2014年9月19日 星期五

[忽然1周 999] EO2 Eddie出金出力 EO2,MW,




身為老闆嘅 Eddie,親力親為喺冰室坐鎮做收銀,仲同客人打牙骹,完全放下歌星包袱。

媽咪姐

EO2 Eddie出金出力

前 EO2成員 Eddie(彭懷安)呢排喺大台播出嘅臥底劇做黑幫大佬「撻沙哥」,做到出晒位,連監製戚其義都打俾佢讚不絕口。雖然成日做壞人,不過私底下, Eddie其實已經係五間茶餐廳嘅老闆。

呢頭啱啱先喺澳門開完分店,嗰頭就着手睇定嗰邊賭場有咩舖位。真係學星爺話齋,一間變兩間、兩間變四間、四間變八間、八間之後上市,上市之後再集資!接住炒股票,夠晒夢幻!

早兩日,媽咪姐就喺灣仔嘅分店見到 Eddie。時值食晏時間,舖頭入面坐滿上班族,忙到一頭煙嘅佢,呢頭坐喺櫃枱收銀,嗰頭就走出舖外,同班食客打牙骹,落手落腳做生招牌。媽咪姐仲隱約聽到啲食客話「撻沙哥,好生意呀!」搞到 Eddie面都紅埋。睇唔出呢位「黑幫大佬」原來咁怕醜喎!

一早返去睇舖嘅 Eddie,做到有氣冇碇唞,終於下午茶時間趁人流少啲,先可以嘆番杯奶茶唞番順條氣。

Eddie唞順氣後,就企出門口打電話,媽咪姐聽到係講訂貨嘅嘢。

Eddie喺《使徒行者》中飾演黑幫大佬「撻沙哥」(左)雖然最終俾許紹雄整死咗,但戲份頗重,同林峯對手戲多。



鍾意就快D Share啦!
Related Posts Plugin for WordPress, Blogger...