掃呢頁CODE去手機

2014年1月17日 星期五

[忽然1周 964] 撬杜如風牆腳 王菀之 Figure王秘密同居 Figure王,王菀之,蘇勳,MW,




默認同居

記者追問兩人是否同居,王菀之未有回應,但就全程冧笑,而男友 Eric So就乖乖在旁守候。

打頭陣

撬杜如風牆腳 王菀之 Figure王秘密同居

32歲的斯文盛女王菀之,最近在新戲《金雞 SSS》做妓女,不但要發姣被摸胸,更要同鄭中基牀戲激吻,其豪放演技,連吳君如都激讚。

唔講唔知,王菀之外表溫婉冇殺傷力,但其實嗲功驚人,更會主動出手,難怪曾與不少唱片監製、填詞人暗撻。去年中,王菀之更暗中出手,姣搶「日本通」杜如風男友、著名 figure設計師 Eric So(蘇勳),更成功鵲巢鳩佔,兩個月前進駐昔日杜如風與 Eric的九龍城愛巢,秘密住埋兩個月。

周一( 13日)晚,本刊終於拍得她與男友十指緊扣齊齊返愛巢。

其他影片

入行以來,王菀之緋聞一直不多,之前與密友張敬軒製造煙幕,無非為增加曝光率。王菀之雖然表面上傻更更,但其實溝仔有法,出手必中。和她合作過的唱片監製 Alex Fung、作詞人陳永謙同梁柏堅,都被其冧功融化而拍拖。

去年十月,王菀之已不時向身邊工作人員透露自己拍拖,又大讚男友對自己體貼。不過,當被問到男友身份,她卻又大賣關子,故作神秘。

《金雞 SSS》

《蘋果日報》圖片

全黑掩面

記者連日採訪,終於在本周一( 13日)晚九時,發現王菀之與男友一同離開九龍城「松林」愛巢,而其男友正是與圈中人熟稔,外號有「 figure王」之稱的 Eric So。二人為了掩人耳目,全黑打扮,王菀之更將 cap帽遮住大半邊臉。一路上,兩人十指緊扣,王菀之不時對男友報以甜笑。

兩人步行至附近的茶餐廳撐枱腳,雖然貴為明星,但王菀之並不介意踎茶餐廳。全程有講有笑, Eric更不時夾菜餵女友,非常體貼。之後他們再到地茂館買糖水外賣。

拖手斷正

本周一( 13日),本刊發現王菀之和男友 Eric So十指緊扣行九龍城,王更刻意將帽壓低遮面,掩人耳目。

耷頭掩飾

當晚兩人先食魚蛋粉,之後再去買甜品外賣。甜品店人多,王菀之怕被人認出,全程耷頭㩒電話。

返家冧笑

被記者踢爆同居後,王菀之和 Eric步行返回愛巢「松林」。入大門前,王菀之轉身冧笑,甜到漏。

杜如風(中)是旅遊節目主持,亦是著名的日本通,父親是前嘉禾宣傳部經理杜惠東(阿杜)。近年杜如風和劉心悠及卓韻芝拍過脫毛廣告,廣為人知。

微博回應甜蜜

2011年,杜如風和 Eric曾被傳媒影到拍拖照。當時杜在微博話暗戀 Eric好耐, Eric就反問點解唔早講。擺明曬甜蜜。

默認同居

當王菀之與 Eric到達寓所樓下時,記者上前影相。王菀之表現尷尬,拖住男友的手即時鬆開。記者為了打開話匣子,於是笑住問王菀之幾時得閒陪男友打邊爐,王菀之風騷表示:「搵日啦!」記者再問兩人是否同居?王菀之冧笑不語。而 Eric則表現淡定,全程在旁守護女友。

其實,王菀之能夠在獵男無數的杜如風手上,搶走著名 figure設計師兼潮流創作人 Eric So(蘇勳),勝在手段進取又黐身。為了方便男友,兩個月前,有圈中小富婆之稱的王菀之秘密搬往 Eric的九龍城「松林」單位共賦同居。

「上年王菀之搵漫畫家小克合作搞漫畫,識咗小克老死 Eric。 Eric當時同拍咗兩年拖嘅 Helen(杜如風),因為聚少離多冷戰緊。王菀之見到 Eric唔開心,就主動講爛 gag冧佢,仲勁黐身,成日扮小女人要人照顧,不過 Eric好受呢套。 Eric之前都同朋友呻過 Helen(杜如風)太硬朗,相反王菀之夠溫柔體貼,加上王菀之又成日讚佢叻,𠱁到 Eric飄飄然。佢哋話咁快撻著, Helen發現唔妥時已經太遲。

「去年中,王菀之喺傳媒面前突然自爆恨拍拖,又話當時好多人追,其實都係講俾 Eric聽,逼佢同 Helen斬纜。 Helen覺得輸俾王菀之好冇面,所以佢同人哋講係佢先向 Eric提分手。冇幾耐 Helen就翻撻黃又南,不過拍咗一陣都係分手收場。」知情者說。

