《農情家園》︱南韓邵音音 問鼎奧斯卡︱吾港戲(尹學仁)
- 發布日期：2021-04-24 11:50
已複製
本欄應該主要講本地電影，不過今個星期半破例。上星期介紹過香港一位新晉肥妹演員蔡裕彤，今個星期要介紹另一位女演員，來自南韓，已經 73 歲，名叫尹汝貞。
上個周末去灣仔香港藝術中心，睇完一部 2019 年南韓輕喜劇，戲名譯做《幸運是她》，講一位 40 歲電影女監製全心投入事業，不過導演拍檔突然逝世，被失業仲要搬到偏僻山區，向一位老太太（由尹汝貞飾演）租一間房住，展開無聊生活，包括淪落到幫朋友做清潔，遇到意中人又表錯情，仲要被鬼纏，而隻鬼又自稱為張國榮。
部戲好妙，仲幾好笑，張國榮個角色（演員個樣跟本同張國榮差天共地，不過《阿飛正傳》底衫造形非常絕）特別好笑，對香港觀眾亦別具意義。
如果錯過《幸運是她》，可能要上網絡平台搵搵。導演本身正正監製，向來為國際影展寵兒洪尚秀服務。不過洪導演幾年前鬧不倫，同自己班底反面，結果促成金牌監製的起心肝，第一次做導演，拍出一個半自傳輕喜劇，人生如戲。
今次放映來自一個叫「韓女獨有戲」影展，其實由香港藝術中心同幾個南韓單位合辦，部部戲都由南韓女導演執導，都屬於獨立製作，影展一直搞到七月，大家可以留意留意。
不過今個星期新上畫電影，仲有另一部由尹汝貞主演，叫《農情家園》，並非南韓電影，其實算做荷里活獨立電影，幕後搞手包括 A24 以及 Plan B 兩間荷里活當紅獨立電影公司，作品近年經常揚威奧斯卡，而 Plan B 老闆正正靚佬演員 Brad Pitt。
所以《農情家園》都有 Brad Pitt 做監製，今屆奧斯卡都有提名，尹汝貞已經橫掃多個國際大獎，故事講一家四口南韓移民，由加州搬到老遠阿肯色州，因為男戶主拒絕一世做工廠，希望買地務農，種韓國植物，打其他韓國移民市場，自主命運；不過貧賤夫妻百事哀，日日嘈交，即使未受種族歧視，都畢竟屬於少數族裔，萬事起頭難。故事中段開始，女戶主把母親（尹汝貞）由南韓帶到美國。外婆英文識條鐵，同兩個外孫關係到生活細節都非常好睇。
今日香港人人移民，今個夏天離開香港之前，睇一睇《農情家園》就最適合不過。電影本身來自美藉韓裔導演家族真人真事，能夠令美國人都去睇韓國移民故事，皆因講到底，其實都離不開「American Dream」，某程度都好大美國。
不過《農情家園》難得拒絕煽情，依然拍得真摰感人；條線，講真，其實好難拿揑，提名奧斯卡實至名歸。當然編導之外，部戲個個演員都做得好好，尹汝貞之外，飾演細仔位童星亦超級搶鏡，極之可愛。套戲早三個星期，先在香港國際電影節首映，大受觀眾歡迎，映後談有導演視象分享，原來竟然有親人住在香港。
----------------------------
壹週刊 31年 和你壹路同行
回顧31年走過的路
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
來源 source: http://nextplus.nextmedia.com
|
鍾意就快D Share啦！
|
|
|
