2014年3月12日 星期三

[FACE 355] '14數聲聲 鄭俊弘 羅孝勇 王君馨 羅鈞滿 嚴勵行 鄭俊弘,嚴勵行,羅孝勇,羅鈞滿,王君馨,MF,




Fred不單唱歌勁,彈結他都掂,就連監製 Eric Kwok都大讚,佢話希望 Fred用結他融入 live表演,帶動觀眾情緒。

小報告

'14數聲聲

係,話題都仲係俾《星星》延續,個個韓風上身,港產嘢唔該借歪!不過咁,膠劇可以藐,但有心有力嘅熱血人,點都要支持嚇嘅!不提膠劇甚麼真人騷,純粹同你講靚聲,今年令人期待的畫面,就有《星夢》和《巨聲》彈出嘅鄭俊弘 Fred和羅孝勇 Sheldon出碟在望。

在無綫捱咗 12年, Fred終靠《星夢傳奇》圓夢;而 Sheldon就 3年作 50首歌,先爭取樂壇入場券,出碟做歌手。

鄭俊弘︰第一次好緊張

如果唔係歌唱比賽,應該冇人知 Fred係唱得之人。由拍劇做三、四線,到上台唱歌做主角,今年更可以出碟做歌手, Fred感恩地說:「可以做到歌手,好開心又好感恩,因為𠵱家工作多數都係圍繞住音樂,可以寓工作於娛樂。自己𠵱家一路錄緊歌,隻碟會有 8首歌, 7月就推出,大部分都係流行曲為主,希望有好成績。」

首次進入錄音室錄歌, Fred直言好緊張,「第一次入錄音室,其實真係幾緊張,所有嘢都好新奇,明白到錄歌係另一種藝術,係用唱嘅方式去演戲,同以往做騷、唱 live好唔同。」問到點睇同期新人, Fred說:「我有同 Sheldon同 Stephanie(何雁詩) jam過歌,大家一齊出道,希望大家都有好成績。」

今次 Fred的處男大碟,由 Eric Kwok擔任監製,他對 Fred的表現讚不絕口。 Eric Kwok說:「暫時寫咗 2首歌,好欣賞 Fred有自己想法,唱歌又好穩陣,錄音時教佢嘢,佢真係吸收到,加上之前已經認識,大家容易溝通,自己都想教佢多啲嘢,好似睇住自己個仔出世。我覺得佢好有潛質,絕對睇好佢,佢應該唱歌多過做戲,結他又彈得好好,所以唔好埋沒呢方面嘅天分。」

Fred靠《星夢傳奇》彈起,奪得冠軍及獲得「專業推介表現大獎」,其後加入「星夢娛樂」,奠定歌手身份。

雖然第一次入錄音室,但 Eric Kwok大讚 Fred學得快又易上手,原來佢哋識咗好多年,今次先第一次合作。

捱足 12年, Fred終於爭取到做歌手的機會,對於自己處男大碟,當然不敢怠慢,落足力唱!

絕對睇好佢,佢應該唱歌多過做戲!

唱主題曲安慰獎

「星夢娛樂」旗下歌手,唔係個個都好似 Fred咁好彩,可以出碟做歌手,同期參賽者羅鈞滿和王君馨,今年就未有出碟計劃,但「星夢幫」最大的福利,就係不停有劇集主題曲唱,好過冇囉!

王君馨同是「星夢娛樂」旗下歌手, 14年出碟無望,不過已有 2套劇集的主題曲主唱。

同是天涯淪落人,羅鈞滿今年一樣出碟無望,但亦有機會唱 1套劇集的主題曲。

羅孝勇:已經 ready曬

今年新人暫時男子組聲勢較強,另一位屬 Neway重點新人,就係《超級巨聲 2》得到季軍及《 2012年度 TVB全球華人新秀歌唱大賽》金獎的羅孝勇 Sheldon。

