送別六叔
上周四（ 9日），曹眾以「家人」身份現身香港殯儀館，送六叔走最後一程，離去時她滿面通紅，神情哀傷，由友人攙扶離開。
滾熱辣
六嬸禦准貼身服侍 曹眾住豪宅開食府
巨人六叔邵逸夫爵士上周二（ 7日）安然離世，低調的六嬸在短短兩天內，火速為先夫設靈家祭，其間謝絕外人，過程高度保密。不過在出席的「家人」當中，六叔的紅顏知己曹眾竟離奇現身，在喪禮中更哭成淚人盡現傷感，足見她與六叔關係密切。
本刊收到消息，得六叔六嬸提攜，近年轉戰飲食界的曹眾，除了入住九龍站上蓋豪宅君臨天下，更分別在尖沙嘴及灣仔連開兩食府，財力逼人。
曹眾難捨六叔，至於一直為先夫劉家良追討 500萬花紅的翁靜晶，卻誓言追到底：「已經搵咗冼國林幫手，等佢（六叔）白事過後先再追！」忙完六叔身後事的六嬸，看來依然有手尾跟！
叔在世時受人尊敬，很多藝人、朋友都希望到靈堂送他最後一程，但不少藝人卻被六嬸拒諸門外，即使行政長官梁振英亦不例外。不過鑑於六叔生前愛熱鬧，所以六嬸將於周五（ 17日），在將軍澳環保大道邵氏影城舉行追思會，更對外開放，讓市民可以到場緬懷這位一代巨人。據知，已答應出席的藝人包括周潤發、成龍和張曼玉等。
與六叔有廿年緣份
至於面子大過梁振英，有幸被六嬸邀請出席喪禮的曹眾，據知在追思會當日，同樣會以「家人」身份現身，可見她在六叔六嬸眼中，身份地位較任何一位藝人都重要。周日（ 12日），曹眾出席港台活動時，被問及與六叔的關係，她面帶哀傷地對記者說：「我未入行前已經識六叔六嬸，同佢哋有廿年緣份，其實叫我入邵氏嘅人係六嬸。方姐好忙，成日唔得閒，就會叫我陪六叔睇戲，其實六叔唔係真係要人陪，只係佢每次睇完戲，都想搵人同佢傾嚇套戲講乜。佢哋成日受邀去中國唔同省份旅行，我有幸可以隨團陪佢哋，因為咁我有唔少得著。（點解六叔六嬸會欽點你？）……我都唔知點解，或者我識講上海話，六叔又識聽，所以特別投契啦！」
帶挈開食府
早已淡出幕前的曹眾，因為六叔離世，名字又再重現。據本刊得知，今年 44歲的她，多年前淡出幕前後，與六叔六嬸關係卻未見生疏。由於曹眾本身在內地人脈廣，加上得六嬸扶持，令她在三年前進軍飲食界。短短兩年間，更在尖沙嘴和灣仔開了兩間面積有五千多呎的寧波菜食府「文鼎酒家」。
知情人透露：「其實 JoJo（曹眾）之前喺無綫做旅遊節目，識咗好多內地商家，其中一個係向陽漁港集團嘅老闆朱曉霞。朱老闆本身喺國內唔同省份開咗 40幾間酒家， JoJo覺得有得做，咁啱朱老闆同六嬸係世交，得六嬸穿針引線之下， JoJo最後成功同朱老闆合作。兩年前，佢擲咗五百萬出嚟，喺香港開咗兩間『文鼎一、二號』。」
對於開食府，曹眾雄心壯志對本刊記者說：「嚟緊我會再開三、四、五號，除咗主攻寧波菜，仲會有海鮮同上海菜。希望可以發大嚟搞！」對於得六嬸關照，她直認不諱說：「六嬸真係好錫我！」除了開食府外，曹眾三年前與內地商人陳京秘密結婚，近日亦以五萬元租住九龍站上蓋的君臨天下，可見得六叔六嬸帶挈下，曹眾財力地位超然。
曾是解放軍
今年 44歲的曹眾，生於浙江省溫州市， 11歲便被徵召加入解放軍，因能歌擅舞故被派入軍中歌舞團。 13歲再南下廣州軍營受訓，其後加入廣東電視台，離開軍隊時曹的職銜已升至中校文藝兵。因六叔與曹眾同屬浙江同鄉，故早已認識， 93年更由他與六嬸推舉曹簽 TVB。
曹眾在 TVB參演過逾三十部劇集，多演配角，直至○○年在紀念鄧麗君的音樂劇《星光縈我心》上扮演偶像，被讚「似足真人」，才令人留意。
07年她約滿無綫後便開始從商，分別出任浙江省政協及浙江省溫州市委黃山旅遊大使， 11年 2月秘密與富商丈夫陳京誕下女兒瑛華，同年 4月在尖沙嘴 iSquare開設「文鼎一號」， 12年 5月再在灣仔大王東街開分店「文鼎酒家」。
六叔之追舊債 冼國林助師母討債 翁靜晶：錢一定要追
六叔逝世後遺下不少情緣外，亦遺下了一筆舊債。去年 6月著名功夫片導演劉家良因病與世長辭，出殯時遺孀翁靜晶大爆邵氏拖欠劉家良電影分紅多年，冇五千萬都有五百萬。
