乾塘近三年，胡杏兒在新年來臨前終於有着落，除夕前一晚（ 30日）以女友身份陪金融才俊 Phil出席友人派對。
封面
着李詩韻舊鞋 胡杏兒瘋戀港姐食家
加加埋埋單身三年，胡杏兒同黃宗澤甩拖後緋聞傳唔停，不過都係得個傳字。「多人追」、「了解中」，聽就聽得多，好在今次終於成功叫糊。
上周五（ 30日），省鏡過台慶頒獎禮嘅杏兒跟住新男友出席私人生日派對，正式確定新戀情，新歡仲唔係生面口呀！拖過李詩韻、嗒過張曦雯，金融才俊兼夜場老闆 Phil高大威猛財力雄厚，不嬲多女星仆埋身，今次連 35歲杏兒都中招！又話去到邊都有狗仔隊、冇得見面又冇得出街嘅？
戀得高調，分手亦高調！ 12年中，胡杏兒喊住宣布同黃宗澤各行各路後，雖則身邊長期傍住胡定欣、黃智雯、姚子羚呢班閨密，甚至仲有個攬得又玩得嘅「男友」李思捷，但始終 35歲冇件真命唔多踏實。上週六（ 31日）出席倒數活動，都仲講緊：「𠵱家有幾位都了解認識中，係圈外人，但係根本出唔到街約會，因為太多狗仔隊跟！唯有用短訊溝通，好似古代寫信一樣。」其實杏兒乾塘三年早有着落，倒數前一日至做跟得女友陪新歡去 Ball。
陪你倒數
除夕前（上月 30日）一晚，記者在銅鑼灣富豪酒店發現杏兒蹤影，身邊不見經理人與助手包圍，杏兒少了視后氣勢不過就多了一分「女友」味，準時開席前乘男友七人車到場，乖乖殿後在男伴之後落車、等男伴簽到搵位靜靜聽候發落，然後入場埋位陪笑又陪坐，十足十背後女人一樣。
收錢出席倒數騷就話化行妝又大露背、台慶爭獎就話要爭奇鬥艷，當晚富豪酒店舉行的其實屬於私人生日慈善派對，杏兒復古 look加高貴白裙，打扮反而更落本錢！無他，女為悅己者容，當晚叫得郁杏兒擔任女伴的，正是杏兒新歡 Phil。
公開關係
前度是當家小生，杏兒新歡其實亦唔講得笑，男伴 Phil正職金融、亦擁有名人夜蒲熱店 PLAY，高大又靚仔圈中友人不少，圈中前女友更加多， 10年曾經與李詩韻拍拖一年，去年中更同明珠台主持、華姐出身的張曦雯傳撻着，絕對係新晉港姐華姐殺手。
據知情人士透露，杏兒感情真空三年，一直恨拍拖恨到發燒，不時放風要身邊好姊妹介紹男友，今次遇上港姐殺手，本來還擔心對方情史豐富變前度翻版，思前想後才被誠意打動，唔怕畀人話着李詩韻舊鞋都放膽愛，可見杏兒今次的確中晒招，愛得瘋狂。兩人正式行埋冇耐，男友 Phil已私下向友人宣布溝女成功，而生日派對則第一次以情侶身份公開關係，悉心打扮杏兒絕對攞滿分。
新歡 Phil：「唔係好慣！」
據悉成功追到杏兒後，有人難耐興奮之情，周日（ 4日）本刊致電男主角， Phil其實好怕醜：「點解你會 call我嘅？邊個話我哋拍拖呀？我哋一齊去 ball啫，個個都係朋友，我都唔係好慣、唔想講咁多！」
至於上一任緋聞女友張曦雯就大方得多：「我同佢都冇一齊，又點分開呢？我冇聽過佢哋一齊，但我知道 Phil好想搵個好女仔 settle down，杏兒又真係一個好女仔，據我所知 Phil絕對唔係花心嘅人，佢哋一齊我梗係開心」至於杏兒前度 Boso就好大方送上祝福，他對本刊說：「如果係真就祝福佢、恭喜佢！」
我找到了！
一套《野蠻奶奶》定情，相戀八年後越戀越公開，更在 11年台慶登上視后寶座時發表愛的宣言，勢估唔到八個月後胡杏兒同黃宗澤突然宣布分手。分手後更單身近三年才再有着落。
勁旺女人緣
杏兒千揀萬揀終於落手，新歡 Philip Lee被友人暱稱 Phil，有樣又有錢，亦交遊廣濶。唔只係夜店 PLAY東主，自己亦愛夜蒲，去到邊都俾女圍，人如其店，真正玩家。
港姐俾人食
前女友包括 03年港姐李詩韻、 12年華姐張曦雯，現任就係 99年港姐季軍胡杏兒，金融才俊 Phil可謂新晉港姐殺手。其實港姐歷史悠久，早年水準極佳真正美貌與智慧並重，亦的確係吸引唔少城中富豪爭住做港姐殺手。
亞姐嫁得好
「港姐殺手」聽得多，「亞姐殺手」係咪未聽過呢？其實亞姐都係富豪寵兒，不過相對專一啲、又低調啲，通常可以開花結果仲好幸福添！
|
鍾意就快D Share啦！
|
|
|
