玩到咁大？
由舞王變渣男嘅羅志祥，上個月先後兩次發文向前女友周揚青道歉，尋日「520」大日子佢再次發功，上載7,000字長文，內容由佢哋相識開始，細數當中嘅9年情，仲專登用簡體字就番內地網紅出身嘅周揚青，內容情深兼放低姿態，有人話睇到眼淚流，不過亦有好多人話羅志祥別有用心，將過去嘅甜蜜公諸於世無非想周揚青憶起開心日子，從而箍煲成功洗脫渣男形象，亦有人指做咁多嘢都係為咗復工搵錢。呢啲論調都唔係重點，最重要係周揚青畀乜嘢反應？佢深夜喺社交網上載「吊鹽水」嘅相片，唔通係睇唔開搞成咁？！
睇番啲相見到周揚青同三個女仔喺酒吧碰杯，並寫上「Happy 520」，另外仲有類似醫院吊鹽水嘅設備，喺酒吧出現呢舊嘢入面裝嘅當然都係酒！見佢玩得咁開心，睇嚟羅志祥嘅7,000字懺悔文應該冇乜用，雖然佢講過最愛係羅志祥，有網民推斷經歷過男方偷食女下屬「蝴蝶姐姐」同埋「多人運動」嘅打擊之後，羅志祥喺周揚青心目中嘅地位大大減低。
而尋晚有粉絲團發起投票「羅志祥和周揚青復合嗎？」小豬被發現竟用自己帳號投咗贊成票，雖然有粉絲紛紛為小豬解圍話只係手誤，不過唔少網民都覺得小豬真係未放低周揚青！
來源 source: http://hk.on.cc
|
鍾意就快D Share啦！
|
|
|
