鄧兆尊是香港已故粵劇名伶祥哥鄧永祥（新馬師曾） 之長子，他的母親洪金梅（祥嫂）一直想他繼承父親衣缽，希望兆尊可以入娛樂圈發展。當他在加拿大畢業回港，祥嫂就千方百計想安排兆尊加盟TVB，完全沒有理會兒子到底想不想做藝人，兆尊就是這樣糊裏糊塗在娛樂圈十幾年。
兆尊當年沒反抗母親，純粹是為圓母親願望做藝人，有沒有後悔呢？他表示：「當年做公眾人物都係阿媽迫，我係讀完書返嚟，唔覺意食咗餐飯，在座有何麗全，何生多口講句，你返咗嚟有咩做？我話唞幾個月就搵工，點知何生話咁你入嚟幫手一句說話我就賣咗身畀佢18、19年嘞！」
兆尊又爆出原來當年母親已安排還在求學的小艾入娛樂圈，他表示：「我妹都畀阿媽迫佢拍過戲，啲賣埠錄影帶，我同細佬喺外國睇笑到眼淚水都標埋出嚟，佢都識做戲嘅？估唔到返到嚟到我中招！我媽立場嚟講，一早係好出名星太嘞嘛，佢追求身份做星媽，我咪做咗嗰個犧牲品囉！其實我最鍾意自由，我一返嚟就冇咗自由，我爸同我講咗句，喺呢個圈點點點，佢話都知我被迫，但佢第一個戒條係唔好亂搞男女關係，所以入咗娛樂圈到現在都未同過圈中人真係拍過拖，之前傳出嘅緋聞都係假嘅。」
當年兆尊在娛樂圈，因為有背景，在電視台待遇比普通人好少少：「早期都係做主持旁邊人，好過其他人啲啲，直至我遇到燦哥（廖偉雄），到今日都好多謝佢，佢不斷教我嘢，嗰段時間學得最多嘢，仲有爸爸啦，叫我由低做起，我平時對人態度，係跟佢嘅方法做。不過我媽太強勢佢問我點解咁悠閒，我話因為你，同人講唔好畀個仔太危險呀，咁咪做啲悠閒角色囉！」
祥嫂見兆尊太清閒，又請人給兆尊多做些難度高的角色：「佢叫人畀啲勁啲角色我做，有發揮嘅，咁跳海、爆炸，乜都出嚟，過幾日祥嫂見到我就問，點解成身傷？我話因為不停墮樓囉！嗰時後生啲，傷完好快好，同埋我係較蠢嘅人，做咗好多嘢先，原來我哋每年有假期可以放，原來我積埋成百日冇放過。咁耐只請過一日假，成身傷晒，PA問我點解仲唔去醫院，我話好攰冧，過一次廠，因為真係全身傷晒，全身血，唔係道具係真血。」
娛樂圈是否適合他？兆尊表示：「聽同自己親身經歷有啲唔同，我覺得係推快你思想同成熟期嘅地方，只要你有輕微弱點，你好易俾人同化，或去到萬劫不復地步，所以要把持得好好；但把持得太好，機會又可能離你而去，始終揸權嘅人有佢哋要求，如要你飲酒，但聽朝要開06，你捱唔捱到呢？呢啲係最基本。再唔係你要睇面色，原來呢個同呢個唔啱，你自動去一邊，你自己唔知，見過好多有才華、叻人，就係過唔到呢一關，我哋係好似卒仔咁畀人擺嚟擺去。」
撰文：鍾國仁
攝影：沈健程
攝錄：林德雄、葉君海
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com
|
鍾意就快D Share啦！
|
|
|