香港人靠自己全力同武漢肺炎打仗，成日自我吹噓係「真英雄」同「忠誠勇毅」嘅綠色物體高層，就放低抗疫工作，包房同明星飯照食歌照唱最自high同happy。
網上噚日有片流出，警務處處長PK鄧同班手下，包括警務處人事部遴選委員會總警司謝振中、公共關係科總警司郭嘉銓同高級警司江永祥，仲有「光頭警長」劉澤基，齊齊去晨曦明星足球隊晚宴，片中PK鄧好興奮發言，話見到好多偶像，由成龍開始數到譚詠麟、曾志偉，之後向班廢老級藝人送高帽，「其實呢，點解我喺區議會講嘢咁叻？就係聽志偉嘅《開心字典》」，更自爆「唔知點做警察」，「我做警察係學成龍大哥、學方中信，全部都係學你哋……睇吓睇吓就識做，唔知點解。」最後仲一齊唱咗首《朋友》。
室內食煙獲包庇
八方睇完覺得心慌慌，一來疫情肆虐，呢班人一齊聚餐唔戴口罩又握手影相，更心寒係堂堂警隊一哥，可以厚顏話自己向藝人偷師學做警察，佢學嘅成龍同方中信演嘅警察角色，會無視紀律、公報私仇兼妨礙司法公正，原來呢啲就係PK鄧眼中嘅警察楷模？
當晚出席人士中，仲有襲擊市民坐完監嘅退休警司朱經緯，佢同好多個藝人同警隊高層合照，結果因為咁畀自己隻衫袖出賣，連登網民發現，佢係呢批片同相嘅疑似源頭，亦發現當晚有人違法室內食煙，但結果就獲Popo包庇。
八方問過PPRB，佢哋話警隊16號喺公餘時間同一支足球隊踢波，之後一齊聚餐，費用由雙方共同承擔，仲話活動屬私人性質。問題係，PK鄧當晚同現場人士講咗句：「大家係老友，全部在心中，唔使講嘢，只要你哋畀個手指公我哋，我哋赴湯蹈火，在所不辭。」，喺私人場合向一班「老友」用自己公職身份作出咁重大承諾，究竟係濫用緊職權定已經係公職人員行為失當？
李八方
來源 source: http://hk.entertainment.appledaily.com
|
鍾意就快D Share啦！
|
|
|
