網頁

請重新LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年9月4日 星期四

[壹週刊 1278] 冰淋城下有錢賺 M1,




靚女 Jessica話唔介意花錢幫襯。

爆壹爆

冰淋城下有錢賺

呢排興玩「冰淋城下」淋冰水,玩到差唔多水尾,但就把整個活動搞到古靈精怪,有父母淋 BB,又有𡃁仔深夜在街上玩。上個禮拜行去黃金海岸,點知淋冰熱潮連呢度都有,而且仲變成一盤生意。原來食腦泳灘士多老闆,一見呢股熱潮,即識得從中搵錢,套餐服務收費$50,另加膠桶按金$50,即放低一張紅衫魚,士多就會提供一個膠桶及冰粒供客人玩冰桶挑戰,雖然屬小生意,但勝在成本平,趁此股熱潮當發一個小橫財也算不錯,唔知沙灘士多老闆賺咗錢後,有冇捐番少少出來呢?

不過上週爆哥去黃金海岸時,遇見靚女泳客 Jessica,佢話如果成班朋友玩,佢都會花錢幫襯,但始終係慈善嘢,俾人用來做生意就好似有衝突咁喎。

最抵死係士多職員珍姐,佢爆料話冰粒本來收$25一桶,但老闆見生意好,冰粒加價至$30,另加冰桶租金$20,成個套餐$50,珍姐細細聲話冰粒用士多製冰機整,成本好低咋!

勝和選舉爭崩頭

薯仔(圖)親細佬傳上位做坐館。

2017年行政長官產生辦法,大家仲拗到面紅耳熱,不如爆哥率先為大家披露,號稱全港最大嘅黑社會「和勝和」,呢排又拗緊選揸 fit人。有人放風,話勝和元老已一錘定音,選咗「串仔」同「 ET B」。爆哥聽到呢兩個名,𢱑爆頭,佢哋係乜誰呢?

原來串仔同 ET B後台好猛,串仔係「薯仔」親細佬,同屬「雞腳黑」的馬房,薯仔同雞腳黑都做過勝和坐館,自然想「自己人」揸龍頭棍啦。至於 ET B,佢係「荃灣澤」嘅頭馬,荃灣澤近年經營澳門賭廳,賺到豬籠入水,在幫內被稱為「勝和超人」。

勝和每兩至三年選一次坐館,雞腳黑和大飛兩股勢力,各自推出候選人,互不承認。上一屆勝和竟然有四個辦事人,包括「沙田 me」、「子騰」、「肥堅」同埋「 Band仔光」,當時勝和有份舉手投票嘅元老都有微言,話咁多人做辦事人,成何體統。而據聞今次選坐館亦未真正落實,因為大飛一系人馬並不承認,睇來勝和內部因坐館問題,會繼續四分五裂。

其實勝和坐館係一個魔咒,做過坐館就坐監,十居其九都會被警察拘捕,好似陳安、白頭仔、崩嘴崩,換屆後都要坐番幾個月監「找數」。

紋身佬撩母子隻揪

早前爆哥搭港鐵往羅湖時,在車廂咁啱遇到一場大戰。當時一對母子同一名阿伯開拖,事緣阿伯因為行李碰撞問題,同母子二人發生激烈口角,雙方仲爆晒粗咁。而約廿餘歲的兒子,表現激動得仲想挑另一阿伯機,不時挺胸作勢撞向一阿伯,阿伯不甘示弱大聲還口:「我唔怕你打我,最多咪報警囉。」大家在車廂內不停高聲互相指罵,情況混亂之餘又相當擾人,附近一班睇熱鬧乘客都紛紛拿出手機拍攝,仲一路評論邊個有道理,估唔到香港依家變成咁,有咩事大家就鬥出手機。

卒之臨近羅湖站時,一名雙臂有紋身的江湖大漢,不忿港男和阿伯在他面前大聲叫又唔郁手較高下,忽然暴跳如雷大聲話:「喂,要嘈出去嘈,唔好响我耳邊嘈,哇煩到我呀……如果想打交就搵我打。」戰況立即逆轉,阿伯怕事唔再出聲,變成兩母子轉移向紋身漢發洩,紋身漢不斷叫隻揪,兩母子最終忍手離開,鬧劇好彩冇變成血案。

依家手機流行,大家嗌交前真係要想清楚隨時被人放上網,而且各自出手機,衝突會變得更有挑釁性,爆哥只可以提醒乘客留意港鐵附例 28條 H,任何人不得在港鐵範圍內粗言穢語,違例者可被罰款$5000。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!



鍾意就快D Share啦!


Related Posts Plugin for WordPress, Blogger...