黎瑞恩嫁入豪門 11年，至今手頭上並無任何物業或公司。佢上年開始上仁愛堂籌款活動獻唱，又開慈善演唱會，試定市場水溫，為將來可能要努力賺錢，送仔女去英國讀書而鋪路。
《蘋果日報》圖片
媽咪姐
驚傳婚變 40歲黎瑞恩重新振作
啱啱 40歲嘅黎瑞恩再次話俾我哋知，豪門少奶真係唔易做！最近有報道話小恩子同金利來三少曾智明嘅 11年婚姻出問題，據傳男方近年長駐內地打理家族生意，兩夫妻聚少離多，兩年前開始丈夫仲有一位廣州女密友，更加係極少返屋企。黎瑞恩為對仔女啞忍多時，終於喺幾個月前試過搬出九龍塘曾家大宅。小恩子回應婚變傳聞時，眼都紅埋，叫記者唔好問佢，真係我見猶憐。
不過，冰封三尺，非一日之寒。媽咪姐知道黎瑞恩其實已收拾緊心情，準備將全副精神好好照顧一對仔女。就喺婚變消息傳出前一晚，黎瑞恩請曬成班上年 11月幫佢搞演唱會嘅工作人員、前寶麗金同事加埋好友劉小慧、林漪娸等，喺上環一間餐廳包場食飯，慰勞大家之餘，亦為未來可能復出探嚇路。據在場人士講，小恩子全晚表現平靜，同大家有傾有講，又問嚇依家圈中情況，但就無提過老公曾智明。
而上年有份幫佢搞慈善演唱會嘅多年好友盧敏儀就話：「上年 Ricky（曾智明洋名）仲向我訂咗好多飛俾啲客喎，都唔知傳聞真定假？可能兩公婆嗌嚇交啫，希望佢哋好快無事啦。」唉，大家有眼睇，黎瑞恩多年來為個家真係出心出力。無論點都好，媽咪姐喺度祝佢快啲開心番！做番我哋印象中成日笑到瞇曬眼嘅小恩子啦。
|
鍾意就快D Share啦！
|
|
|
