《壹》仔影緊女，不過唔好誤會，唔係畫面所見戴住口罩咁有防疫意識嘅妙齡少女。睇真啲，畫面有執凌亂嘅頭毛郁郁吓，佢哋嘅主人就係今次嘅女主角、武漢肺炎都照樣唔戴口罩四圍貢嘅美心太子女伍淑清。
伍淑清，三不五時就牙斬斬發表抹黑年輕人言論，而佢出到街亦會眼眨眨，何解呢？71歲仲搞咁多嘢，唔通一把年紀仲想威仲想出名？
要塑造深入人心嘅愛國形象，除發表「放棄年輕人」言論，造型都好重要，而伍淑清嘅官方造型設定，就肯肯定係棗紅色長袖衫，搭配灰色西褲、黑皮鞋，再拖個喼添。紅色唔使講啦，中國代表顏色；至於西褲，諗下一車車喺金紫荊廣場現身嘅同胞，有幾多個唔係西褲襯皮鞋；行街要拖喼呢樣嘢，香港人啲腳指感受最深。
為咗貫徹呢身愛國造型，伍淑清嘅日常生活，似乎無第二個搭配，出親街都係呢個打扮，就好似卡通入面嘅主人翁咁，日日同一套衫褲現身，事關《壹》仔上次喺街撞見佢，又係咁嘅裝束無變過，唔通佢個衣櫃同野比大雄、蠟筆小新等人一樣，都係同一款衫有十套？
雖則保持一貫造型好重要，但武漢肺炎疫情肆虐情況下，加個口罩都唔算過份，唔會太破壞形象啫，連開緊工嘅清潔姐姐見到伍淑清唔戴口罩，都回頭「睥」佢呀！
真係咁驚人哋認唔出你就係愛國深藍絲伍淑清，咁不如就戴個有國家代表性嘅口罩咪得囉，例如印有人民幣樣式、中國國旗款式、武漢肺炎病毒圖案嘅口罩，咁咪唔使怕囉。
----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
立即睇
-----------------------------
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
來源 source: http://nextplus.nextmedia.com
|
鍾意就快D Share啦！
|
|
|