kel Fung@HH hair.nail
化妝:雷淑賢(大哥賢)CLUB MONACO
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
----------------------------
【升級壹會員登記站 為你解疑難！】
親臨旺角做升級壹會員，即送「香港人：抗爭之夏」限量明信片
詳情地址
|
鍾意就快D Share啦！
|
|
|
