【電視風雲】提《廣播條例》令港視開台觸礁 謝偉俊：我撐王維基
2014-03-11 22:15:00
議員謝偉俊噚日喺立法會資訊科技及廣播事務委員會上，提出若果廣播超過「5,000個指明處所組成的觀眾接收」，就需要持有免費電視牌照，否則可能牴觸《廣播條例》。
今晚謝偉俊同白韻琹出席喺九龍灣《極速激戰》首映禮，抵步後，謝偉俊一直傾電話，白韻琹搶先為夫擋架話：「佢本身係律師，對法律特別清楚，佢同王維基係朋友，係想保護佢，唔好等佢盲樁樁，開始咗先收掣，係維護佢利益。」
當謝偉俊想走開時，被在場記者叫停，被問到係保護王維基抑或挑戰對方，佢話：「我唔係challenge任何人，我係睇番法律，只係之前無人留意到，我覺得應該要提出。」打算提出議案前，有冇聯絡王維基？佢話：「無，喺大會度先睇到呢個問題，自己係試水溫咁問，大家有冇呢個睇法，王維基私下同政府有信來信往講呢個問題，王維基應該知道。」
謝偉俊被指係令到港視開唔到台嘅人，佢口硬話：「總好過開咗台，原來係違法，以往有呢條法律，大家疏忽咗。」咁一場朋友，謝偉俊有冇搵王維基？佢話：「未有機會，佢有法律團隊，唔俾我畀意見。」事件之後，謝偉俊被問到從此可能冇朋友做，佢話：「佢明白，我不嬲支持，不嬲撐佢。」然後，白姐姐喺後面插嘴：「佢聰明，諗住博一博，依家踢爆咗唔可以再扮懵。」謝偉俊再一次被追問，係唔係保護朋友嘅所為，佢話：「唔係話保護，係想澄清個位置，對大家都好，如果非法咁開台，不如依家合法處理佢。」有冇意見畀朋友王維基？佢話：「今日喺網台都同人傾過，唔送機頂盒，咪送平板電腦，可以符合流動電視。」但係王維基話無路可走，佢話：「佢咁聰明、叻仔，梗有好多路走，下次小心睇睇，有商有量。」
|
鍾意就快D Share啦！
|
|
|
