張寶華向平機會投訴上海總會 黎芷珊轉場補祝難忘生日
黎芷珊和有線前新聞之花張寶華、才子陶傑等早前乘坐鑽石公主號，於1月25日由橫濱回港，回港後得知原來同船有名80歲老翁確診新冠肺炎，兩人都自覺要自我隔離，黎芷珊更隔離足足30日，直至上月底才出關。本來張寶華訂了上海總會為「一齊走過死門關」的黎芷珊慶生，但因歧視被取消訂枱，搞到兩人嬲嬲豬，不是味兒。昨晚兩人喺電台DJ朋友林柏希安排下，去咗尖沙咀一間日本餐廳食生日飯，張寶華送上一束鮮花及搓手液給壽星女，講到呢個54歲生日，黎芷珊形容認真難忘！採訪：方騫平
被歧視不好受
她無奈苦笑道：「咁大個女未試過被歧視，原來真係唔好受，好怪，不過呢個經歷都幾新鮮，死過翻生後仲要被歧視，今年遇到啲嘢係奇遇，冇諗過上船去玩，有呢啲擦身而過嘅經歷，但我諗冇病冇痛都叫有運行！所以生日願望都好宏觀，真係想疫情快啲過，因為生意、工作都受到影響，喺屋企都擔心，心情又唔好。」
對於被上海總會取消訂枱，張寶華表示，其實當日訂枱時已經說明一切，對方還説：「你哋自我隔離成個月，真係有公德心！」直至翌日早上10點對方還向她詢問餐單，11點就突然發訊息說：「對唔住，明天未能接待你哋！」理由係老人家多，抵抗力低！
黎芷珊也感莫名奇妙：「我開頭唔信呀！仲問寶華係咪敏感咗呀？佢就將對話截圖，真係明顯唔歡迎我哋囉！真係有啲嬲嬲哋，因為我咁辛苦成個月唔出街，喺屋企自我隔離，你估係一件簡單容易、舒服嘅事咩？我都做咗本份啦，做乜仲要畀人咁睇呢？」張寶華亦不平則鳴：「我明白個社會係驚肺炎嘅，但驚得嚟大家要理智、理性啲，如果你聽政府、聽醫生講，做好防疫，隔離14日會冇事，咁你梗係要相信啦，更何況我哋明知人哋認得自己，要顧吓人哋嘅感受，所以我哋經已唔係自我隔離14日，而係隔離30日，做足有餘，其實我有好多問題想問返上海總會：『係咪隔40日都唔得，要隔40年？』但佢都答唔到我。」
向平機會投訴
就今次事情上，張寶華更有意向平等機會委員會（EOC）投訴：「睇吓今次事件上有冇牽涉《殘疾歧視條例》，例如某個人有病，而唔畀佢去某個地方都算係歧視，況且我唔係有病，咁樣唔知係咪可以可以投訴？呢個舉動目的唔係要告佢哋，係個教育，喚醒唔好歧視，我哋今次係好好彩，去一個疫區，可以全身而退，隔離期間屋企人冇事，好感恩，如果有啲唔好彩中招就好慘！今次事件上唔存在還唔還我公道，係佢哋唔啱囉！希望透過呢件事當係一個教育，要諗吓康復病患者，或者隔離過嘅人其實都幾無辜，食飯反而只係小事。」
|
鍾意就快D Share啦！
|
|
|