資深傳媒人潘小濤早前宣佈離開商業二台時事節目《在晴朗的一天出發》，今日是小濤最後一日開咪，節目組在facebook開直播，兩小時節目中，聽眾不斷留言表達不捨，亦收到果籃、蛋糕和心意卡等，小濤多次在直播室落淚，拍檔阮子健拍拍他膊頭安慰。
潘小濤在節目中回顧這15年在商業電台主持節目的點滴和趣事，笑稱為免自己太激動，所以事前已經錄好一段獨白，他哽咽地表示「真係好唔捨得」，接着便播出錄音：「呢幾日睇到大家嘅留言，特別係嗰啲讚美嘅說話，竊竊之喜之餘，都覺得感動同唔捨得，但更多嘅係受寵若驚，或者受之有愧。當我決定辭職嗰一刻，本來係諗住靜雞雞咁走，正如我當日係悄悄的來，我心諗，唔好話有冇人挽留，冇被請走已經係偷笑。但係睇到大家嘅支持同不捨，對我離職嘅理解，簡直好似生活喺兩個平衡時空，真係好唔真實。」他續說：「『7年之癢』婚姻呢一關，我自己可以過到，商台呢一關我都可以過到，我喺商台都做咗15年，獨獨係《晴朗》呢一關係過唔到。」小濤提到過去的日子的確感受到壓力：「如果唔係輕輕鬆鬆兩個鐘，我諗真係癲咗。」
最後，小濤借蘇軾的詞向聽眾道別：「『人生到處知何似，恰似飛鴻踏雪泥；泥上偶然留指爪，鴻飛那復計東西。』能夠喺商台同《晴朗》留低一啲印記，係我一生最榮幸，亦都係最大嘅成就，人生有聚有散，世界無不散之筵席，好多時有啲決定係耐人尋味，將來係點，大家拭目以待。再見喇！各位朋友，總有一日我哋可以喺晴朗的一天出發，願光榮永耀我城！」
至於接任人選，林海峰在節目內表示：「好多人都問我究竟邊個接潘小濤班，我哋而家就見到佢啦。」然後就見到盧覓雪拿着鮮花現身直播室，送花給小濤並擁抱，再宣佈下周一會歸位開咪，最後小濤以一句：「黑暗嘅盡頭就係光明，各位再見！」為《晴朗》的主持生涯劃上句號。
節目完結後，節目組再另外開多次facebook直播，分享聽眾送來的各式各樣禮物，一班《晴朗》節目同事更送上寫有「一個時代的終結」鏡給小濤留念，更讓他拿着鏡框，眾人在倒影中揮手合照，場面搞笑。不少網民知道盧覓雪接任都表示期待，林海峰還建議小濤日後做YouTube節目時索性用「一個時代的終結」做節目名：「你到時個名就叫黃標啦，因為你條片到時一定有黃標。」
《晴朗》一直以「嬉笑怒罵」為宗旨，節目首播時，由吳君如、林海峰、杜汶澤及盧覓雪主持，直至2008年8月，主持人盧覓雪離開《晴朗》，當時由朱薰接棒，朱薰於2012年12月放產假，就改由潘小濤暫代主持，2020年8月，潘小濤離開《晴朗》，就由盧覓雪重回叱咤《晴朗》做主持。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|
