掃呢頁CODE去手機

2014年1月17日 星期五

[忽然1周 964] 志偉欽點 秋生搶會長位 陳芷菁劈炮:留我都唔做 秋生,曾志偉,志偉,陳芷菁,黃秋生,MW,




演協選會長,演變成秋生和陳芷菁之爭,二人近日更在微博互相暗寸,互相叫大家放過自己。

滾熱辣

志偉欽點 秋生搶會長位 陳芷菁劈炮:留我都唔做

近日,黃秋生與陳芷菁因為爭奪演藝人協會會長一職擘面,更各出奇謀拖馬玩嘢。周一( 13日),秋生率領莊思敏、郭少芸等踩上觀塘的「演協」辦事處,其間陳芷菁以「會章」為由阻撓未入會的他競選會長,黃秋生則上演一幕抽筋「典地」鬧劇。最終秋生「典地」成功,選會長一事擇日重選。

據知有人擔心藝發局戲劇組委員的秋生一旦當選,藝人隨時淪為政治宣傳工具,而一班保守會員眼見陳芷菁服務演協多年,亦有意捧她做會長。

兩方對壘,有志偉撐腰的秋生,近日雖被指背妻偷歡,但無懼再挑風雨,直指「大家依家都唔願見陳秘(陳芷菁)。」擺明踢她出局。秋生勢不可擋,強調按會章辦事的陳芷菁,向本刊憤然表示劈炮唔撈:「我辭職呀!留我都唔做。」

其他影片

志偉出曬口術幫秋生,睇怕陳芷菁都幾難力挽狂瀾。

演協「爭會長」風波愈演愈烈。背後有人撐腰,以為當選會長冇難度的黃秋生,連日來繼續連珠發炮,向當日請他吃閉門羮的陳芷菁挑機,直指對方未夠班:「佢咁耐冇嘢撈,我懷疑佢冇資格!」之後更列出三大條件,要求清黨,「第一,演協嘅秘書要做嘢,佢要幫我帶呢班人(指莊思敏等)入會;第二,我嘅人一定要齊腳,唔齊腳點做嘢;第三,大家依家都唔願見到陳秘,搞到咁仲點合作。」實行有你冇我。

當日以入會程序為由,將還未入表申請做演協會員的秋生拒諸門外的陳芷菁,事發後在微博重申:「對於一些藝人不知道申請、審批及提名才做(會長)候選人,可以與秘書處了解真相……我的崗位,要有這樣的堅持……請放過我小女子。」秋生高調爭會長,陳芷菁本來亦態度強硬辦事,不過她留言後不久就開始封嘴。不少傳媒致電向她了解,她欲言又止,明顯不想事件鬧大。

可搵老閉對質

陳芷菁和秋生原來曾同屬劉德華經理人公司,但二人合作機會不多,最深刻是 99年的《愛情夢幻號》。陳說:「其實我好欣賞秋生,佢轉數好快。」

記者多番致電陳芷菁,終於聯絡得上。對於秋生公開指控,最初不欲多談的她,亦忍唔住發聲反擊:「大家要入會,我無任歡迎,嗰度有閉路電視,大家可以睇番。我冇唔俾佢入嚟,我只不過按會規辦事,尊重番會規精神。」陳芷菁向記者解釋,早於上周六( 11日)已派人提醒秋生遞交入會申請表格,「至少要有會員資格,先可以參選,有啲手續係需要做。絕對唔係私人問題。」

認獲提名資格

去年 10月,曾志偉因為河蟹應對電視牌照風波而辭任演協會長後,會長一直懸空多時。本刊收到消息,演協內部有不少會員都推薦陳芷菁為下一任會長。知情人士說:「芷菁雖然喺呢行唔夠江湖地位,但勝在勤力,每次開會同活動都準時出席。佢未必有能力號令眾藝人,但有魄力令其他藝人服佢!」陳芷菁突然民望高企,搞到以為坐定粒六的秋生亦要高調出招。

