幸福要自己爭取，理想何嘗不是！結婚十四年的歐倩怡（Cindy），是標準賢妻良母，照顧一對寶貝仔女無微不至，打理家庭頭頭是道，難得萬能賢妻背後，還有一個資優學生身份，Cindy用十年時間完成了兩個大學degree，剛考取到食物及營養學一級榮譽理學士，近日復出幕前擔任網上節目主持，又兼讀碩士課程，努力不懈的她，日前閉關溫書抑鬱爆喊！她直言：「就算我唔做呢行，都有自己一個技能去維生！」
- 郭晉安歐倩怡99年因拍旅遊節目擦出愛火，兩人拍拖七年感情修成正果，06年7月在迪士尼舉行婚禮。
- 今年二月歐倩怡在社交平台，上載了一張戴上四方帽畢業的相片，分享她以一級榮譽畢業「食物及營養學榮譽理學士」。
當年主唱的「櫻桃小丸子」片尾曲《問題天天都多》大受歡迎，不過，歐倩怡卻在26歲便嫁人淡出幕前專心相夫教子，老公郭晉安現時已是三屆視帝，她選擇在41歲之齡復出，開行Turbo同時兼顧家庭、學業和事業，如同打三份工一樣絕不簡單！
「我唔想自己去到七老八十嘅時候，回頭一望，喂！到時過退休生活即係Hea嘞！但我年輕時有冇搏過先？如果年輕時冇搏過，我會覺得我個人生好唔抵！」
小題：唔會小鳥依人
同老公郭晉安過度了兩個七年之癢依然愛情保鮮，早前兩人應邀上《流行經典50年》合唱，夫妻恩愛默契表露無遺，Cindy坦承夫妻相處之道，最重要是給予對方私人空間。
「已經兩個七年，其實我諗依家，大家嘅關係同感覺，我諗所有人、所有情侶都係，一定係啱啱拍拖嘅時候，就好有火、好熱情、好有火花嘅！其實耐咗，慢慢就變咗似係一個親人，一個好好好好嘅朋友，大家有自己嘅空間，又唔會過分倚賴，又唔會過分黐住，我係鍾意係咁，因為我個人唔係嗰啲小鳥依人，要黐住嗰啲人！
享受自己一個人嘅時間
享受自己一個人嘅時間
「我由細到大都係鍾意自己坐開一邊，享受自己一個人嘅時間嗰種人！「譬如而家安仔鍾意打網球，佢鍾意嘅嘢，全部都要有拍檔嘅，我真係冇辦法，我幫唔到佢，我唔識打網球，佢成日要有人陪嘅一個人，我由細到大，我玩嘅運動，都係one man band ，我以前讀書時鍾意游水，我係校隊，而家就算為咗健康，我鍾意嘅運動都係一個人，唔鍾意成日約人，去遷就人時間我覺得好煩！
「有啲人鍾意有伴嘅，我就由細到大，我性格都係鍾意一個人行街，自己一個人去決定啲嘢，譬如我讀書，我都係自己一個人決定，自己做research，我讀邊間學校、讀邊一科、啲時間點去安排，我由細到大都係咁！」
小題：要自我調節
雖然郭氏夫婦喜好不同，但反能令兩人各有空間，夫妻關係更細水長流。
「可能係咁，就唔會點鬧交，佢專長係拍戲，我就唔好牽涉咁多拍戲嘅嘢，佢就唔好牽涉咁多唱歌、營養學嘅嘢，咁佢就有番自己空間囉！我覺得相處最緊要係有自己空間，我覺得每一個人都有自己自我嘅調節，你工作喺出邊遇到咁多人咁多事！
「我係有好多空間要調節自己嗰啲人嚟，佢都係一樣，因為佢要處理每一個角色，佢劇本嗰啲情緒變化，佢好多時都自己匿埋一邊，去諗去思考，睇吓劇本點去處理。」
- 郭晉安支持老婆復出。
- 娼後，歐倩怡便淡出幕前，專心湊仔女，是一位賢妻良母。
- 歐倩怡熱愛運動，不時在社交網分享做運動keep fit的照片。「運動係好好嘅減壓方法，其實除咗keep fit之外，每日三十分鐘，或者恆常一星期做三、四次運動，對健康好啲、心理又好啲！」
要俾安全感自己
要俾安全感自己
婚後全心照顧家庭已夠忙碌，Cindy仍無止境進修，她坦言是有感自己學歷不足。「我16歲嗰時啱啱考完會考，仍未放榜，就去咗參加《新秀》，順理成章入咗行簽約華星唱片公司，其實我係未讀完書，可以咁講，
「自己真係欠咗一個degree，其實嗰時我自己心態都係覺得，其實是需要嘅！
