【電視風雲】港視停拍劇 曾志偉:今次佢都好，起碼冇炒人
2014-03-12 14:53:00
(左 攝影: 陳俊強)
曾志偉同張學友今日喺觀塘出席捐助兒童癌病基金暨支票遞交儀式，佢哋早前為紀念梅艷芳逝世10週年，發起咗喺上年12月30號舉辦「梅艷芳.10.思念.音樂.會」，扣除一齊必要開支後有大約36萬收益，佢兩位就私下補貼到為50萬捐款。
學友喺台上面講到:「音樂會好成功，對阿梅有交代。 」佢兩個接受訪問時，志偉就話:「學友個人奄尖，佢都話成功就完滿。最緊要大家認同成件事。數字上係估計之內。」
不過學友就話數字喺估計之外，因為自己開頭諗住會係蝕少少。志偉又話唔會將音樂會製成光碟籌款，但就會私人錄製俾當日有份演出既藝人做紀念。問到會唔會送隻俾梅媽，梅媽又知唔知今次捐款?兩人就話一定會送，梅媽都知捐款安排。
講到今日有雜誌話志偉夜蒲攬女影相，對方係馬來西亞紋身師，志偉顯得一頭霧水，話要了解下先，不過學友就口快快講咗句:「係咪同馬航事件有關?」至於有外國預言家警告成龍可能將於2016或2017年遇上空難，志偉就話:「咩都有人講，不過以佢性格一定唔記得，所以我唔主張睇相，睇完有條刺。」
另外，講到今日有報道指無綫出招令香港電視開台計劃受阻，志偉就話:「TVB邊有咁叻呀，同埋一時三刻唔會做咁嘅事，不過今次佢(王維基)都好，起碼冇炒人，不過業界都唔想見到嘅，有競爭對手都係好事。」
志偉同學友今日出席捐助兒童癌病基金暨支票遞交儀式。
交收大支票
對於港視停拍劇，志偉話:「今次佢(王維基)都好，起碼冇炒人。」
|
鍾意就快D Share啦！
|
|
|
