2021年3月5日星期五

【影評】《反轉三國志》「福田組」出品眾星雲集搞笑又熱血

《反轉三國志》係福田組出品，質素有保證。

唔知點解日本人好鐘意用三國歷史做題材，但《反轉三國志》一聽已經知係行笑片路線，得唔得㗎？其實電影由《銀魂》導演福田雄一執導，為求男主角大泉洋接拍等足三年，加上賀歲片級數卡士，鐘意日本明星的影迷唔好錯過嘞。撰文：何蔓琪

雖然係笑片，不過都有齊三國應有的經典事件，如桃園結義、火燒連環船、赤壁之戰等等。三國君主都係同歷史記載好大出入，劉備（大泉洋飾）冇膽之餘仲要因兵力懸殊想著草、曹操（小栗旬飾）沉迷女色，政事就唔多想理、孫權（岡田健史飾）勁易被動搖又零主見。呢班君主嘅副手都係三國亮點之一，聰明才智諸葛亮（室剛飾）變咗靠老婆黃夫人（橋本環奈飾）先有今日地位；周瑜（賀來賢人飾）明明又Charm又靚仔，竟然擔心頭頂綠綠的，驚老婆小喬（山本美月飾）出軌。

趙雲（岩田剛典飾）找來絕世美女貂蟬（渡邊直美飾）獻給曹操，渡邊直美向蜀國眾人大晒跳舞實力時好搞笑，導演更會在適當時候畀演員即興發揮，所以部分情節真係超荒唐。最犀利是，明知實際三國歷史係點，但因為電影主打反轉兼好無厘頭，劇情都係向住失控方向發展！笑還笑，電影都有充分表達到人物為國家而戰嘅衝勁，配上福山雅治獻唱的主題曲《革命》，片尾曲一出內心真係好熱血呀！《反轉三國志》昨日開始在港上映。