爆三點小秘密 Cara G.自認奶水多
混血模特兒Cara G.與丈夫Jesper昨日帶同初生的B女India Wilde Mcilroy到瑪麗醫院覆診，Jesper負責揹著小India，Cara則興奮地分享照顧BB的點滴，出生至今剛一周的小India非常可愛，Cara笑說：「BB好健康，之前肺部入咗羊水，所以要入ICU，今日嚟覆診。因為生咗接近40個鐘，好攰，需要用催生藥，但係最後都要靠自己。」經歷艱苦的生產過程，會否怕怕？她說：「真係驚，BB重3.6千克，但我下面太細，所以難生，如果下次再有BB，8個月就拎出嚟，我哋唔急生下一胎，想養好身體先。」
■Cara G.笑言BB是milk monster，她要夜夜辛苦餵哺母乳。
嘲囡囡似殭屍
現時Cara已開始餵人奶，但小India日夜顛倒，令Cara大感頭痛，她說：「記得我能夠連續瞓6個鐘已經係一星期前嘅事，𠵱家抱住BB餵奶，隻手好攰，好想死。」BB是否很難湊？她說：「唔係，我好多奶，但係乳頭太細，BB搵唔到，好難啜得實，如果佢啜到會飲得好快，佢係開心BB，但就好似殭屍，日間就瞓，夜晚就起身，又喊又玩，搞到我冇得瞓，好彩我有個好好嘅老公，佢會幫手。」Cara亦透露母親會留港兩星期，幫手照顧BB，但她卻希望每事親力親為，不想錯過BB成長的時刻。
採訪：譚倩宜
攝影：陳俊強
■Cara G.與Jesper的愛情結晶上周四誕生，小生命的來臨令二人大感興奮。
■小India昨日到瑪麗醫院覆診，全程做睡寶寶。
■Cara G.誕女後不忘在Instagram與大家分享喜悅，India樣子相當可愛。
|
鍾意就快D Share啦！
|
|
|
