2014年3月12日 星期三

[FACE 355] 大壓力 老婆求停工 辭演新劇 森美抑鬱症升級加藥 森美,MF,




週一( 10日)森美在商台開咪後,直認停拍《使徒行者》是因太太擔心自己身體變差,森美說:「之前發燒冧廠!」

真面目

大壓力 老婆求停工 辭演新劇 森美抑鬱症升級加藥

患有專注力失調症兼抑鬱的森美,最近拍拍嚇 TVB新劇《使徒行者》突然辭演,據知森美辭演是因壓力爆煲導致抑鬱症加重,情緒失控令老婆非常擔心。

眼見老公身體情況日差,森美老婆實行勒令兼哀求森美停工休息。老婆軟硬兼施,森美亦惟有就範,週一( 10日)森美亦直言:「我以為仲後生仲頂得順,原來唔得!」

森美育有一子( 11歲)和一女( 8歲),早前便影到他們一家四口去迪士尼玩。

《蘋果日報》圖片

1月開拍的 TVB重頭戲《使徒行者》中,原本森美飾演陳敏之的男友,戲分甚重,但森美最近卻突然辭演,監製和演員都大感意外。

怕累街坊

據知曾承認患上專注力失調症和抑鬱症的森美,近日感壓力大增,電台、電視工作兩邊忙,加上他與《使》劇監製文偉鴻份屬老友,怕累街坊壓力更大,拍攝途中情緒曾一度失控。

知情人士透露:「森美食咗幾年藥,不過最近個病好似嚴重咗,拍劇時記唔到對白,返到屋企又成日自言自語,佢老婆好驚,勸佢唔好畀自己咁大壓力,一定要佢辭演。」知情人士又指森美平時在商台咪後經常發脾氣,幸好同事都知道他有情緒病而體諒他,而森美平日非常孤僻,甚少參與同事聚會,閒時只會獨自踩單車消遣。

早前森美已被指因受抑鬱症影響而要靠「戀足癖」減壓,專影女藝人美腿放上網,兼且有人目睹他到中環太子大廈的精神科醫生、 Wyman密友吳偉文醫務所求診。其實早在 07年,森美在排練舞台劇期間,亦曾失控爆粗鬧人,他當時向本刊承認患有專注力失調症,需要食藥治療。兩種情緒病困擾,難怪森美要辭演唞唞。

角色搶戲

原本在劇中飾演總督察的森美,會跟陳敏之和阿佘都有感情戲,擺明搶鏡,難怪佢自己都話辭演可惜!

沈震軒頂

森美辭演,改由另一受 TVB力捧的沈震軒臨時頂上,他在微博對森美說:「我承諾不會丟你架子,盡力去演活原本屬於你的角色!」

網上圖片

因病辭演《使徒》,森美對於堆天書話「不捨得!」明顯仍想拍。

森美:健康為先

週一( 10日)森美主持完《早霸王》離開商台時回應,否認辭演是受抑鬱症影響:「係健康問題啫,有日發高燒,原本諗住冇問題可繼續拍,點知拍咗陣就冧咗。」他續說:「呢排忙,又電台節目又司儀工作,早排又多 annual ball,拍劇有時通宵得 2、 3個鐘頭瞓,思前想後,雖然劇本係有得發揮,但橫掂唔係拍咗好多戲分,都係以健康為先,所以同監製辭演囉。」

至於有傳他抑鬱症比前嚴重,森美就話:「本身都有抑鬱,睇咗 4、 5年醫生,不過半年前醫生已停咗藥,只係身體承受唔到咁大工作量啫。」

他又稱辭演是老婆決定:「係呀,佢好關心我!唔想我太辛苦,我本來以為仲後生頂得順,原來唔得。辭演之後多咗時間陪佢哋,剛剛星期日陪嚇個仔溫書都幾好吖!」屋企有大有細,健康緊要呀!

大專講 talk

雖然要多休息,但上週六( 8日)森美到調景嶺知專設計學院舉行有關創意的講座,講足 2粒鐘先揸車走人。

週一晨早返商台開咪,見森美攞住部電話傾唔停!

據知上年 7月舉行的 talk騷《森美要滾》反應未如「森美小儀歌劇團」的舞台劇理想,亦令他壓力增加。

《蘋果日報》圖片

瑞士減壓

森美去年由年頭忙到年尾,又要養 2條化骨龍壓力自然唔簡單,所以在今年 2月農曆新年,森美就同家人和好友一齊去咗瑞士旅行,避世減壓兼滑雪,難怪連佢自己都在微博話:「享受就是這樣!」

除咗滑雪,森美去到琉森都忍唔住在湖邊自 chok,咁 relax,乜壓力都放低曬!

網上圖片

森美自稱要轉五次火車才去到雪山滑雪,見佢拎住個 snowboard,又幾 pro咁款喎!

網上圖片

精神科醫生:食藥令脾氣暴躁!

精神科專科醫生李德誠

森美同時患上抑鬱症及專注力失調症可以好嚴重,精神科專科醫生李德誠說:「抑鬱症患者可能受壓力影響,易情緒不穩,易發脾氣,又經常失眠、冇精神,對事物提唔起興趣,嚴重的會有自殺傾向。食藥及認知行為治療可醫治,但壓力源頭冇解決的話會有機會復發。

而專注力失調症患者則容易分心,心神恍惚、冇記性、易做錯事,食藥可令精神回復集中,但副作用是令脾氣暴躁;故此同時患有兩種病症的話,配藥就要相當小心。」



鍾意就快D Share啦!
Related Posts Plugin for WordPress, Blogger...