全城熱爆的娛樂八封新聞 & 時事趣聞 & 生活 + 趣聞
周一（ 24日），英皇喺會展搞春茗，現場除咗一班熟口熟面嘅歌手外，仲宣布周慧敏加盟，𠱁掂對方相隔 17年再出大碟。多隻香爐多隻鬼，一代玉女掌門人忽然入侵，英皇女歌手嘅排位表隨時有變。穩佔一姐地位多年嘅容祖兒，眼見情況有異，當晚除咗有備而來披上金色戰衣外，仲不時以主人家身份滿場飛。其實祖兒為公司搏曬老命，上年開騷更唱到聲沙，相信冇人夠膽取代佢囉！
碼實老闆娘 當晚祖兒坐主家席，更坐正老闆娘楊受成太太隔籬。祖兒好識做，頻頻同老闆娘密斟外，仲捉住對方自拍。
起勢應酬 現時戒酒保聲嘅祖兒，全程 natural high，主動走去其他枱應酬。佢同蘇永康傾偈時，更唔介意俾對方摸面㖭！
老闆護駕 周慧敏以神秘嘉賓身份現身春茗。佢落台嗰陣，仲有老闆楊受成親自護駕，排場十足。
成集郵目標 周慧敏喺後台訪問期間，就俾吳浩康同鍾舒漫捉住影合照。說周慧敏是當晚「最受歡迎歌手」，當之無愧！