成為 14年樂壇新人, Sheldon話:「今年好開心,好幸運可以同 Neway合作,正式出碟做歌手。呢 3年,我分別有寫歌、參加歌唱比賽同主持電視節目,廣東話進步咗、音樂技巧改善咗,又認識多咗香港文化,基本上已經 ready曬。」

其實參加《巨聲》之後, Sheldon等了 3年才有機會出碟,「之前知道未係時候,惟有不斷寫歌同操 fit自己,話畀人知我係得嘅。呢 3年我寫咗超過 50首歌畀公司聽,每一首歌靈感,都係自己或身邊朋友嘅經歷,所以新碟會有好多唔同 style, R&B、 pop dance,仲有我最擅長嘅結他、跳舞快歌等。第一 plug叫〈我不唱慘情歌〉,其實係一首勵志歌,叫醒失戀嘅人重新振作。而新碟監製係 Johnny Yim,佢真係好犀利,可以幫我幻想嘅編曲變得更加好,仲畀咗我好多自由同發揮空間。」

鬼仔性格的 Sheldon,平時喜歡用結他作曲,仲寫了 50首歌,以「唱作人」打入樂壇。

以前是肥仔的 Sheldon,這幾年又做 gym、又玩巴西柔術和打拳,操得一身肌肉。

10年, Sheldon參加《超級巨聲 2》奪得季軍,之後一直未有簽唱片公司,苦等 3年,靠自己努力,終成為 Neway旗下歌手,出碟有望。

監製嚴勵行 Johnny Yim

香港流行歌作曲人、編曲人,做過監製、演唱會音樂總監等工作,最近一次擔任《許廷鏗時光演唱會 2013》的音樂總監。

女聲新勢力

樂印姊妹今年推出的大碟全由駱胤鳴作曲,部分是未發表過的舊作,但因合唱要顧及兩人聲線及和音等,而家姐高音較準,所以要重新編排妥當才能面世。場地鳴謝: Dmop beauty

星夢、巨聲幫巴閉抬頭,其實今年亦有新女聲勢力不容忽視。其中由「巨聲一幫」駱胤鳴湊住家姐駱胤樺組成的「 SIS樂印姊妹」曝光率最高,頻頻出鏡唱 Live儲經驗,今年要𥄫實。

樂印姊妹新歌〈有夢就很好〉 YouTube已經有得睇,兩姊妹把聲太似都幾難分。

細妹駱胤鳴 4年前參加《超級巨聲》入行,童顏靚聲吸納了不少 fans,卻一直被 TVB安排做兒童節目主持,就算唱作歌曲都只能在網上平台分享。

半年前駱胤鳴簽約 GME(周秀娜經理人公司 GME開發唱片部)及正視音樂唱片公司,更與家姐駱胤樺組成了 SIS,正式展開歌唱事業。首隻派台歌〈有夢就很好了〉成績不俗,希望今年內推出 SIS大碟。

駱胤鳴有表演經驗,原來家姐以往亦曾在觀塘 apm唱歌,但始終缺乏娛樂圈經驗,常常要細妹教路:「上電視好多嘢唔明,佢會帶住我,教我望 cam,但係我哋好唔同,我上節目前一個禮拜就練歌,但細妹懶懶閒,出騷前一日至練,可能佢經驗多啲啦,但咁樣令我好緊張囉!」她說兩姊妹一定會嗌交,尤其家姐每做一件事前一定要考慮結果;相反細妹駱胤鳴則做咗至算。「試過喺屋企嗌到好火,最後同對方講聲 good night、辛苦喇,又冇事,兩姊妹係有好處嘅!」

家姐駱胤樺:「平時我哋好少見,佢做嘢我返學,基本上我起身佢就瞓覺;讀大學前 jam歌多,細妹入行後反而少咗。」她又說自己入行後駱胤鳴覺得很緊張:「因為佢以前只需要對自己負責,𠵱家做錯咗乜就要兩個人負責,所以佢認真咗好多!」

