電視節目有好多種，有一種會以嬉笑怒罵和諷刺時弊方式去探討時事，環觀所有文明社會中都有相類似的節目，皆因要該地方要擁有言論自由，當權者亦要有接受批評的氣度，缺一不可。可惜原本同樣擁有這些自由的香港，自跟深圳河以北接軌後，非但一點一滴地失去我們引以為傲的優點，當權者的心也一步步地變得玻璃化，再容不下任何批評、反對和揶揄的聲音。
已經有31年歷史的港台節目《頭條新聞》，最近因其中一個環節「驚方訊息」 主持人王喜，打扮揶揄警察是廢物，除遭受警務處長鄧炳強親自投訴外，連商務及經濟發展局和通訊局亦雙管齊下，終於完成歷史任務，成功令本身已傷痕累累的港台，宣布完成本季頭條新聞後暫停製作，及即時停播「驚方訊息」環節。
【令克警知大家知佢哋做錯事】
對於今次政府全面出手打壓港台，王喜今日傍晚在旺角接受《蘋果》訪問時，認為港台節目的製作和風格都無改變，變的只是現在的環境和制度。但今次強行將「驚訊」拉下馬的舉動，相信是預期之外吧？王喜表示節目初衷就是要讓犯法的人不安樂：「由開始創作到造型服裝都係要令做錯嘢同犯咗法嘅人唔舒服，呢個係原意，如果做出嚟係舒服嘅，我做嚟做乜？」
是的，現在小市民面對當權的人仗著一副「你吹我唔脹」的態度，除了揶揄還可以點？王喜亦認同現實是相當無助：「我哋冇辦法用法律，冇一個機構可以幫我哋將犯咗法嘅香港警察繩之於法，只能夠用呢啲嬉笑怒罵，又唔會干犯罪行嘅形式，去令佢哋知道，我哋知道佢哋做錯事。」
既然事已至此，當權的用甚麼理由去終止節目已經不重要，但偏偏用上洋洋19頁紙細數他們的「罪狀」，王喜稱此行為是「擺門」：「佢哋嘅目的就係要cut咗個節目，一定要做啲嘢令佢哋老闆覺得佢哋有做嘢，於是先有呢19頁紙。」
【將節目趕出安全圈】
較早前王喜在自己的專頁直播中，公布新一輯「驚方訊息」會移師到杜汶澤「喱騷」繼續，意味「忠勇毅」仍會每星期和網民見面，王喜預告接下來「忠勇毅」會有更大發揮，而且全靠對家助攻：「你將節目留喺港台，仲可以受到一系列條約規管，而家將佢趕出呢個咁乾淨嘅安全圈，去到一個更寬鬆、更貼近言論同新聞自由世界，仲要交畀杜汶澤同王喜？」
不過王喜強調節目往後繼續會以事實為根據，娛樂性會更高，但卻有點點遺憾：「係PPRB（警察公共關係科）郭嘉銓點樣再代鄧炳強寫信畀邊個？寫俾杜汶澤？你覺得杜汶澤會點？以前港台收到呢封信都要認真去應對，以後唔通寄畀杜生或者寄畀我？」
【設備完善犯罪集團】
直播中的王喜呼籲輔警和正接受訓練的學警要考慮清楚，是否真的要加入警隊，而且在過往斥責警隊時特別肉緊，全因王喜深知他們的恐怖：「要槍有槍、要人有人、要錢有錢、要權有權，係設備周全嘅犯罪集團，佢哋無所不能，如果我唔去警惕大家仲有邊個去警惕？」
面對各式暴力，無力感籠罩下，香港人問得最多的是「可以點？」，王喜首先認為香港人過了多年太平盛世，缺少了對邪惡的警惕，對壞蛋的防範。於是「可以點？」王喜說出四個大字：「不要送頭，點解我要用嬉笑怒罵嘅方式？就係唔好去干犯任何即時畀拘捕嘅罪行，命仔得一條，手腳係得咁多，又唔係四腳蛇，斷咗唔會生返出嚟，唔好吓吓攞個身出嚟去搏命。」
事實上已經有不少人平白地犧牲，王喜說：「好多人甘願犧牲咗，然後發覺流嘅血唔會令到胡作非為嘅人改變，反而仲變本加厲，所以唔應該再用呢種投資，要善用成本。」除非有一個翻天覆地改變，為大家帶來契機，王喜續說：「當然呢啲改變唔會來自我哋七百萬人，可能會來自更大的權力，對世界更有影響嘅組織機構，咁先有機會為香港帶來改變，先有機會嘗試去爭取過去呢段日子入面失去嘅嘢。」所以這段日子雖然難捱，但懇請謹記如王喜所言「不要送頭」！
-----------------------------
App內1-Click訂閱《蘋果動新聞》
按此了解更多
採訪：曹家誠
攝影：陳慧安
來源 source: http://hk.appledaily.com
|
鍾意就快D Share啦！
|
|
|
