2020年3月8日星期日

【頭條獨家】身體健康唔怕古天樂無罩現身鬧市速閃 #古天樂

【頭條獨家】身體健康唔怕古天樂無罩現身鬧市速閃

古仔在經理人Ronnie陪同下離開航空大廈。

現年49歲的古天樂（古仔）是不少人心目中的男神，皆因他靚仔、好戲又有愛心，過去不但經常低調行善，近日公司生意受疫情影響，他都堅決不裁員、不放無薪假，與員工共度時艱！成日話「好人一生平安」，早前古仔現身銅鑼灣處理事務，臨離開上車前，穿梭鬧市的短短幾步路程都冇戴口罩，但見他平日操得咁Fit，估計冇咁易中招嘅！採訪：梁志明

古天樂之所以俘虜人心，不單是因為一副俊俏的外表，以及精湛的演技，更重要是他有一顆善良的心！過去10年，古仔在內地低調興建過百間希望小學就不在話下，近期新冠肺炎嚴重打擊香港經濟，導致百業蕭條，各行均出現裁員或倒閉潮，連他旗下的餐廳「名廚酒家」都生意額大跌，需要暫停營業，不過，這位「良心老闆」早前已承諾盡量不裁員，更不會要求員工放無薪假，希望盡能力保住員工飯碗！除此之外，「古天樂慈善基金」早前還在全球搜購130萬個外科口罩，捐予全港18區有需要人士，非常有心！

師奶喪𥄫

雖然近期未使開戲，但身兼多職的古仔仍忙於處理工作事務，早前下午，一身All black造型的他從銅鑼灣航空大廈離開，尾隨仲有3、4個工作人員，超有氣勢！不過，就算有經理人Ronnie貼心照顧，一向冇乜架子的古仔都自己推門，唔使遮唔使擋，直接行出鬧市，連路過的師奶都忍唔住擰轉頭喪𥄫。記得古仔曾經講過，每年盡量會做兩次身體檢查，健康一切正常，加上平日為拍動作片都操開，又可能見從門口行上車的路程勁短，所以當日都全程冇戴口罩，相信他咁Fit應該冇咁易冧廠嘅。