「其實都要俾一啲安全感自己，我覺得讀咗書之後，我有咗個degree，有咗個市場管理學嘅degree，同埋有咗個食物營養學嘅degree，依家再去讀Master，至少我覺得當我開始老，開始愈嚟愈醜樣，個妝化唔到、冚唔到我嘅老態嘅時候，我都有一門手藝，有啲技能可以維生，娛樂圈太冇安全感！
「而家嘅自己，可能讀咗書之後，我知道而家自己做緊乜，就算再返出嚟娛樂圈，再活躍番都好，我紅定唔紅、成功與否都好，其實我都有後路，我可以做營養師，或者做其他嘢，變相我對娛樂圈嘅工作，會更加放開咗自己。」
小題：老公支持復出
不經不覺，兒子令山今年已經13歲，細女以雅亦10歲， Cindy表示兒子已經長得高過自己，仔女亦有自己的朋友和空間，不用她再時刻貼身照顧，她亦可放心去追尋理想。十多年後再復出起步，老公郭晉安的鼓勵亦令Cindy打了一支強心針。
「佢話你去試吓啦，小朋友都大，你去試吓同埋佢覺得，你都仲得嘅！佢覺得我嘅狀態、所有嘢都係得嘅！」
「搵食，工作其實都係搵食，其實大家都知嘅，譬如安排小朋友啲嘢，接送佢哋，要大家識得協調。
「特別係我而家，喺娛樂圈沉寂咗十幾年，要返轉頭重新去建立過啲嘢，重新想有自己嘅事業，其實佢係一定要俾好大空間，同自由度我去做嘢，如果唔係我唔可以而家先去搵自己事業。」
小題：兒子入幼兒班即進修
相信學問是女人最大的財富，Cindy早在兒子令山上幼兒班，便開始計劃未來。
「讀書係鋪路我想有多元化事業嘅發展。
「佢（兒子令山）開始上幼稚園，因為嗰時佢幼稚園係全日制，我就開始讀市場管理學，讀咗四年，四年幼稚園嘅時間，我就啱啱讀晒。
「同埋呢，好多時報讀小學，其實家長都好苦惱，就係報小學嘅時候，其實都要填家長嘅職業、學歷，例如報讀私校和直資，由佢（兒子令山）入讀幼稚園開始，我就發覺唔得喎！本身只係中五畢業，安仔亦唔係高學歷，咁我覺得反正我想讀書嘅，我點都要讀個degree ，咁之後幫佢報小學時，我都係大學畢業嘅，啱啱趕得到，申請小學嘅時候有個靚啲嘅Portfolio 。」
- 2008年誕下兒子郭令山，2011誕下女兒郭以雅，湊成一個「好」字。
- 復出的歐倩怡和老公郭晉安各為事業拼搏，安仔近日在深圳為《白色強人2》開工，歐倩怡則忙於拍攝網上節目《Chill Good》，並計劃重返樂壇。
教育仔女持開放態度
教育仔女持開放態度 郭晉安曾透露和太太歐倩怡都性格自我，在仔女教育問題上曾有過意見分歧， Cindy則認為夫妻兩個人在不同背景成長，教育仔女方式不用一致，她同老公和仔女之間會建立各自的相處關係，有需要時便會一起商量，更重要是夫妻倆都會放手讓仔女自行發揮。
「因為互聯網關係，佢哋接觸得多咗，某啲位變咗要放手俾佢哋自己探索自己，包括佢哋嘅興趣、長處同短處，就唔需要我哋太過操心！
「佢有佢嘅命運，佢有佢嘅際遇，佢遇到嘅嘢，未必同你以前經歷嘅一樣，
「所謂教小朋友，唔係一定要跟你，一定要咁做，咁就叫教小朋友，佢有佢自己諗法，自己空間。
「佢始終都要自己成長，你只是在旁鼓勵，或者佢唔係喺一條正確嘅路上，你就輕輕帶領佢重回正軌，我覺得都唔可以強迫佢哋。」
小題：閉關溫書抑鬱爆喊
自言鬥心強不會輕易放棄的她，近日忙於拍網上節目，又要應付考試，又要實習功課，每天只能睡三、四小時，日前更因閉關溫書抑鬱爆喊。
「香港地壓力人人都有，做運動嚟減壓係一個最好方法；實不相瞞，我早幾日閉關讀書讀書，平時我有做開運動，我閉關鎖住自己喺房度，其實我係有啲抑鬱，我讀讀吓書喺度喊，感到好辛苦！可能我冇做運動呢！我冇嗰啲荷爾蒙令自己減壓，令自己開心啲，所以我即使好忙都會抽半個鐘頭做運動，好似而家好流行嘅HIIT，嗰啲做半個鐘可能就達到，跑步一個鐘嘅運動效果。」