在法律層面上，「分紅事件」早已過了合約訴訟期，但翁靜晶大打慈善牌，名正言順幫助一班演藝界的龍虎武師，贏盡口碑。劉師傅尾七當日，有無綫員工對翁靜晶說分紅應該「冇得追」，當時翁說：「我會等方小姐（方逸華）——應該係邵爵士夫人——嘅答案。之前一直等佢打俾我，點知佢冇打。如果佢唔方便咪我打囉，始終佢係長輩。」其後她多次致電六嬸但都飛去留言。
為追債轉低調
無綫其後因為違反《廣播條例》被罰款 90萬元，翁靜晶多次在網上發功：「罰得太少了！這類合約，和劉家良與邵氏所簽相同，刻薄，霸道。」之後劉家良舉行離世百日齋宴，翁突然收口，「對方話如果我低調啲，會考慮俾錢。如果收到善款，佢要我作任何讓步都會做。」
正當外界以為事件告一段落，兩個月前翁靜晶又在網上表示曾致電六嬸，但她表明身份後即獲對方「卡通聲」回應，並由另一男士接聽。此事令翁靜晶大怒：「說甚麼『低調收聲』有商量？罷了！人在做天在看，公道在人心。」翁靜晶表明希望邵氏一方於劉師傅上位（安放骨灰儀式）前（ 2月 13日）回覆，無奈邵氏刻意迴避。至 1月 7日六叔離世，正歐遊的翁靜晶只在網上慨嘆「能夠主持公道的唯一證人已歿」。周日（ 12日），她返港後首次現身回應。
記：記者 翁：翁靜晶
記：六叔啱啱離世，會唔會繼續追討花紅？
翁：錢一定要追，但所有事都交俾冼國林跟，劉師傅會喺 2月 13日上位，要俾啲時間人考慮，唔想喺呢個時期加重人哋嘅……等白事過後先再追。
記：方小姐有冇聽你電話？
翁：有聽嘅！不過扮卡通人物囉！依家應該俾啲空間人，冼國林話會負責，希望佢會有答案俾我。
記：如果邵先生未過身，仍然清醒，會唔會俾番啲分紅？
翁：應該會！邵先生一直視劉師傅為愛將。一路以來我對呢件事好有信心，信心嚟自對邵先生嘅信心。
記：如果對方賠少過你要求嘅 500萬，會唔會接受？
翁：募捐係講心意，我梗係貪心啲講理想嘅數字。或者人哋會俾更多數目呢，我都會好樂意接受，但唔可以逼人哋捐幾多！
記：佢哋唔俾，會唔會有法律行動？
翁：人情同道理係咪一定要訴諸法律？有時有能力做一啲嘢，未必一定要做，呢個都係胸襟同器量嘅問題！
先捐一百萬
翁靜晶顯然想以和平方法去解決，記者致電負責幫翁靜晶追數的冼國林，他表示現處於磋商階段。「我同劉師傅廿幾年師徒關係，翁靜晶係我師母，有事當然要幫手啦！依家仲同對方磋商緊，大家都希望以和為貴。依家六叔都唔喺度，冇人知道分紅嘅正確數字，所有嘢都會等 2月劉師傅上山，同埋六叔後事完結再傾。」他又稱所有分紅都會撥捐入「劉家良導演慈善基金」，幫助武術界做龍虎武師的朋友，無論邵氏會否捐贈，師母翁靜晶都會先捐一百萬。
翁靜晶今次絕對搵啱人，冼國林除咗係電影出品人、武術高手外，仲係香港第一信用財務的主席，
收數經驗豐富。
六叔之追思會 巨星齊撐追思會
六叔的追思會由無綫製作資源部總監樂易玲及邵氏高層黃家禧負責統籌。
六叔於上周四（ 9日）、五（ 10日）設靈出殯，喪禮僅以家祭形式，有不少後輩藝人想入場致祭都摸門釘。而六嬸日前在多份報章刊登啟事，公布追思會將會於本周五（ 17日）在將軍澳邵氏影城舉行，屆時將開放邵氏最大最新的三萬呎一號錄影廠，讓公眾、政、商及演藝界的朋友作最後致敬。據悉出席追思會的演藝人橫跨三代，由早年邵氏出身的狄龍、王羽、嶽華、淩波、惠英紅等，以至無綫出身的周潤發、劉德華、張曼玉等巨星均會出席。無綫企業傳訊部副總監曾醒明表示，為貫徹六叔生前低調、簡樸的作風，籌委會要求到場人士不用穿素服、打黑呔，更加不會送花圈、花籃、帛金、祭幛等，有心人只需向六叔遺照三鞠躬就足夠。
日期： 2014年 1月 17日（星期五）
公眾開放時間：上午 10時至下午 6時
地點：新界將軍澳環保大道 201號
邵氏影城 1號錄影廠
前往方法：港鐵坑口站的九巴 298E及
將軍澳站的新巴 797E均會
途經環保大道，另外尖東
前往日出康城的新巴 796X
巴士亦會途經。
|
鍾意就快D Share啦！
|
|
|