其實論資排輩,秋生當然穩操勝券,奈何其火爆個性亦令不少會員卻步。知情人士說:「娛樂圈係圓嘅,藝人搵食當然唔想得失任何傳媒。不過秋生乜都亂嚟,我哋擔心佢小小事都會召集藝人遊行。」秋生去年 10月,成功當選為香港藝術發展局戲劇組委員。若他同時當選演協會長的話,有人擔心藝人隨時淪為政治宣傳工具。知情人士說:「其實秋生當初做藝發局委員,業內人士都好擔心,因為佢冇經驗,對藝術發展同行政唔熟。有時開會,佢連資料都睇唔明。所以今次佢 chur住做演協會長,希望班星幫手,令佢喺藝發局扶搖直上。雖然秋生身份尷尬,不過佢勝在同班德高望重嘅前輩 friend,加上佢人面夠廣,可以再踢一班新晉藝人同演藝學院舊生入會,所以佢當選做會長嘅機會好大。」

前會長曾志偉開到聲撐秋生,其實陳芷菁可以放一條生路俾秋生偷步入會。記者再三詢問下,陳芷菁義正詞嚴說:「我唔可以俾人種票,未做會員就選會長,對其他候選人唔公平。」她直認自己亦是會長候選名單之一,但坦言選中機會微:「候選名單成 30幾個人,係有人提名我。不過我認為自己唔夠資格,自己喺兩岸三地嘅人脈關係唔強,唔夠江湖地位。」

身兼藝發局戲劇組委員的秋生是梁粉之一,梁振英前年出新書,秋生亦有撐場。《蘋果日報》圖片

甘草互片

連日來在微博撐秋生的邵音音,爆出演協會址是由曾志偉買落,不過理事之一嘅梁珊就透過本刊反駁:「會址係好早期由籌款得嘅錢買,嗰時候都二百幾萬,佢(邵音音)平時好少理會務。」

決定憤然辭職

陳芷菁本以為有得與秋生鍊,不過連日來被秋生轟炸式洗禮,她最後選擇自己出局。據知秋生大鬧演協後,陳芷菁憤然向副會長請辭,她對本刊記者承認其事:「係呀!我辭職喇,留我都唔會做。我喺演協做咗七、八年,都係時候走。(秋生激到你辭職?)有啲嘢唔方便講咁多。我會繼續做會員,其實我唔怕辛苦,娛樂圈一呼百應,需要我時會參與。(如果佢哋唔留你呢?)留我都唔做!」

陳芷菁劈炮,黃秋生勝券在握,如無意外,下周二( 21日)舉行的投票大會,只要秋生取得會員資格,便可順利當選演協會長,呼風喚雨兩年。

周三( 15日),記者聯絡秋生,對於有人想捧陳芷菁做會長,秋生繼續口不饒人:「我就唔知,不過都似係啦,整個行為都似係啦。做咁多小動作,嘥人時間。(芷菁辭職喎!)唔做咪唔做囉,佢唔做我就返去選。(好多人撐你做會長?)撐咩撐呀,你估係黑社會。(等志偉返嚟處理?)等佢處理,我唔會理,我唔恨做。我唔係嚟分十萬九千七,冇利益嘅嘢,玩嚇手仲要蝕。我唔覺得佢有一個常務會議去審核(入會),又係閉門黑箱作業。(會章有冇提及常務會議?)冇呀,係唔知邊個突然黐咗條線食咗偉哥訂出來,任佢講,成龍入會都要審批,呢啲咪叫玩嘢囉。(你係藝發局委員,若果又係演協會長,身份尷尬喎!)藝術發展局有個機制,一向都唔使藝人宣傳,根本係兩樣嘢。佢哋都唔知藝發局係乜東西,叫佢哋搞清楚。」雖然秋生成功剷除異己,大有機會當選做演協會長,究竟有幾多票呢?會唔會多過梁特首呢?