輪住出擊

Evelyn上月性感出席新歌發布會,但推出日期未定。

蔡穎恩 歌神班底

蔡穎恩( Evelyn)由𡃁模轉做演員,再加入樂壇,今年將推出首張處女大碟,現已錄了兩首歌及拍攝了〈四季〉 MV。

Evelyn新碟製作一啲都唔弱,更找來 Eason的禦用監製 C.Y Kong為她監製大碟。不過問到佢新碟計劃, Evelyn則稱要保持神秘未講得住。

CoCo將參演向西村上春樹的《含忍.死人.的士佬》與關楚耀有激情戲,雙線發展。

袁紫僑 CoCo 搖滾型女

除了樂印姊妹,其實𡃁模 CoCo袁紫僑(前名袁聖殷)與肌男 Dominic(何浩文)亦屬 GME,兩人同樣於今年推出個人大碟。 CoCo在澳洲長大,兩年前回港努力練歌,將以 Rock風示人,她透露新碟會以廣東歌為主:「連香港市場都未把握到,有咩資格唱其他?」

柳妍熙早前傳出買 fans風波,繼承強國人作風。《蘋果日報》圖片

柳妍熙 強國勢力

前國家級短跑運動員柳妍熙( Shay)進軍樂壇,有師傅曾路得教路,兩首主打歌〈朗誦者〉和〈為你而來〉相繼報捷,第三首主打〈 It's My Way〉上週派台亦受注目。成績咁好,唱片公司已決定耗資過百萬於 4月中為她推出首張 EP《 Who's Shay》,強國人馬不容忽視。

初戰紅館

新人就等出碟,舊人自然望踏上紅館好似 C AllStar和周柏豪,今年已夠料首次踏上紅館開演唱會,肯努力唔會死嘅!

C AllStar現場任點唱

C AllStar本月 23日將首度踏入紅館開騷,入行只有 4年便有這成績實在好勁!靚聲釗峰都話快到難以想像:「呢個舞台係歌手嘅夢,唔易上嘅!由旺角行人專用區到九展到𠵱家紅館,係全靠 fans支持!」

開騷在即, 4名成員難免好緊張:「開頭有啲怯㗎!但近排大家反而比喺九展做更輕鬆,可能經驗啦,放鬆至可以吸收到練習嘅嘢嘛!」

C AllStar透露今次演唱會將玩即興,準備了 4個電話號碼,觀眾可即場致電點歌,無論中英日韓語歌都得,釗峰話:「咁至好玩,隨便點咩歌,到時就唱到㗎喇!」唱家班果然有 guts!

C AllStar上週四( 6日)在銅鑼灣拍〈總有離開的時候〉 MV,邀請近百 fans助陣,認真有面。

C AllStar前年在九展開首個演唱會,說沒想過這麼快就能跳進紅館。

周柏豪獨唱自家歌

周柏豪為迎接個唱而積極操 fit,希望到時有朱古力睇嚇

周柏豪將於 9月首次在紅館開個唱,日期和場數仲未定,但已難掩興奮:「仲好記得第一次睇嘅演唱會係劉德華,我好羨慕!終於自己達成呢個心願係好滿足,覺得完成咗一個好『地標性』嘅目標。」

正式做歌星的第 7年就踏入紅館,柏豪已非常滿意,順道多謝 fans和公司同事的努力。至於好多歌手開騷都面對唔夠歌的問題,柏豪則好淡定:「暫時計劃全部唱自己歌,因為想喺呢個咁有紀念性嘅日子,將自己嘅音樂同大家分享嘛!我亦寄語新一輩歌手,阿媽教嘅:一分耕耘,一分收穫,希望大家一齊努力。」

‘ 14紅館快車

C AllStar和周柏豪處男唱紅館之外,今年不少前輩如許冠傑和陳慧嫻等都會出山開騷,現時紅館期已排得密密麻麻。

繼續 K-pop

講演唱會點少得 K-pop韓星,上半年已有 5個單位鐵定來港開騷,韓迷又要乖乖畀錢。



鍾意就快D Share啦!
Related Posts Plugin for WordPress, Blogger...