何雁詩、黃翊、葉振棠、麥長青、敖嘉年昨晚在九展出席頒獎禮，由於限聚令，現場只招待近200名觀眾，場內所有人均需戴上口罩。何雁詩婚後大解放，以一條中門大開連身短裙示人，她笑言「都未去到肚臍」，問到老公鄭俊弘有沒有審視過？她說：「佢冇睇過，因為今次係我第一個出席嘅頒獎禮，我想著得華麗啲。」她表示今年有很大的變化，除了結婚成為人妻外，因為疫情而不能旅行，留在家中反而找到另一份享受。對於她早前煮飯給奶奶，何雁詩笑說：「佢好開心，但我唔知好唔好味，我冇問佢，好尷尬，其實結咗婚之後，我賢淑咗，成日會諗煮飯、執屋、放狗。」至於生育計劃，她打算待3至5年後。
至於早前與康子妮傳過緋聞的黃翊，他與人妻蔣嘉瑩挽手出場，黃翊笑言不擔心會傳緋聞，更透露將邀請羅敏莊擔任微電影MV女主角。對於爆出康子妮與保險上司兼大學同學陳逸汮（Garry）的緋聞，黃翊說：「唔關我事，唔會理人哋啲嘢。」提到疫情爆發第四波，黃翊指飲食生意比之前再下跌9成：「我喺大埔開食肆，跳舞群組散播疫情比較犀利，有啲係大埔人，變咗有啲人唔夠膽夜晚出街，所以生意好難做，惟有員工放無薪假。」
麥長青與朋友合資的和牛食材專門店，早前被人淋紅油，及後麥長青宣佈退股，他說：「計緊數，會攞返我投資咗嘅錢，呢4個月當做義工，不過我都開心學咗好多嘢。」他強調退股不關淋紅油事，續說：「唔關我事，佢哋都好大壓力，因為同咗我之後就好多嘢都俾人講晒出嚟，同埋我嚟緊有工作，未必兼顧到，我又唔想太太咁攰。」他指多年來做生意都有賺有蝕。
現年76歲的葉振棠，身型狀態很弗，他笑言經常在跑步機緩步跑，但醫生叮囑最好重多10磅。問到疫情有否影響他的生活？葉振棠說：「而家放緊大假，但我好勤力，每日都會練歌兩小時，因為我欠咗好多演唱會，起碼超過10個，有香港、大陸、海外，原本今年舉行，但而家要延遲到明年。」會否影響收入？他說：「唔緊要，都係一段時間，頂得住。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
