身為愛護動物協會會長的傅明憲，每年都帶愛犬出席「人狗百萬行」。北京狗 Fifi仲係狗醫生㖭，同媽咪一樣咁有愛心。
星天下
動物守護天使 傅明憲
筆者認識 Gigi（傅明憲）也有十多年了，由退出幕前轉到社交圈，變了葉劍波太太又離了婚。她身邊的朋友大抵轉變了很多回，然而她愛護動物之情始終不變。個人認為愛錫貓狗的人都有良好品格，養寵物或多或少反映了主人的性格和人生。
愛護動物協會（ SPCA）始創於 1921年，由當時的港督夫人跟一班英國太太團發起成立，原因受不了中國人不太懂尊重小生命，吃狗肉、猴子腦在那年代並不出奇。曾經叫作「愛護禽畜會」和「防止虐畜會」的 SPCA，現有六間分社遍布香港各地，可同一時間收容三百隻狗和貓，甚至倉鼠、兔仔、烏龜、蛇、蜥蜴等動物。 Gigi當上愛護動物協會會長九年了，她說：「其實香港政府對我哋資助好少，好彩有好多善心人，好似美心集團創辦人伍舜德先生生前設立基金每月資助個會，又有有心人指定死後捐咗間屋俾我哋做梅窩嘅分社，真係要靠好多熱心人嘅支持。」 Gigi謂其實好多人有誤解，以為見到流浪貓狗就打電話給漁農署。「你知唔知漁農署都係打俾我哋 SPCA去處理，通常擒出窗口同燈柱救貓狗嘅係我哋久經訓練嘅職員嚟㗎！」
最近虐殺流浪貓狗案兩名罪犯重判入獄 16個月， Gigi表示長遠要加重刑罰才有效。「香港人真係仲喺學習階段，我哋經常教育啲人唔好過時過節送寵物俾男女朋友，情人節聖誕節後一個月我見過太多人玩厭咗就交俾我哋，又或者分咗手就唔想再見到隻寵物咁。」 SPCA也有開班教養寵物之道，而人狗一起上的班則每次都火速滿額。 Gigi自小養狗，北京狗、西施狗、唐狗等都養過。「狗比較黐身，要成日陪伴，尋找安全嘅感覺；貓比較獨立，始終體積小適合香港人，至於養蛇同蜥蜴嘅人就覺得呢類寵物好型好靚，要別樹一格。」
雖然眼見很多受傷動物很可憐，但 Gigi反而不擔心，因為香港仍有不少有愛心之人。「好似呢隻單眼貓，好快已經有人領養，嗰邊隻大狗都有個有心人收養咗。」 Gigi見盡社交圈人情冷暖，面對動物反而簡單得多：「以前做東華總理有好多交際應酬要面面俱圓，依家一切都嚟得比較單純直接。」 Gigi正忙於籌備本月十九日於迪士尼舉行的「人狗百萬行」，是 SPCA每年最大籌款活動。其實做人、做善事與養寵物一樣，不用想太多，隨心便去做吧！
|
鍾意就快D Share啦！
|
|
|
