掃呢頁CODE去手機

2014年3月12日 星期三

[FACE 355] 快譯通 古裝成語玩謝 岑麗香狂 NG:好難背! 岑麗香,MF,




事隔 33年,無綫重拍《無雙譜》,關聰就由黃宗澤頂上,李司棋就變咗岑麗香,當日拍攝動作多過講對白, Bosco抱起香香,香香當堂笑曬,呢場更是一 take過。

真面目

快譯通 古裝成語玩謝 岑麗香狂 NG:好難背!

無綫缺姐仔,連近年好多廣東話未講正嘅華姐都要力穀,可惜講對白係佢哋弱項,觀眾齋聽都覺辛苦。

講嘢鬼妹 tone,拍時裝仲可以當 cutie,但拍古裝就出事。上年攞「飛躍進步獎」嘅岑麗香,最近忙翻拍經典《無雙譜》,由於劇本超多四字成語及諺語,香香讀古文慘過讀外星文,講唔掂又要 NG累街坊,難怪香香都狂呻:「我都唔知咩嚟!」

29歲岑麗香由 2年前《巴不得媽媽》開始就劇接劇,今年頭拍完《醋娘子》後,緊接又開古裝經典《無雙譜》。 2年內拍超過 10套劇,但鬼妹仔講對白發音唔正,到𠵱家依然未有大改善。

香香雖然同黃宗澤傳過緋聞,不過兩人拍抱抱戲一啲尷尬都冇, Bosco仲抱住香香成分鐘唔捨得放手,好在 Bosco隻手好規矩。

當日其中一場同黃宗澤拍攝推車戲,唔使對白,香香就唔使 NG,成個人開心曬。

'81《無雙譜》

甘國亮監製嘅《無雙譜》,由關聰飾演張珍,李司棋飾演柳衣及金牡丹。

「瞞天過海」唔知咩嚟

好在香香將勤補拙,每次收到劇本必第一時間自加拼音,加上記性好,所以拍時裝劇尚算勉強過骨,但可惜最近開拍《無雙譜》,劇本跟足 81年版本,而在劇中飾演鯉魚精嘅香香,即使努力翻譯兼自製中英對照劇本,對住大堆古文一樣𢱑曬頭,搞到日日瞓得 1個鐘,亦試過為翻譯失眠 3日,可惜效果仍未如理想,開劇初期,預定一日拍三場戲,但最後只能完成一場,嚴重拖慢拍攝進度。

前週五( 28日)香香同黃宗澤到沙頭角為《無》劇拍外景,香香全程揸住自製中英劇本,至埋位前仍努力狂背,但當日依然要 NG 4次。香香亦表示劇本好有難度,她說:「啲對白真係好難背,咩『妖魔鬼怪』、『瞞天過海』、『救人一命勝做七級浮屠』我都唔知咩嚟!有啲又揾唔到英文解釋,所以好辛苦。不過𠵱家好啲,希望冇影響進度哈哈!」拍完《無雙譜》,可能香香中文突飛猛進呢!

連開《醋娘子》和《無雙譜》兩劇,香香連瞓都冇時間,接騷亦少咗, 3個月內得 4單,不過佢話唔緊要,她說:「背曬啲劇本,拍好啲劇先算我唔心急嘅。」

剛拍完《醋娘子》,香香冇唞過即刻為《無雙譜》開工,鬼妹拍古裝真係大整蠱!

死背書

當日對白唔多,不過香香都 NG咗 3、 4次,難得 Bosco冇發𤷪𤺧,仲好耐心同香香對稿,靚女真係有著數。

中英對照

香香嘅劇本寧舍大過人,原來佢每句都用英文翻譯,再打喺隔籬重新 print過,咁認真,真係抵讚!

煲糖水

每日開工由朝到淩晨,返到屋企仲要做翻譯,香香都要食啲芝麻糊補嚇眼。

翻拍《霸王花》

電視劇玩懷舊翻拍,電影都興呢味。今年除咗有張家輝、張智霖孭飛嘅《跛豪》外,連當年《霸王花》系列亦將會翻拍,據知暫時落實嘅有岑麗香、 Stephy鄧麗欣,其他將會由其他無綫小花和𡃁模頂上,不過當年咁烏 where嘅吳君如角色,應該就唔會由香香做喇!

'88《霸王花》



鍾意就快D Share啦!