2015年1月7日 星期三

[FACE - 398 - 外地娛樂] 擔正過新年 金宇彬謙爆:演技 50年後先滿意 金宇彬,MF,




《技術者們》

上映日期: 1月 29日

由金宇彬(右起)、李玹雨及高昌錫主演的《技術者們》,已於去年 12月 24聖誕檔期韓國上畫,至今入場已超過 200萬人次, W走勢超勁。

韓飯台

擔正過新年 金宇彬謙爆:演技 50年後先滿意

Hit爆東南亞的韓劇《繼承者們》,除帶挈男主角李敏鎬紅足 1年有多,連大配角金宇彬亦升呢變一線男優,唔只廣告密密拍,更上位擔正做電影男主角。

上年出街的《朋友 2》金宇彬只做男二,今次拍《技術者們》終於擔正做男一。講神偷智取 1,500億現金故事的新戲《技術者們》,聖誕檔期已在韓國上映,至今觀眾人數已突破 200萬,雖然走勢強勁,但宇彬 oppa反而騰雞驚自己承受更大壓力,仲自嘲演技要到 50年後先至滿意。紅而不驕,抵佢咁受歡迎

金宇彬第一次擔正,滿意自己表現嗎?

男模出身, 25歲的金宇彬電視劇拍唔少,但電影數數埋埋暫時只有 3套,繼去年的《朋友 2》做男二之後,新戲《技術者們》已升呢做男主角,雖然坐正做男一,但最近金宇彬出席《技》片試映會時,竟自爆:「當電影主角只是第一次,我壓力很大,但拍攝過程很愉快,不過我對自己的演技,無法 100%滿意,或者要 50年後先可以滿意呢!」

早前金宇彬出席《技》片宣傳活動時,舉晒 V影相鬼咁風騷,但佢好謙虛話唔多滿意自己嘅演技,要到 50年後先會滿意。

《技》片上畫 4日入場人次已過百萬,金宇彬收到呢個好消息後,竟在錄製綜藝節目外景時,當街下跪行大禮,都好誇張喎!

《技》片中,金宇彬上演出浴戲,聽講佢有啲抗拒喎?

近年當紅韓男無論拍劇或拍戲都要上演出浴戲,金宇彬亦唔例外,戲中飾演神偷都要拍沖涼戲騷肌引觀眾。

提到出浴戲,早前接受訪問時,金宇彬尷尬表示:「一打開劇本時,唔明白點解有沖涼戲,之後問導演,導演解釋此戲係以商業角度去拍,後來我知沖涼鏡頭係為滿足觀眾而拍,所以拍攝此戲前半部時,我帶住責任感嘅心態去做運動。但因過度集中做健身而忽略自己演技上嘅缺點,所以曾一度中斷做運動。」

憑《繼承者們》走紅後, 2014年搵咗幾多錢?

最近韓國 tvN收費頻道節目《名單 2014》中,選出去年人氣爆發韓星,金宇彬亦被列入名單內。據節目報導,去年金宇彬每個廣告開價高達 4、 5億韓圜,單係韓國本土廣告收益已達 70億韓圜,加上 7次本土及海外粉絲見面會,再進帳 16億韓圜,今年總吸金約 86億韓圜(約 6,501萬港元),真係賺到笑。

單係 2014年,金宇彬已擁有 17個廣告合約,其中還有幫香港道地蜂蜜綠茶拍廣告,佢用唔鹹唔淡廣東話話:「少少甜」,冧死唔少港女。

《技術者們》講金宇彬飾演的夾萬神偷與電腦神童李玹雨及肥賊高昌錫,專門策劃盜竊珠寶,結果引起黑幫關注,並威脅他們要在 40分鐘內偷走 1,500億韓圜現金,所以戲中不乏黑幫講數場面。

21歲的李泫雨(右),前年憑跟金秀賢合演的《三個特攻美少年》爆起,今年再拍住韓國四大天王之一的金宇彬演《技術者們》,上位冇難度。



鍾意就快D Share啦!
Related Posts Plugin for WordPress, Blogger...