[FACE 355 外地娛樂] 溝女不離那些年 李鍾碩 MF,

韓片《熱血青春》，聽個戲名就知 sell青春偶像，由去年憑韓劇《聽見你的聲音》升呢為大勢男的 24歲李鍾碩，搭同樣 24歲的玉女偶像樸寶英主演，一個高大靚仔，一個活潑 cutie，拍埋一齊都好襯， 2人著住校服仲好有「那些年」 feel。

韓面

溝女不離那些年

同金秀賢一樣， model出身的李鍾碩，去年憑熱爆韓劇《聽見你的聲音》紅遍韓國以至東南亞，其純真又深情演繹更迷暈唔少韓妹，同金秀賢、李敏鎬及金宇彬齊齊被捧為韓國四大男神。

不過深情男最近轉型演喜劇，於新片《熱血青春》中，李鍾碩唔只玩「那些年」返回 80年代， 24歲扮學生哥，更梳埋中間分界頭變身溝女王。難得有「國民妹妹」之稱的純情偶像樸寶英又癲埋一份，化身惡妹同鍾碩 oppa打打鬧鬧。有冇全智賢喺《來自星星的你》演出咁放先？

《熱血青春》

上映日期： 4月 17日

有「國民妹妹」之稱的樸寶英（右三），一向演開純情少女角色，今次於《熱》片中竟來個大突破飾演不良少女，唔只行為粗魯，仲會帶住班女童黨一齊開片，大家姐咁款。

由「大勢男」李鍾碩搭「國民妹妹」樸寶英主演的偶像校園片《熱血青春》，講述樸寶英飾演的不良女學生，恃住社團「火鳳凰派」老大撐腰，於校內蝦蝦霸霸，但惡女偏偏睇中「溝女王」李鍾碩，點知李鍾碩一直只迷戀校內的純情女神李世英，於是展開一段又打又鬧的三角戀。

同樸寶英唔熟

戲中飾演「溝女王」的李鍾碩，與飾演惡女的樸寶英經常鬥氣的場面令唔少觀眾笑爆嘴。表面上 2人演得好有默契，但鏡頭後原來冇交流。

最近李鍾碩接受訪問時就爆料：「樸寶英同我一樣都係好怕醜嘅人，所以大家都好難熟落。拍戲時我曾經嘗試將 2人關係接近，點知當我哋傾偈時不自覺會講出敬語，令大家變得更加生外。好彩到埋位時大家都投入到角色，所以合作都算成功。」

扮深情男迷暈韓妹的李鍾碩，今次於《熱》片中飾演「溝女王」，經常帶住其他男同學去操場𥄫女。呢一幕，同《那些年》（小圖）裏面柯騰偷𥄫沈佳宜嗰場戲有啲似。

樸寶英雖然𥄫中溝女王李鍾碩，點知李鍾碩唔領情，原來佢一直鍾情校內的女神李世英，仲約埋一齊踩 roller，搞出一場三角戀鬧劇。

患重型流感

去年憑韓劇《聽見你的聲音》升呢做大勢男的李鍾碩，唔只大把電影等佢拍，最近連王牌遊戲節目《 Running Man》都邀請佢做嘉賓。早前《 RM》專誠搵來李鍾碩、金宇彬及 Rain一齊飛去澳洲玩遊戲，點知臨出發前，鍾碩 oppa去中國大陸同 fans會面後，竟染上流感，起初更以為是死得人的禽流感，最後驗出是同樣可致命的新型流感 H1N1，惟有取消《 RM》行程。原本電視台打算叫他中途加入玩遊戲，但為免將病毒擴散，鍾碩最後決定留家休養。

食過都教授？

以純情見稱的樸寶英， 3年前曾跟金秀賢傳緋聞，是金秀賢所集郵的女星中其中一張郵票。

同輝京爭女

將於 4月出街的韓劇《異鄉人醫生》中，李鍾碩除挑戰演醫生角色外，更同樸海鎮一齊爭女主角薑素拉。

做過深情男，又扮過「溝女王」的李鍾碩，將於 4月出街的新劇《異鄉人醫生》中挑戰醫生角色。《異》劇中，鍾碩將扮演一名由北韓流亡到南韓的天才醫生，面對各種奇難雜症外，更與在《來自星星的你》對千頌伊癡情到死的輝京（樸海鎮）一齊追醫院社長千金，玩埋三角戀。

鍾意就快D Share啦！

下一篇 》