陳國邦險遭電話騙財
湯唯日前在上海被電話騙徒騙走21萬人民幣，原來陳國邦數周前也遇上電話騙徒而險損失6萬人民幣，當晚騙徒以內地手機致電阿邦，由其太太羅敏莊接聽，由於騙徒聲音跟阿邦好友、任導演及武指的熊欣欣（七哥）極似，羅敏莊以為對方是七哥叫阿邦接聽，騙徒其後冒認七哥求救，聲稱在深圳帶小姐返酒店時被公安拘捕，著阿邦入6萬到其戶口擺平事件。幸阿邦入錢前再致電七哥的香港手提，始揭發遇上騙徒，未有招致金錢損失。
羅敏莊昨接受本報記者訪問時說：「嗰晚老公唔舒服，我幫佢聽電話，係內地電話號碼，一聽佢（騙徒）就話：『知唔知我係邊個？』我話唔知，佢就話：『有冇搞錯？上次先同你食飯。』咁啱阿邦同七哥食完飯，我咪以為佢，叫咗佢個名出嚟。我將個電話交畀老公，佢病到『瘟瘟沌沌』以為係七哥。佢（騙徒）話喺內地換咗電話，叫阿邦記番個號碼。」
【誤信騙徒】
1.羅敏莊代當時患病的陳國邦接電話，二人誤信對方是熊欣欣。
【急兌人仔】
2.陳國邦誤信冒牌熊欣欣需江湖救急，即到兌換店兌人民幣，準備過數。
【正版踢爆】
3.陳國邦致電熊欣欣才知被騙，幸保不失，熊欣欣透過電話鬧爆騙徒。
冒認熊欣欣索6萬
羅敏莊指翌日阿邦見到8個未接來電，全來自冒牌七哥，於是回電了解，她說：「佢（騙徒）同我老公講，話喺內地同啲朋友叫咗啲小姐，點知俾公安拉，叫阿邦過數落佢度，仲話唔好話畀老婆聽。咁我老公又真係唔話畀我聽，淨係話七哥有事。好在老公臨入錢前打七哥個香港電話，先知俾人呃！」她坦言執番身彩：「佢（阿邦）返到嚟俾我鬧爆，應該同老婆商量，情況好似《警訊》（啲個案）。」記低騙徒電話報警？羅敏莊說：「啲人話冇用，因為嗰啲人會掉咗張電話卡，阿邦又掉咗嗰個人銀行戶口號碼。」
對於遭冒名呃錢，熊欣欣前晚說：「陳國邦嗰日打嚟問我係咪喺香港，佢話喺兌換店門口，諗住攞錢去救我。後尾佢嚟我屋企冇耐，嗰個人（騙徒）就打畀佢，我梗係爆粗揭穿佢啦，對方即刻收線唔敢再打嚟！」
採訪：方圓
|
鍾意就快D Share啦！
|
|
|