雖然瞓身博到盡，但歐倩怡表示不想借他人名字去取得幫助，希望成敗得失都由自己負責！「所以某程度上，我唔係好鍾意因為某人關係，而令我得到咩嘢着數，我其實想自己係獨立個體，咁樣先至係屬於自己嘅成績。」 ![外表童顏的歐倩怡，直言讀營養學對身心健康都有幫助：「營養學嘅範疇好廣闊，好似讀醫科咁，但讀醫科，都要係有病先會幫到自己，唔似讀營養學，幾時都可以幫自己，真係好多益處！」]()
- 外表童顏的歐倩怡，直言讀營養學對身心健康都有幫助：「營養學嘅範疇好廣闊，好似讀醫科咁，但讀醫科，都要係有病先會幫到自己，唔似讀營養學，幾時都可以幫自己，真係好多益處！」
![好學不倦的歐倩怡，用十年時間拿了兩個degree，近日再同時修讀「體育及運動營養學碩士」及「社區營養深造證書」。]()
- 好學不倦的歐倩怡，用十年時間拿了兩個degree，近日再同時修讀「體育及運動營養學碩士」及「社區營養深造證書」。
![婚後歐倩怡專心相夫教子，不時被拍到接送一對寶貝仔女返學，名副其實廿四孝好媽媽。]()
- 婚後歐倩怡專心相夫教子，不時被拍到接送一對寶貝仔女返學，名副其實廿四孝好媽媽。
唔想喺屋企搣手指 歐倩怡承認自己鍾意接受挑戰，增進學歷的同時亦令她廣闊視野，現在的她很清晰去走每一步。
「如果只係做師奶，唔係我性格，或者有啲人鍾意嘅，但我唔係嗰類人，我覺得而家時機適合，我啱啱讀完書，又簽咗經理人公司，嚟緊啲節目又會出街，開始慢慢去建立一啲嘢，到佢哋（仔女）去晒外國讀書，我唔使留喺屋企搣手指，我都有自己一啲嘢做！」
難怪明明可以做幸福少奶奶有人養生活無憂，歐倩怡卻積極去建立事業靠自己搵技能維生，真係幾估佢唔到！
撰文：琪琪
攝錄：曾衞惠
場地提供：英皇駿景酒店 ![歐倩怡以「洗濕咗個頭」形容自己，表示一定會完成更高的營養學課程，希望發展自己另一個專業。]()
- 歐倩怡以「洗濕咗個頭」形容自己，表示一定會完成更高的營養學課程，希望發展自己另一個專業。
![歐倩怡認為壓力全因預備不足。「安仔有一樣嘢教小朋友係好好，佢話如果你覺得考試或者上台一刻，你有壓力或者會驚，你諗吓自己有冇well prepare ，呢個係一個幾好嘅提醒！」]()
- 歐倩怡認為壓力全因預備不足。「安仔有一樣嘢教小朋友係好好，佢話如果你覺得考試或者上台一刻，你有壓力或者會驚，你諗吓自己有冇well prepare ，呢個係一個幾好嘅提醒！」
----------------------------
壹週刊 31年 和你壹路同行
回顧31年走過的路
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
- 外表童顏的歐倩怡，直言讀營養學對身心健康都有幫助：「營養學嘅範疇好廣闊，好似讀醫科咁，但讀醫科，都要係有病先會幫到自己，唔似讀營養學，幾時都可以幫自己，真係好多益處！」
- 好學不倦的歐倩怡，用十年時間拿了兩個degree，近日再同時修讀「體育及運動營養學碩士」及「社區營養深造證書」。
- 婚後歐倩怡專心相夫教子，不時被拍到接送一對寶貝仔女返學，名副其實廿四孝好媽媽。
- 歐倩怡以「洗濕咗個頭」形容自己，表示一定會完成更高的營養學課程，希望發展自己另一個專業。
- 歐倩怡認為壓力全因預備不足。「安仔有一樣嘢教小朋友係好好，佢話如果你覺得考試或者上台一刻，你有壓力或者會驚，你諗吓自己有冇well prepare ，呢個係一個幾好嘅提醒！」
來源 source: http://nextplus.nextmedia.com
|
鍾意就快D Share啦！
|
|
|
