2014年9月4日 星期四

[FACE 380] 袋住先 讚篩選好專業 何艷娟爆大冷 法律系季軍盲撐港姐假普選 何艷娟,港姐,MF,




何艷娟當晚口才了得,被評判鄭裕玲同容祖兒大讚,但問到港姐有冇篩選,竟然答:「大會評判相當專業,我相信佢哋眼光。」咁講就令人失望啲!

真面目

袋住先 讚篩選好專業 何艷娟爆大冷 法律系季軍盲撐港姐假普選

大台有幾維穩眾所周知,週日( 31日)政改落大閘普選夢碎,估唔到大台都同中央步伐一致,喺同日舉行嘅港姐決賽實行假普選。

事前說好的民選港姐,原來係五位評判內定三名選冠亞季,篩完先畀你選,但最令人失望係,季軍 7號香港大學法律系畢業嘅何艷娟,利益當前原則不願,竟然覺得大台假普選冇問題,仲話:「大會評判相當專業,我相信佢哋眼光。」喂!你有個師兄教授叫戴耀廷喎!







論身材同樣貌, 7號何艷娟未算最突出,但港大法律系畢業,單係呢個 CV都夠照。

大台今年港姐宣傳口號為「港姐冠軍,由你話事」,咪以為真係一人一票選港姐,點知週日(31日)決賽當晚,先知只係取巧,由大台內定三甲俾你選冠亞季,大台同政府「有商有量」的假普選手法一致,網民唔鬧爆就奇。

冠軍 13號邵珮詩次熱勝出,真正大熱 11號吳凱欣老早被篩,不過亞軍,季軍資格備受質疑。後期熱門變大冷的季軍 7號何艷娟,喺港大法律系畢業,竟然埋沒良知盲撐大台,問佢有冇覺得港姐係有篩選嘅選舉,她竟然答:「大會評判相當專業,我相信佢哋眼光。」你點讀法律㗎!

其實何艷娟一向想入行,自言想做主播,上年曾參加本刊舉辦嘅 UStar大專校花校草選舉(今屆又接受報名喇,可揭番去 P.12睇詳情!),更獲得網上人氣 Face UStar girl大獎,今年繼續選美夢再戰港姐。雖然網民對佢入三甲質疑,不過何艷娟私下有唔少裙下之臣,有傳佢同銅鑼灣擁 3鋪的橋底辣蟹太子拍拖,期間又同另一名醫生有曖昧。

本刊週一( 1日)到橋底辣蟹,有員工表示見過何艷娟喺鋪頭出現,但何艷娟對呢啲傳聞相當淡定,一副港姐腔回應:「冇啲咁嘅事,呢啲傳聞嚟嘅啫。」

何艷娟北京出世,兩個月大回港,留學英國多年,出身小康,家住青衣私樓。何母十分支持愛女選美,經常伴住愛女周圍去兼齊齊自拍。網上圖片

冠軍為賽前冷熱,最後以接近 16萬選票奪冠,比起上屆冠軍陳凱琳 17萬票,爭成萬票。

冠軍邵珮詩身材勁,但原來 18歲時係肥妹仔一名。當晚大會公開其身份證相,明顯見到係肥妹仔。

有傳何艷娟同銅鑼灣食店橋底辣蟹黃姓太子爺拍拖,但為選美飛人。不過人哋家底豐厚兼且係讀醫出身,點會襯唔起港姐季軍呀?網上圖片

港大法律系畢業,喺英國讀 high school,但當年選本刊 UStar時,母親爆她在高中時曾經成日逃學,最後當然改過網上圖片

何艷娟愛選美,去年就選過本刊 UStar大專校花,仲攞到網上人氣 face UStar Girl獎。

亞軍王卓淇 未有三粒星

法律系港姐盲撐大台假普選,原來亞軍 9號王卓淇亦不遑多讓,據知廣州出生嘅佢,𠵱家身份證仲未有三粒星, 11年曾經選過娘爆嘅中華小姐,但 12強不入。之後有網民爆料佢疑似整容,成績差兼寸咀而且為選美飛甩男友。不過有充足選美經驗嘅佢就好淡定:「我有香港身分證,一直沒隱瞞,在廣州出世。我成績差?碩士一級榮譽畢業喎!我唔寸,識我嘅人都知。」

王卓淇身材高䠷,有 5呎 8吋高,可惜上圍得 31.5吋,當晚着泳衣,洗衫板身形盡現。

廣州出世嘅王卓淇,為選港姐,特意為自己消毒。不過亦被網民發現佢以前嘅變臉相。網上圖片

為選美王卓淇收埋男友,更扮純情話自己拍過一次拖,但被網友爆她拍過幾次拖,而且愛洗男友錢。網上圖片

冇獎仲好!民意之選等開劇

大台一向自視過高搞到盡失民心,賽前頂頭大熱 3號黃碧蓮和 11號吳凱欣,網民 like爆,點知就敗喺大台嘅假普選,冇得入最後 3強。但據知兩位民望高嘅落選港姐,已被樂小姐睇中,好快叫佢哋拍劇,嚟緊節目巡禮仲預埋佢哋添。

11號吳凱欣憑甜到漏笑容一直深得巴打 like,據知 11年當時得 22歲的她,拍過一套三級獨立短片《至少在夢裏》,之後更同該電影導演卓亦謙拍拖。而影評人舒琪週日晚就在 fb暗指呢個女仔電力勁,仲喺 fb大讚佢:「她是一個有潛質的演員。我很希望我下一次看見她,是在正式的銀幕上,在一部 worthwhile的電影裏。」

11號吳凱欣選美前曾做過 modle及空姐,樣子標緻,即被巴打封為凱欣 BB。

11年當時得 22歲嘅凱欣 BB,仲有 baby fat,但相當 pure,當時為獨立短片《至少在夢裏》任女主角,雖然係三級片,但她在片中並冇任何裸露鏡頭。她之後亦和該片導演卓亦謙拍拖。網上圖片

影評人舒琪喺 fb指吳凱欣落選了反而是好事,免於墮落在大台喎!凱欣 BB週一亦在 fb回應,指自己「熱誠還在,謝謝你的鼓勵!」咪墮落先好呀!

有傳樂小姐同余詠珊不和,不過比賽當晚二人坐埋一齊,不時見到二人笑晒口,真係少啲演技都唔得。電視畫面

而 3號黃碧蓮雖然深得 Do姐鍾愛,喺台上同 Do姐鬥玩急口令,可惜最後都三甲不入,但據知高層亦知兩位女神夠人氣有觀眾緣,將安排佢哋入劇組, 9月底拍嘅節目巡禮,仲會預佢哋兩位。冇港姐包袱,隨時衝線先㗎!

3號黃碧蓮樣靚身材正,加上鬼妹仔可愛性格,可惜最後都三強不入令人大跌眼鏡。

宣布 3強一刻,除咗 15號邵珮詩外,其餘兩位大熱都唔入圍,身為星級評判之一嘅志偉,即刻 O嘴,仲同 Do姐密斟。電視畫面

3號黃碧蓮準決賽同決賽都被星級評判之一嘅嘟姐睇好,二人仲喺台上鬥玩急口令,點知最後都三強不入,真係令人跌眼鏡。



鍾意就快D Share啦!
Related Posts Plugin for WordPress, Blogger...