陝西辣妹

被指與黃秋生於維園激戰的陝西姑娘魏璐,現年 26歲,參加過多次選美,最終奪亞姐全國網絡賽區冠軍,不過星路麻麻,工作量不多。早前,她與秋生合作拍戲,飾演對方女友。雖然被揭偷歡,但秋生就很放心說:「冇影響(當選會長)。」

典地重演

入會被拒

周一( 13日),莊思敏踩上演協入會,不過卻遭理事之一、負責會籍組的資深藝人梁珊,要求她出示合約證明藝人身份,及後更叫莊思敏離開。不久,秋生帶埋郭少芸趕到,見勢色不對,就叫陳芷菁出來對質。

當面對質

秋生一見陳芷菁,便立即手握會章大聲質問陳,說:「呢份會章冇講明要合約,你有冇新嗰份吖?」陳聽罷當堂語塞,並說:「我唔同你講呢啲!」秋生火起,向陳怒吼:「你唔同我講呢啲,咁你想講邊啲呀!」事後拉大隊走人。

發難典地

事隔一小時,秋生再踩上演協,怎料他與眾女星竟然連演協都入唔到,呂慧儀不停㩒鐘卻冇人應,秋生於是影帝上身,當場扮抽筋典地,場面失控。

演協冷知識

入會資格:根據會章,申請入會的藝人,必須獲得樂壇、電影、電視、電台、曲藝、舞台及幕後,其中四個界別中兩個會員認同為藝人身份及引薦,才可填表申請入會,入會費為$365。

會員投票權:成為會員後,可以有機會做理事。由十分之一的會員(約 60名會員)選出 21人成為理事,成為理事後,便擁有投票權,以不記名方式互選會長、副會長等職位,架構每兩年選一次。

挺黃派

王祖藍:我個人撐秋生,但內部討論唔方便講,應該保密。

莊思敏:秋生好敢言,佢絕對勝任做,只係個會唔夠靈活,啲人態度倔。

三哥:係我話要流會。我個人推舉秋生,希望佢令成個會年輕化。

保陳黨

肥媽:之前志偉叫我撐秋生,但依家我要諗諗。芷菁讀法律,堅持會規有道理。

薑大偉:做會長太激始終唔係幾好。

演協影響力

演藝人協會 1993年正式成立,成立目的是齊集中港台藝人的影響力,為兩岸三地舉辦慈善活動,若然發生對藝人不公及損害利益的事,該會也會發聲及集會抗議。

慈善籌款

發生天災人禍演協定必齊集藝人籌款,如 03年 SARS大匯演、 05年南亞海嘯籌款及 11年日本 311大地震燭光晚會(圖)等,多年來籌款數字已達數億。

為藝人發聲

02年女藝人被媒體刊登裸照,演協即舉行「天地不容」的聲討大會,劉嘉玲更上台發言。

反盜版遊行

有損藝人利益事件一旦發生,演協也會作出聲討。如電影界反黑幫暴力大遊行及反盜版活動(圖)等,務求借藝人遊行力量,喚醒市民的關注。

娛圈判官

黃秋生出名惹火,口沒遮攔,不時周圍辣火頭。邊個都冇面俾。

05年阿澤同田蕊妮結婚,秋生做過戥穿石,不過兩人關係今時唔同往日。

鬧杜汶澤 cheap

前年 5月,杜汶澤主演的《低俗喜劇》被指賣弄低俗,他以「低俗是香港核心價值」回應,即時惹來秋生不滿,鬧他整 cheap香港人。之後阿澤有份憑《低》片角逐影帝,當時負責頒獎的秋生亦暗寸阿澤︰「男主角五個候選人我睇好四個都有獎。」

秋生於《最佳男主角》訪問中,將羅志祥歌迷的狙擊,比喻成蒼蠅繞著糞便。

唔識羅志祥

12年 5月,秋生於微博一句「羅志祥是誰?」與對方粉絲掀起罵戰,他再反擊︰「恐嚇我的廢物們,我下星期在北京,有種的便來。」之後秋生再以「茂利」形容小豬,事件仍沒完沒了。

其他影片


鍾意就快D Share啦!