靠小克搭路

王菀之去年同漫畫家小克合作畫漫畫,又搞過慈善簽售會(圖),因而認識 Eric So。

王菀之奪得《叱吒》女歌手銅獎後,曾表示 2014年是「創作爆發年」。愛情有著落,應該增加佢唔少創作靈感吧!《蘋果日報》圖片

王菀之 2011年以二千萬購入灣仔「尚匯」,去年更一筆過還清貸款。不過王菀之有千呎豪宅唔住,反而住在男友月租萬八元的九龍城「松林」 6百多呎單位(右),可謂紆尊降貴。

森美老婆呷醋

多年來,王菀之靠住獨門嗲功,事業扶搖直上。「初初入行時,王菀之成日向製作人發電,嗲聲嗲氣,次次主動出擊搵仔『抄牌』,好多創作人都死喺佢呢招度。班男人咪仆心仆命幫佢鋪橋搭路做好音樂囉。嗰時佢為咗令森美幫佢打好與商台 DJ嘅關係,咪狂電人,經常約佢出嚟囉。森美老婆 Veronica收到風,仲同老公嘈過。」

其實王菀之在以往的訪問中,亦話過自己外表斯文,內裏 open︰「我表面矜持,但私底下很積極,會周圍叫朋友介紹男仔俾我識。同幾個正經好男仔拍過拖,結果都係因為悶而分手。其實悶係藉口,係我變心。」講到明花心兼主動,呢個鮮為人知的一面,只有王菀之自己最清楚,至於被搶男友的杜如風,由於不在港,未能聯絡得上。

君如讚出色小雞

為拍《金雞 SSS》,王菀之一改斯文形象,在戲中有摸胸及激吻場面,又唔介意著得貼身暴露,連君如都激讚她是出色小雞。《蘋果日報》圖片

黑 bra誘惑

其實王菀之都是有料之人,去年她翻唱張敬軒的歌曲〈迷失表參道〉,拍 MV時以低胸黑喱士 bra上陣,酥胸盡露。

王菀之去年在《老表,你好嘢!》和王祖藍做情侶備受好評,令她得到君如賞識,接拍《金雞 SSS》。《老表》今年拍續集《老表,你好 hea!》,繼續預埋王菀之。

王菀之去年承認曾與填詞人梁柏堅拍拖,但有傳男方有感她太黐身,最後決定分手,梁轉追陳淑莊。《 Face》圖片

專溝女星

Eric So與圈中人熟稔,加上身形弗爆,曾溝掂唔少女星,可惜近年髮線向上移,漸變麻甩。

07年撻盧巧音

07年 Eric同盧巧音撻著,但 08年因為女方逼婚而分手,當時 Eric前額已經見光。

96年戀蒙嘉慧

早在 96年, Eric已經同現任「伊健嫂」蒙嘉慧拍拖,兩人一拍就六年。圖片

Eric So日本響朵

1970年出生 Eric So(別名蘇勳,真名蘇卓航),中學畢業後修讀設計課程,加入廣告行業十年後, Eric開始設計首辦公仔事業。

96年,他多次舉辦大型的玩具展覽, 99年一套李小龍系列公仔打進海外市場,並被日本玩具大廠「 Medicom Toys」睇中,一口氣買下他全部李小龍公仔版權,令他搵到第一桶金。

他在行內享負盛名,曾與大品牌可口可樂、 KFC等合作,今年更進軍服裝界,和李寧牌合作,推出自家眼鏡系列。

Eric不時和名人合作,他曾試過為黃玉郎設計《龍虎門》公仔。

Eric近年進軍服裝界,身為潮人的他,和陳冠希亦是好友。

Eric亦有為雜誌做 model,扮漫畫《進擊的巨人》示範潮服。《 Next One》圖片

微博互讚

去年 7月,王菀之出席活動時就自爆有圈外人向自己展開追求,當時 Eric So剛與杜如風冷戰,難怪她開始不避嫌與男友微博互讚。

去年 6月, Eric So首次在微博轉發王菀之新歌〈 First Love〉,並留言讚:「〈 First Love〉∼得!!!」而王菀之亦即覆他一句 fank kiu加 lum笑表情。

去年 10月,王菀之亦上載了一幅畫作,標籤 Eric So及小克。又公開大讚雕塑非常厲害,稱 Eric為「大師」!

今年 1月,王菀之更加在微博公開為男友 Eric So在灣仔會展的授權展宣傳,更呼籲行家萬勿錯過。

好勝爭仔

王菀之外表冇殺傷力,但喺情路卻主動出擊,對象就算已有未婚妻、女友,她都一樣力爭到底。

爭輸張繼聰

王菀之初出道時對張繼聰特別仰慕,雖知道張繼聰當時已有女友謝安琪,但亦不避嫌疑主動親近。 07年懷孕 5個月的謝安琪在九展舉行音樂會期間,忽然話:「相信感情可以直到永遠,除非有人中間做錯。」暗示張繼聰不可一錯再錯,張即時上台識做示愛,而當時在台下的王菀之則酸爆。

狂電森美

王菀之與有婦之夫的森美在 07年過從甚密,她雖然明知森美已有家室,但亦不顧一切找森美,以合作為由借意親近。不過後來森美老婆收到風,兩人關係才疏遠。

暗撻 Alex

王菀之與音樂才子 Alex Fung合作無間,更以「好閨密」相稱,兩人是十幾年的中學同學。有傳積極進取嘅王菀之曾力追 Alex,可惜當時 Alex心繫未婚妻,令她罕有失手。

其他影片


鍾意就快D Share啦!